ଭୁବନେଶ୍ୱର,୧୧/୦୫: ବଡ଼ଗଡ଼ ଥାନା ଅଞ୍ଚଳରେ ଘର ଭଡ଼ା ନେଇ ରହୁଥିବା ଜଣେ ବାର୍ ଡ୍ୟାନ୍ସରଙ୍କ ଝୁଲନ୍ତା ମୃତଦେହ ଉଦ୍ଧାର କରିଛି ପୁଲିସ୍ । ମୃତ ଡ୍ୟାନ୍ସର ହେଉଛନ୍ତି ବଡ଼ଗଡ଼ ପୋଡ଼ାସାହିରେ ରହୁଥିବା ସୁଲୋଚନା ଦାସ (୨୨) । ପୁଲିସ୍ ମୃତଦେହ ଉଦ୍ଧାର କରି ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରିଛି ।
ଜଗତସିଂହପୁର ଜିଲ୍ଳା ତିର୍ତ୍ତୋଲ ସ୍ଥିତ ଅଲଗାଁରେ ସୁଲୋଚନାଙ୍କ ଘର । ଗତ ୯ ମାସ ତଳେ ଭୁବନେଶ୍ୱର ଆସିଥିଲେ । ପ୍ରଥମେ ସାଙ୍ଗଙ୍କ ରୁମ୍ରେ ରହୁଥିଲେ । ତା’ପରେ ବଡ଼ଗଡ଼ ପୋଡ଼ାସାହିରେ ଘର ଭଡ଼ା ନେଇ ରହୁଥିଲେ। ତାଙ୍କ ସହ ତାଙ୍କର ପୁରୁଷ ବନ୍ଧୁ ମଧ୍ୟ ରହୁଥିଲେ । ଗତ କିଛି ଦିନ ହେବ ପୂର୍ବକଥାକୁ ନେଇ ଉଭୟଙ୍କ ମଧ୍ୟରେ ପାଟିତୁଣ୍ଡ ଲାଗିଥିଲା। ଏ ବିଷୟରେ ସୁଲୋଚନା ତାଙ୍କ ଘରକୁ ଲୋକଙ୍କୁ ଜଣାଇଥିଲେ । ଶୁକ୍ରବାର ମଧ୍ୟାହ୍ନ ପ୍ରାୟ ୧୨ଟା ବେଳେ ସୁଲୋଚନାଙ୍କ ଘରକୁ ଫୋନ୍ କରି ପୁରୁଷ ବନ୍ଧୁ କହିଥିଲେ, ସେ ଆତ୍ମହତ୍ୟା କରିଛି। ଖବର ପାଇ କଟକରେ ରହୁଥିବା ସୁଲୋଚନାଙ୍କ ବଡ଼ ଭଉଣୀ ଭୁବନେଶ୍ୱର ଆସିଥିଲେ । ଦେଖିଥିଲେ ରୁମ୍ ବାହାରୁ ତାଲା ପଡିଛି ଓ ଫୋନ୍ କରିଥିବା ପୁରୁଷ ବନ୍ଧୁ ଫେରାର ହୋଇଯାଇଛି । ଖବର ପାଇ ପୁଲିସ୍ ଘଟଣାସ୍ଥଳରେ ପହଞ୍ଚି ରୁମ୍ କବାଟ ତାଡ଼ି ଦେଇଥିଲେ ସୁଲୋଚନା ଫ୍ୟାନ୍ରେ ଝୁଲୁଛନ୍ତି । ଦୁଇଟି ଯାକ ଗୋଡ଼ ତଳେ ଲାଗିଛି । ଏହା ଦେଖି ପରିବାର ଲୋକଙ୍କର ସନ୍ଦେହ ହୋଇଥିଲା । ସେମାନେ ପୁଲିସ୍କୁ ଖବର ଦେଇଥିଲେ । ପୁଲିସ୍ ଘଟଣାସ୍ଥଳରେ ପହଞ୍ଚି ମୃତଦେହ ବ୍ୟବଚ୍ଛେଦ ପାଇଁ ପଠାଇଥିଲା । ହେଲେ ସୁଲୋଚନାଙ୍କ ପୁରୁଷ ବନ୍ଧୁ କେଉଁ ଆଡେ ଫେରାର ହୋଇଯାଇଥିଲେ । ସୁଲୋଚନାଙ୍କୁ ହତ୍ୟା କରି ତାଙ୍କୁ ଝୁଲାଇ ଦିଆଯାଇଛି ବୋଲି ଥାନାରେ ଅଭିଯୋଗ କରିଛନ୍ତି । ପୁଲିସ୍ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି।
