କଟକ, ୧୯/୦୪ : ପୁଲିସ ଅଧିକାରୀ ଅମିତାଭ ମହାପାତ୍ରଙ୍କୁ ସାଂସଦ ଭର୍ତ୍ତୃହରି ମହାତବ ମାଡ଼ ମାରିବା ଅଭିଯୋଗ ସମ୍ପର୍କିତ ମାମଲାର ଶୁଣାଣି ଆରମ୍ଭ ହୋଇଛି। ଆଜି ଭର୍ତ୍ତୃହରି ନିଜ ଓକିଲଙ୍କ ଜରିଆରେ କୋର୍ଟରେ ହାଜର ହୋଇଛନ୍ତି। ଅନ୍ୟପଟେ ଅଭିଯୋଗକାରୀ ପୋଲିସ ଅଧିକାରୀ ବି ଜେରାର ସମ୍ମୁଖୀନ ହୋଇଛନ୍ତି। ପ୍ରତିପକ୍ଷ ଓକିଲ ଅନେକ ପ୍ରସଙ୍ଗକୁ ନେଇ ଅମିତାଭଙ୍କୁ ଜେରା କରିଛନ୍ତି। ମୁଖ୍ୟମନ୍ତ୍ରୀଙ୍କ ଗସ୍ତର ପ୍ରୋଟକଲ କେମିତି ରୁହେ। ସେ ସମୟରେ ପୋଲିସର ଭୂମିକା କଣ। କେଉଁ ପୋଲିସ ଅଧିକାରୀ ସାଦା ପୋଷାକରେ ରହିବେ ? କିଏ ୟୁନିଫର୍ମରେ ଡ୍ୟୁଟି କରିବେ, ଏହିଭଳି ଏକାଧିକ ପ୍ରଶ୍ନକୁ ସାମ୍ନା କରିଛନ୍ତି ପୋଲିସ ଅଧିକାରୀ ଅମିତାଭ ମହାପାତ୍ର। ତେବେ ଆଜିର ଜେରା ଅସମ୍ପୂର୍ଣ୍ଣ ରହିଛି। ଆସନ୍ତା ୨୪ ତାରିଖରେ ପୁଣି ଉଭୟ ପକ୍ଷ କୋର୍ଟରେ ହାଜର ହେବେ। 

ସୂଚନା ଥାଉକି, ୨୦୧୧ ଜାନୁୟାରୀ ୨୩ ତାରିଖରେ ନେତାଜୀ ଜୟନ୍ତୀ ଦିନ ନେତାଜୀଙ୍କ ଜନ୍ମସ୍ଥାନ ନିକଟରେ ଡ୍ୟୁଟିରେ ଥିବା ପୋଲିସ ଅଧିକାରୀ ଅମିତାଭ ମହାପାତ୍ରଙ୍କୁ ଭର୍ତ୍ତୃହରି ମହତାବ ଚାପୁଡ଼ା ମାରିଥିବାର ଅଭିଯୋଗ ହୋଇଥିଲା। ଯାହା ଉପରେ ଗତ ମାସ ୨୩ ତାରିଖ ଦିନ ଚାର୍ଜଫ୍ରେମ୍ ହୋଇଥିଲା। ଭାରତୀୟ ଦଣ୍ଡବିଦ୍ଧି ଆଇନ ୩୩୧,୩୩୨,୨୯୪,୩୨୩,୩୫୩ ଏବଂ ୫୦୬ ଅନୁସାରେ ଭର୍ତ୍ତୃହରିଙ୍କ ବିରୋଧରେ ଚାର୍ଜଫ୍ରେମ୍ ହୋଇଛି।