ଚନ୍ଦ୍ରଶେଖରପୁର,୧୬/୧୧: ବାର୍କୁ ଆସିଥିବା ଜଣେ ଯୁବତୀଙ୍କୁ କମେଣ୍ଟ ମାରିବାକୁ ନେଇ ୨ଗୋଷ୍ଠୀ ମଧ୍ୟରେ ମାରପିଟ୍ ହୋଇଛି । ଏଥିରେ ୩ ଜଣ ଆହତ ହୋଇଛନ୍ତି । ଇନଫୋସିଟି ଥାନା ଅଞ୍ଚଳରେ ଏକ ବାର ସାମ୍ନାରେ ଗତକାଲି ବିଳମ୍ବିତ ରାତିରେ ଏମିତି ଘଟଣା ଘଟିଛି । ପୁଲିସ ପହଞ୍ଚି ଆହତଙ୍କୁ ହସ୍ପିଟାଲରେ ଭର୍ତ୍ତି କରିଛି ।
ମିଳିଥିବା ସୂଚନା ଅନୁଯାୟୀ, ମାଗନେଟିକ୍ ଛକ ପାଖରେ ଥିବା ଏକ ବାରକୁ ଗତକାଲି ପ୍ରେମୀଯୁଗଳ ଆସିଥିଲେ । ଉଭୟେ ଫେରୁଥିବା ସମୟରେ ବାର୍ ବାହାରେ କିଛି ଯୁବକ କମେଣ୍ଟ ମାରିଥିଲେ । ଏହାକୁ ନେଇ ପ୍ରେମିକ ଜଣଙ୍କ ତାଙ୍କୁ ଗାଳିଗୁଲଜ କରିଥିଲେ । ଯୁବକମାନେ ତାଙ୍କୁ ଘେରିଯାଇ ନିସ୍ତୁକ ମାଡ଼ ମାରିଥିଲେ । ମାଡ଼ ଖାଇଥିବା ଯୁବକ ତାଙ୍କର କିଛି ସାଙ୍ଗକୁ ଡକାଇଥିଲେ । ସେମାନେ ପହଞ୍ଚି ମାଡ଼ ମାରିଥିବା ଯୁବକମାନଙ୍କୁ ପିଟିଥିଲେ । ଏହାକୁ ନେଇ ସେଠାରେ କିଛି ସମୟ ରଣକ୍ଷେତ୍ର ପାଲଟିଥିଲା । ଝଗଡ଼ା ବଢୁଥିବା ଦେଖି ଯୁବତୀ ଜଣଙ୍କ ଅନ୍ୟ ଗାଡ଼ିରେ ପଳାଇ ଯାଇଥିଲେ । ଖବର ପାଇ ପୁଲିସ ସେଠାରେ ପହଞ୍ଚିଥିଲା । ହେଲେ ସେତେବେଳକୁ କିଛି ଯୁବକ ସେଠାରୁ ପଳାଇଥିଲେ । ରକ୍ତାକ୍ତ ହୋଇଥିବା ୩ ଜଣଙ୍କୁ ପୁଲିସ ହସ୍ପିଟାଲ ନେଇଥିଲା । ଏନେଇ ଥାନାରେ ଏତଲା ଦିଆଯାଇଛି । ବିଳମ୍ବିତ ରାତି ଯାଏଁ ବାର୍ ଖୋଲୁଥିବାରୁ ପ୍ରତିଦିନ ଛୋଟମୋଟ ଗଣ୍ଡଗୋଳ ହେଉଛି । ଗତ ୩ ମାସରେ ଇନଫୋସିଟି ଓ ଚନ୍ଦ୍ରଶେଖରପୁର ଅଞ୍ଚଳରେ ଥିବା ବାର୍ରେ ପ୍ରାୟ ୧୦ ଥର ଗଣ୍ଡଗୋଳ ହେଲାଣି ।
