ନୂଆଦିଲ୍ଲୀ,୩।୮: ପ୍ରସିଦ୍ଧ ଭାରତନାଟ୍ୟମ ଡ୍ୟାନ୍ସର ୟାମିନି କୃଷ୍ଣମୂର୍ତ୍ତୀଙ୍କ ୮୪ ବର୍ଷରେ ପରଲୋକ। ଶନିବାର ଆପୋଲୋ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ଶେଷ ନିଶ୍ବାସ ତ୍ୟାଗ କରିଛନ୍ତି ୟାମିନି। ବୟସାଧିକ କାରଣରୁ ସେ ଅସୁସ୍ଥ ଥିଲେ। ତାଙ୍କର ମୃତ୍ୟୁ ନେଇ ଦୁଃଖଦ ଖବର ଦେଇଛନ୍ତି ମ୍ୟାନେଜର ଓ ସଚିବ ଗଣେଶ। ଏହି ଖବର ୟାମିନିଙ୍କ ବହୁ ପ୍ରଶଂସକଙ୍କୁ ଆଘାତ ଦେଇଛି। ସୋସିଆଲ ମିଡିଆରେ ପୋଷ୍ଟ ମାଧ୍ୟମରେ ପ୍ରଶଂସକମାନେ ତାଙ୍କୁ ଦେଇଛନ୍ତି ଶ୍ରଦ୍ଧାଞ୍ଜଳି ।
ୟାମିନିଙ୍କ ମ୍ୟାନେଜର ଓ ସଚିବ ଗଣେଶ କହିଛନ୍ତି, ସ୍ବାସ୍ଥ୍ୟଗତ ସମସ୍ୟା ହେତୁ ଗତ ୭ ମାସ ହେଲା ସେ ଆଇସିୟୁରେ ଥିଲେ। ରବିବାର ତାଙ୍କ ପାର୍ଥିବ ଶରୀର ସକାଳ ୯ଟା ବେଳେ ତାଙ୍କ ଇନଷ୍ଟିଚ୍ୟୁଟ ‘ୟାମିନି ସ୍କୁଲ ଅଫ୍ ଡ୍ୟାନ୍ସ’କୁ ଅଣାଯିବ। ସେଠାରେ ତାଙ୍କୁ ଶେଷ ଦର୍ଶନ କରିପାରିବେ ଲୋକେ। ତାଙ୍କ ଅନ୍ତିମ ସଂସ୍କାର ସମ୍ପର୍କରେ ସବିଶେଷ ସୂଚନା ମିଳିପାରିନି। ତେବେ ୟାମିନିଙ୍କ ପରିବାରରେ ଦୁଇ ଭଉଣୀ ରହିଛନ୍ତି।
ୟାମିନିଙ୍କ ଜନ୍ମ ଆନ୍ଧ୍ର ପ୍ରଦେଶର ଚିତୁର ଜିଲ୍ଲାର ମଦନପଲ୍ଲୀରେ ହୋଇଥିଲା। ତାଙ୍କର ଲାଳନପାଳନ ତାମିଲନାଡୁର ଚିଦମ୍ବରମ୍ରେ ହୋଇଥିଲା। ୟାମିନି ୧୯୫୭ ରେ ମାଡ୍ରାସରେ ଡେବ୍ୟୁ କରିଥିଲେ। ତାଙ୍କୁ ତିରୁମାଲା ତିରୁପତି ଦେବସ୍ଥାନମ୍ର ଅସ୍ଥାନା ନର୍ତ୍ତକୀ(ନିବାସୀ ନର୍ତ୍ତକୀ) ହେବାର ସମ୍ମାନ ମିଳିଥିଲା। ତାଙ୍କୁ କୁଚିପୁଡି ନୃତ୍ୟଶୈଳିର ‘ମଶାଲ ବାହକ’ ରୂପରେ ଜଣାଯାଏ। ସେ ନିଜ ଦ୍ବାରା ତିଆରି ହୋଇଥିବା ସଂସ୍ଥା, ୟାମିନି ସ୍କୁଲ ଅଫ୍ ଡ୍ୟାନ୍ସ, ହୋଜ୍ ଖାସ୍, ନୂଆ ଦିଲ୍ଲୀରରେ ଯୁବ ନର୍ତ୍ତକୀଙ୍କୁ ନୃତ୍ୟ ଶିକ୍ଷା ପ୍ରଦାନ କରୁଥିଲେ। ତାଙ୍କ ନୃତ୍ୟ କ୍ୟାରିୟରରେ ସେ ବହୁ ପୁରସ୍କାର ପାଇଛନ୍ତି। ତା ଭିତରେ ପଦ୍ମଶ୍ରୀ (୧୯୬୮), ପଦ୍ମ ଭୂଷଣ(୨୦୦୧) ଓ ପଦ୍ମ ବିଭୂଷଣ(୨୦୧୬) ସାମିଲ ରହିଛି, ଯାହାକି ଭାରତର ସର୍ବୋଚ୍ଚ ନାଗରିକ ପୁରସ୍କାର ମଧ୍ୟରେ ଅନ୍ୟତମ।
