ନୂଆଦିଲ୍ଲୀ: ଆତ୍ମଘୋଷିତ ବାବା ଏବଂ ଦୁଷ୍କର୍ମକାରୀ ଗୁରମିତ ରାମ ରହିମ ସିଂହଙ୍କୁ ଆଶ୍ବସ୍ତି ମିଳିଛି । ଗୁରୁ ରବିଦାସ ଏବଂ ସନ୍ଥ କବୀର ଜୀଙ୍କ ଉପରେ ଆପତ୍ତିଜନକ ଟିପ୍ପଣୀ ମାମଲାରେ ହାଇକୋର୍ଟଙ୍କ ରାୟକୁ ସଠିକ ବୋଲି ଦର୍ଶାଇଛନ୍ତି ସୁପ୍ରିମକୋର୍ଟ । ଗୁରମିତଙ୍କ ବିରୋଧରେ ଦାୟର ହୋଇଥିବା ପଞ୍ଜାବ ସରକାରଙ୍କ ଆବେଦନ ସୁପ୍ରିମକୋର୍ଟ ଖାରଜ କରିଦେଇଛନ୍ତି । ୨୦୧୬ରେ ରାମ ରହିମ ନିଜର ଅନୁଗାମୀଙ୍କୁ ପ୍ରବଚନ ଦେଇଥିଲେ। ଏହା ପରେ ତାଙ୍କ ବିରୋଧରେ ଅଭିଯୋଗ ହୋଇଥିଲା ଯେ, ସେ ଗୁରୁ ରବିଦାସ ଏବଂ ସନ୍ତ କବୀର ଜୀଙ୍କ ଉପରେ ଆପତ୍ତିଜନକ ଟିପ୍ପଣୀ ଦେଇଥିଲେ । ଏହି ମାମଲା ହାଇକୋର୍ଟରେ ପହଞ୍ଚିଥିଲା । ଆଉ କୋର୍ଟ ଏଫଆଇଆର ରଦ୍ଦ କରିବାକୁ ନେଇ ରାୟ ଶୁଣାଇଥିଲେ ।
ଆତ୍ମଘୋଷିତ ବାବା ରାମ ରହିମଙ୍କୁ ଦୁଷ୍କର୍ମ ମାମଲାରେ ୨୦୧୭ରେ କୋର୍ଟ ଦଣ୍ଡାଦେଶ ଦେଇଥିଲେ । ଏହା ପରେ ନିଜ ଆଶ୍ରମରେ ଏକ କର୍ମଚାରୀଙ୍କ ହତ୍ୟା ମାମଲାରେ ୨୦୨୧ରେ ତାଙ୍କୁ ଆଜୀବନ ଜେଲ ହୋଇଥିଲା । ତାପରେ ସେ ଅନେକ ଥର ପାରୋଲରେ ଜେଲରୁ ବାହାରକୁ ଆସିଛନ୍ତି । ତାଙ୍କୁ ବାରମ୍ବାର ପରୋଲ ମିଳିବା ବିରୋଧରେ ପଞ୍ଜାବ ହରିୟାଣା କୋର୍ଟରେ ଆବେଦନ କରିଥିଲା ଶିରୋମଣୀ ଗୁରୁଦ୍ବାରା ପ୍ରବନ୍ଧକ କମିଟି । ଚଳିତ ବର୍ଷ ଫେବୃଆରିରେ କୋର୍ଟ ରାମ ରହିମଙ୍କୁ ଝଟକା ଦେଇଥିଲେ ।
କୋର୍ଟଙ୍କ ବିନା ଅନୁମତିରେ ଗୁରମିତଙ୍କୁ ପାରୋଲ ଦିଆଯିବ ନାହିଁ ବୋଲି କୋର୍ଟ କହିଥିଲେ । ଏହା ସହ ରାମ ରହିମଙ୍କ ଭଳି ଆଉ କାହାକୁ ଏଭଳି ପାରୋଲ୍ ମିଳିଛି ବୋଲି ପଞ୍ଜାବ ସରକାରଙ୍କୁ କୋର୍ଟ ପ୍ରଶ୍ନ ମଧ୍ୟ କରିଥିଲେ । ରାମ ରହିମଙ୍କୁ ପ୍ରଥମ ଥର ୨୪ ଅକ୍ଟୋବର ୨୦୨୦ରେ ପାରୋଲ ମିଳିଥିଲା । ଦ୍ବିତୀୟ ଥର ପାଇଁ ୨୧ ମେ ୨୦୨୧ରେ ପାରୋଲରେ ଜେଲରୁ ବାହାରକୁ ଆସିଥିଲେ ରାମ ରହିମ । ଏହା ପରେ ତାଙ୍କୁ ୭ ଫେବୃଆରୀ ୨୦୨୨, ଜୁନ୍ ୨୦୨୨ ଏବଂ ଅକ୍ଟୋବର ୨୦୨୨ରେ ପାରୋଲ ମିଳିଥିଲା । ଏହି କ୍ରମରେ ଦଶମ ଥର ପାଇଁ ୧୯ ଜାନୁଆରୀ ୨୦୨୪ରେ ପାରୋଲ ପାଇଥିଲେ ଗୁରମିତ ରାମ ରହିମ ।
