ଝାରସୁଗୁଡ଼ା,୧୮/୦୫ : ପୂର୍ବତନ ମନ୍ତ୍ରୀ ସ୍ୱର୍ଗତ ନବ କିଶୋର ଦାସଙ୍କ ପୁଅ ବିଶାଳ  ଦାସଙ୍କୁ ଆୟକର ବିଭାଗ ପକ୍ଷରୁ ସହରର ଏକ ତାରକା ହୋଟେଲରେ ପଚରାଉଚରା  କରିବା ପରେ ଛାଡ଼ି ଦିଆଯାଇଛି । ସେହିପରି କୋଲାବିରା ଓ ଅର୍ଡାରେ ଥିବା ବିଶାଳଙ୍କ ସହଯୋଗୀଙ୍କ ଘରେ ଚଢ଼ଉ ଜାରି ରହିଛି । ବିଶାଳ ଦାସଙ୍କ ଅନ୍ୟ ଜଣେ ସହଯୋଗୀଙ୍କୁ ଆଶିଷ ଦାସଙ୍କ କୋଲାବିରା ଘରେ ରେଡ୍‌ କରାଯାଇଛି। ୨ ଜଣିଆ ଆୟକର ଟିମ ପକ୍ଷରୁ ଖୋଳତାଡ଼ ଜାରି ରହିଛି।

ସୂଚନା ମୁତାବକ, ଶୁକ୍ରବାର ଭୁବନେଶ୍ୱରରୁ ଆସିଥିବା ଏହି ଟିମ୍‌ ସଦସ୍ୟମାନେ ଝାରସୁଗୁଡ଼ା ସରବାହାଲ ସ୍ଥିତ  ବିଶାଳ ଦାସଙ୍କ ବାସଭବନକୁ ଅପରାହ୍ଣରେ ଯାଇଥିଲେ । ମାତ୍ର ଶ୍ରୀ ଦାସ ସେତେବେଳେ ଏକ ହୋଟେଲରେ ଥିବାରୁ ସେଠାରୁ ତାଙ୍କୁ ନେଇଥିଲେ । ପ୍ରାୟ ୪ ଘଣ୍ଟା ଧରି ପଚରାଉଚରା ପରେ ତାଙ୍କୁ ଛାଡ଼ି ଦିଆଯାଇଛି । ହେଲେ ଏହି ଚଢ଼ଉର ଉଦ୍ଦେଶ୍ୟ ଏବଂ  ଚଢ଼ଉରେ କ'ଣ ସବୁ ଜବତ ହୋଇଛି ସେ ସଂପର୍କରେ ସବିଶେଷ ତଥ୍ୟ ଜଣାପଡ଼ିନାହିଁ ।  ଏହି ଚଢ଼ଉ ଘଟଣାକୁ ନେଇ ସମଗ୍ର ଅଞ୍ଚଳରେ ଭିନ୍ନଭିନ୍ନ ଚର୍ଚ୍ଚା ହେଉଥିବା ବେଳେ  ସନ୍ଧ୍ୟାରେ ସ୍ୱାଭାବିକ ଭାବେ ବିଜେଡି ପ୍ରାର୍ଥୀ ଦୀପାଳି ଦାସ (ବିଶାଳ ଦାସଙ୍କ ଭଉଣୀ)  ନିର୍ବାଚନ ପ୍ରଚାର କରୁଥିବା ଦେଖାଯାଇଛି । ଆଗକୁ ନିର୍ବାଚନ ଉପରେ ଏହି ଚଢ଼ଉ  ଘଟଣାର କିଭଳି ପ୍ରଭାବ ପଡ଼ୁଛି ଏବଂ ଲୋକେ ଏହାକୁ କିଭଳି ଗ୍ରହଣ କରୁଛନ୍ତି ତାହାରି  ଉପରେ ସଭିଙ୍କ ନଜର ରହିଛି । ଦିନ ପରେ ମତଦାନ । ଏଭଳି ସମୟରେ ଝାରସୁଗୁଡ଼ାରେ ରାଜନୈତିକ ବ୍ୟକ୍ତିଙ୍କୁ  କେନ୍ଦ୍ର କରି ଆୟକର ବିଭାଗର ଚଢ଼ଉ ରାଜନୈତିକ ମାହୋଲକୁ ସରଗରମ କରିଛି ।