ନୂଆଦିଲ୍ଲୀ: ଲୋକସଭା ନିର୍ବାଚନ ୨୦୨୪ ପାଇଁ ଷଷ୍ଠ ପ୍ରାର୍ଥୀ ତାଲିକା ଘୋଷଣା କରିଛି ଭାରତୀୟ ଜନତା ପାର୍ଟି (ବିଜେପି) । ମଙ୍ଗଳବାର ୩ ଜଣିଆ ପ୍ରାର୍ଥୀ ତାଲିକା ଘୋଷଣା କରିଛି ଦଳ । ରାଜସ୍ଥାନର କରୌଲି ଢ଼ୋଲପୁର ଲୋକସଭା ଆସନ ଲାଗି ଇନ୍ଦୁ ଦେବୀ ଜାଟବଙ୍କୁ ବିଜେପି ପ୍ରାର୍ଥୀ କରାଇଥିବା ବେଳେ ଦୌସାରୁ କହ୍ନେୟାଲାଲ ମୀନାଙ୍କୁ ଟିକଟ ମିଳିଛି । ସେହିଭଳି ମଣିପୁରରେ ଇନର ମଣିପୁର ସିଟରୁ ବିଜେପି ବସନ୍ତ କୁମାର ସିଂହଙ୍କୁ ପ୍ରାର୍ଥୀ କରାଇଛି ବିଜେପି । 

 କରୌଲି ଢ଼ୋଲପୁର ଆସନରୁ ମନୋଜ ରାଜୌରିଆଙ୍କ ଟିକଟ କାଟି ଇନ୍ଦୁ ଦେବୀ ଜାଟବଙ୍କୁ ପ୍ରାର୍ଥୀ କରାଇଛି ଦଳ । ଏହା ପୂର୍ବରୁ ବିଜେପି ମାର୍ଚ୍ଚ ୨୪ରେ ପଞ୍ଚମ ପ୍ରାର୍ଥୀ ତାଲିକା ଜାରି କରିଥିଲା । ତାଲିକାରେ ଉତ୍ତର ପ୍ରଦେଶ ଏବଂ ବିହାର ସମେତ ଅନ୍ୟ କେତେକ ରାଜ୍ୟର ପ୍ରାର୍ଥୀଙ୍କ ନାମ ଥିଲା । ଏହି ତାଲିକାରେ ଅଭିନେତ୍ରୀ କଙ୍ଗନା ରଣାଓ୍ବତଙ୍କ ନାମ ମଧ୍ୟ ସାମିଲ ଥିଲା । 

 ବିଜେପି କଙ୍ଗନାଙ୍କୁ ହିମାଚଳ ପ୍ରଦେଶ ମଣ୍ଡି ଆସନରୁ ପ୍ରାର୍ଥୀ କରାଇଛି । ସେପଟେ ବିଜେପି ମାର୍ଚ୍ଚ ୨୬ (ମଙ୍ଗଳବାର) ଗୁଜରାଟ, ହିମାଚଳ ପ୍ରଦେଶ, କର୍ଣ୍ଣାଟକ ଏବଂ ପଶ୍ଚିମବଙ୍ଗ ବିଧାନସଭା ଆସନରେ ହେବାକୁ ଥିବା ଉପନିର୍ବାଚନ ଲାଗି ପ୍ରାର୍ଥୀ ଘୋଷଣା କରିଛି । 

ବିଜେପି ପଶ୍ଚିମବଙ୍ଗର ଭଗବାନଗୋଲା ବିଧାନସଭା ଆସନ ଲାଗି ଭାଷ୍କର ସରକାର ଏବଂ ବାରାନଗରରୁ ସଜଲ ଘୋଷଙ୍କୁ ପ୍ରାର୍ଥୀ କରାଇଛି । ଏହା ସହ କର୍ଣ୍ଣାଟକର ଶୋରାପୁର ଆସନରୁ ନରସିଂହ ନାୟକଙ୍କ ନାମ ଉପରେ ବିଜେପି ମୋହର ମାରିଥିବା ବେଳେ ଗୁଜରାଟର ୫ ଏବଂ ହିମାଚର ୬ ବିଧାୟକ ପ୍ରାର୍ଥୀଙ୍କ ନାମ ତାଲିକା ପ୍ରକାଶ କରିଛି ।