କେନ୍ଦ୍ରାପଡ଼ା,୦୮/୦୯: କେନ୍ଦ୍ରାପଡ଼ା ଜିଲ୍ଲାରେ  ବାର୍ଡ ଫ୍ଲୁ ପଜିଟିଭ୍‌ ଚିହ୍ନଟ ହୋଇଛି । ମଧ୍ୟପ୍ରଦେଶ  ଭୋପାଳକୁ ପରୀକ୍ଷା ପାଇଁ ଯାଇଥିବା ସ୍ୱାବ୍‌ ନମୁନା ରିପୋର୍ଟ ମିଳିବା ପରେ ପ୍ରାଣୀ ସମ୍ପଦ ବିଭାଗ  ଏହା ସ୍ପଷ୍ଟ କରିଛି । ଡେରାବିଶ ବ୍ଲକ୍‌ର ବାଲିଆ  ଓ ଏଣ୍ଡର ପଞ୍ଚାୟତରୁ ଯାଇଥିବା କୁକୁଡ଼ାଙ୍କ ସ୍ୱାବ୍‌ ରିପୋର୍ଟରେ ଭୂତାଣୁ ମିଳିଥିବା ବିଭାଗୀୟ କର୍ତ୍ତୃପକ୍ଷ ସୂଚନା ଦେଇଛନ୍ତି । ଯାହାକୁ ନେଇ  ଏବେ ଡେରାବିଶ ଓ କେନ୍ଦ୍ରାପଡ଼ା ଅଞ୍ଚଳରେ  ଆତଙ୍କ ଖେଳିଯାଇଛି । କେନ୍ଦ୍ରାପଡ଼ା ଜିଲ୍ଲା  ମୁଖ୍ୟ ପ୍ରାଣୀଧନ ଚିକିତ୍ସାଧିକାରୀ(ସିଡିଭିଓ)  ଡା. ସୁବ୍ରତ ମହାପାତ୍ର କହିଛନ୍ତି, ବାଲିଆ ଓ  ଏଣ୍ଡରରୁ ମିଳିଥିବା କୁକୁଡ଼ାଙ୍କ ସ୍ୱାବ୍‌ ରିପୋର୍ଟ  ପଜିଟିଭ୍‌ ଆସିଛି । ରିପୋର୍ଟ  ଆମର  ହସ୍ତଗତ ହେବା ପରେ ବିଭାଗ ତରଫରୁ  ଆବଶ୍ୟକ ସତର୍କତାମୂଳକ ପଦକ୍ଷେପ  ଗ୍ରହଣ କରାଯାଉଛି ।  

ପ୍ରଥମେ ଜିଲ୍ଲାର ଡେରାବିଶ ବ୍ଲକ୍‌ ଅଧୀନ  ନରସିଂହପୁର ପଞ୍ଚାୟତର ବାଇକିଆ ପଡ଼ିଆରେ ସେପ୍ଟେମ୍ବର ମାସ ୧ ତାରିଖରେ ଶହ ଶହ ମଲା କୁକୁଡ଼ା ବିକ୍ଷିପ୍ତ ହୋଇ ବିଭିନ୍ନ ସ୍ଥାନରେ ପଡ଼ିଥିବା  ଦେଖିବାକୁ ମିଳିଥିଲା । ମଲା କୁକୁଡ଼ା ଭର୍ତ୍ତି  ବସ୍ତା ପାଖ କେନାଲ ପାଣିରେ ମଧ୍ୟ ଭାସୁଥିବା ନଜରକୁ ଆସିଥିଲା । ପରେ ବ୍ଲକ୍‌ର ଏଣ୍ଡର,  ବାଲିଆ, ଗୋଲରାହାଟ ଓ ଲକ୍ଷ୍ମୀନାରାୟଣପୁର  ପଞ୍ଚାୟତକୁ ବାର୍ଡ ଫ୍ଲୁ ଡେଇଁଥିଲା । ଏହି ୫ ପଞ୍ଚାୟତରେ ଏବେ ମଧ୍ୟ କୁକୁଡ଼ା ମଡ଼କ ଲାଗିରହିଛି । ପରେ ପ୍ରାଣୀ ସମ୍ପଦ ବିଭାଗ  ତରଫରୁ କୁକୁଡ଼ାଗୁଡ଼ିକୁ ପୋତି ଦିଆଯିବା ସହ ପାଖଆଖ ଫାର୍ମରେ ଥିବା କୁକୁଡ଼ାମାନଙ୍କର ମଳ  ଓ ଲାଳ ନମୁନା ସଂଗ୍ରହ କରାଯାଇ ପରୀକ୍ଷା ପାଇଁ  ପଠାଯାଇଥିଲା । ସେହିପରି ଭିତରକନିକାରୁ  ମଧ୍ୟ ପକ୍ଷୀଙ୍କ ସ୍ୱାବ୍‌ ପରୀକ୍ଷା ପାଇଁ ଯାଇଥିଲା ।  ଫୁଲନଖରାସ୍ଥିତ ପ୍ରାଣୀସମ୍ପଦ ପରୀକ୍ଷାଗାରକୁ  ଏସବୁ ନମୁନା ପଠାଯାଇଥିଲା ଓ ସେଠାରୁ  ଭୋପାଳକୁ ପରୀକ୍ଷା ପାଇଁ ଯାଇଥିଲା । ଏକାଧିକ  ଟିମ୍‌ ଡେରାବିଶ ବ୍ଲକ୍‌ରେ ଥିବା ଫାର୍ମ ବୁଲି ଯାଞ୍ଚ୍‌  କରିବା ସହ ଚାଷୀଙ୍କୁ ସଚେତନ କରିଥିଲେ । ଯେହେତୁ ସଂକ୍ରମିତ ୫ ପଞ୍ଚାୟତ ସମେତ  ଆଖପାଖର ପ୍ରାୟ ୨୫ରୁ ଅଧିକ ଫାର୍ମର  କୁକୁଡ଼ା କେନ୍ଦ୍ରାପଡ଼ା ସମେତ ପଡ଼ୋଶୀ କଟକ  ଓ ଯାଜପୁର ଜିଲ୍ଲାକୁ ଚାଲାଣ କରାଯାଉଥିଲା,  ଯୋଗାଣ ହେଉଥିବା କୁକୁଡ଼ା ସଂକ୍ରମିତ ଅବା ଅଣସଂକ୍ରମିତ ଅଞ୍ଚଳରୁ ଆସିଛି ଜାଣିବାର  ଉପାୟ ନଥିଲା, ସେହେତୁ ଶାସନ ତରଫରୁ  ଏ ଦିଗରେ କଡ଼ାକଡ଼ି ଯାଞ୍ଚ୍‌ କରାଯିବାରୁ ଦାବି ଉଠିଥିଲା । ତଥାପି ସଂକ୍ରମିତ ଅଞ୍ଚଳରୁ ଚାଲାଣ  ହେଉଥିବା କୁକୁଡ଼ା ଉପରେ କୌଣସି ରୋକ୍‌  ରହିନଥିଲା । 

ଗତ ସପ୍ତାହକ ମଧ୍ୟରେ ଏଠାରେ  ପ୍ରାୟ ୫ ହଜାରରୁ ଊଦ୍ଧ୍ୱର୍ କୁକୁଡ଼ାଙ୍କର ମୃତ୍ୟୁ ହୋଇସାରିଲାଣି । ଅନ୍ୟପକ୍ଷେ ଚାଷୀଙ୍କ  ହାତରେ ଗ୍ରାହକଙ୍କୁ ସିଧାସଳଖ ବିକ୍ରି କରିବା ବ୍ୟବସ୍ଥା ନାହିଁ ।  କମ୍ପାନୀ ତରଫରୁ ଚାଷୀଙ୍କୁ କୁକୁଡ଼ା ଚିଆଁ, ଦାନା, ଔଷଧ ଆଦି  ଯୋଗାଇ ଦିଆଯାଉଥିବା ବେଳେ ଚାଷୀ କେବଳ ବିଜୁଳି ବିଲ୍‌,  ଚଷୁ ଦେଉଛନ୍ତି । କୁକୁଡ଼ା ବଢ଼ିଲା ପରେ ଚାଲାଣ ଦାୟିତ୍ୱ କମ୍ପାନୀ  ହାତରେ ରହିଛି । ତେଣୁ କମ୍ପାନୀ କେଉଁଆଡ଼କୁ କୁକୁଡ଼ା ଚାଲାଣ  କଲା ସେ ବାବଦରେ ଜାଣିବାକୁ ଚାଷୀ ପାଖରେ ସୁଯୋଗ ନାହିଁ ।