ଭୁବନେଶ୍ୱର,୨୯/୦୮: ବାର୍ଡ-ଫ୍ଲୁ ପାଇଁ ଚିକେନ୍ ଖାଇବାକୁ ଡରୁଛନ୍ତି ରାଜଧାନୀବାସୀ । ଚିକେନ୍ ବଦଳରେ ମାଛ ଓ ଖାସି ମାଂସ ବେପାର ଜମିଛି । ବୁଧବାର ଭୁବନେଶ୍ୱର ବଜାରରେ ଲୋକେ ମାଛ ଦୋକାନରେ ଭିଡ଼ ଜମାଇଥିବା ବେଳେ ଚିକେନ ଦୋକାନକୁ ଯାଉନଥିଲେ । ବାର୍ଡ-ଫ୍ଲୁ ବ୍ୟାପିବା ପୂର୍ବରୁ ଭୁବନେଶ୍ୱରକୁ ୧୫ରୁ ୨୦ଟି ପିକଅପ୍ରେ କୁକୁଡ଼ା ଆସୁଥିବା ବେଳେ ଆଜି ମାତ୍ର ୫ଟି ଗାଡ଼ି ଆସିଛି । ଚାହିଦା କମିଥିବାରୁ କୁକୁଡ଼ା ମାଂସ କିଲୋପ୍ରତି ୧୮୦ଟଙ୍କାରେ ବିକୁଥିଲେ ବେପାରୀ । କେତେକ ସ୍ଥାନରେ ଦର ୧୬୦ ଟଙ୍କା ମଧ୍ୟ ହୋଇଥିଲା । ଆଜି ମାଛ ବ୍ୟବସାୟ ବଢ଼ି ଯାଇଥିଲା । ପୂର୍ବରୁ ମାଛ ବ୍ୟବସାୟ କୋଟିଏ ଟଙ୍କାରେ ସୀମିତ ରହୁଥିଲା । ମାତ୍ର ଗୋଟିଏ ଦିନରେ ଆଜି ୧କୋଟି ୨ଲକ୍ଷ ୩୭ ହଜାର ଟଙ୍କାର ମାଛ ଓ ୭୮ ଲକ୍ଷ ୭୫ହଜାର ଟଙ୍କାର ଖାସି ମାଂସ ବେପାର ହୋଇଥିବା ଆମିଷ ବ୍ୟବସାୟୀ ସଂଘ ପକ୍ଷରୁ ସୂଚନା ମିଳିଛି ।
ଗତ ସପ୍ତାହେ ହେବ ପୁରୀ ଜିଲ୍ଲାର ସତ୍ୟବାଦୀ ଓ ପିପିଲି ବ୍ଲକରେ ବାର୍ଡ ଫ୍ଲୁ ଦେଖାଦେଇଛି । ସଂକ୍ରମିତ ଅଞ୍ଚଳରେ କୁକୁଡ଼ା ମରା ଅଭିଯାନ ଚାଲିଛି । ଏଭଳି ସମୟରେ ପିପିଲିରୁ ରାଜଧାନୀକୁ ଆସୁଥିବା ଚିକେନ୍ ଉପରେ ରୋକ ଲଗାଇଛନ୍ତି ବ୍ୟବସାୟୀ ସଂଘ । ପୂର୍ବରୁ ରାଜଧାନୀରେ ଚିକେନ୍ ବ୍ୟବସାୟ ଭଲ ହେଉଥିଲା । ପ୍ରତିଦିନ ଗୋଟିଏ ଲେଖାଏଁ ପିକ୍ଅପରେ ୧୫ କୁଇଣ୍ଟାଲ ମାଂସ ଆସୁଥିଲା । ସେହି ଅନୁସାରେ ୧୦୦ରୁ ୧୨୦ କୁଇଣ୍ଟାଲ କୁକୁଡ଼ା ମାଂସ ବେପାର ହେଉଥିଲା । ବାର୍ଡ-ଫ୍ଲୁ ପାଇଁ ଚିକେନ ବ୍ୟବସାୟ ପ୍ରଭାବିତ ହୋଇଛି । ବୁଧବାର ଆମିଷ ବଜାରକୁ ମାତ୍ର ୮ଟି ମାଛ ଗାଡ଼ି ଆସିଥିଲା । ଗୋଟିଏ ଗାଡ଼ିରେ ୨୫୦ ଟ୍ରେ ଭର୍ତ୍ତି ମାଛ ରହିଥିଲା । ସେହିପରି ୧୦,୫୦୦ କେଜି ଖାସି ମାଂସ ବିକ୍ରି ହୋଇଛି । ଆଗାମୀ ଦିନରେ ମାଛ ଓ ଖାସି ମାଂସ ବେପାର ଆହୁରି ବୃଦ୍ଧି ପାଇବ ବୋଲି ସଂଘ ସଭାପକି ଶେଖ୍ ମୁନ୍ତାକିମ୍ ବକ୍ସ କହିଛନ୍ତି । ଅପରପକ୍ଷେ ବିଭିନ୍ନ ଫାଷ୍ଟଫୁଡ୍ ଦୋକାନ ଓ ହୋଟେଲ୍ରେ ବିରିୟାନି, ଚିକେନ ପକୋଡ଼ା, ଲଲିପପ, ତନ୍ଦୁରି, ରୋଲ ଓ ସୁପ୍ ବିକ୍ରି ମାନ୍ଦା ହୋଇଛି ।
