କୃଷ୍ଣପ୍ରସାଦ,୦୪/୦୩: ଚିଲିକାରେ ପୁଣି ଫସିଲା ଯାତ୍ରୀବାହୀ ଡଙ୍ଗା। ସୋମବାର ସକାଳ ସାଢେ ୮ଟା ସମୟରେ ସାତପଡ଼ାରୁ ଯାତ୍ରୀଙ୍କୁ ନେଇ ଯାତ୍ରୀବାହୀ ଡ଼ଙ୍ଗାଟି ଜହ୍ନିକୁଦା ଅଭିମୁଖେ ଯାଉଥିବା ବେଳେ ମଝି ଚିଲିକାର ତାଟବାଡ଼ ନିକଟରେ ଯାନ୍ତ୍ରିକ ତ୍ରୁଟି ଯୋଗୁଁ ଯାତ୍ରୀବାହିୀ ଡ଼ଙ୍ଗାଟି ଅଟକି ରହିଥିଲା। ଫଳରେ ଅସହ୍ୟ ଗୁଳୁଗୁଳି ଯୋଗୁଁ ସେଥିରେ ଥିବା ଯାତ୍ରୀମାନେ ଭୟଭୀତ ହୋଇପଡିଛନ୍ତି। ସେଥିରେ ୧୫ଟି ବାଇକ ସହ ୩୦ ଯାତ୍ରୀ ଥିବା ଜଣାପଡିଛି।
ଚିଲିକାରେ ଡ଼ଙ୍ଗା ମେସିନ ତ୍ରୁଟି ଯୋଗୁଁ ଅନେକ ସମୟରେ ଏଭଳି ସମସ୍ୟା ଦେଖାଦେଉଥିବା ବେଳେ ଦୈନଦିନ ଏହି ରାସ୍ତା ଦେଇ ଯାତାୟତ କରୁଥିବା ଅଞ୍ଚଳବାସୀ ଓ ପର୍ଯ୍ୟଟକମାନେ ଏଭଳି ସମ୍ମୁଖୀନ ହେଉଥିବାରୁ କ୍ଷୋଭ ପ୍ରକାଶ କରିଛନ୍ତି । ଦୀର୍ଘ ଏକଘଣ୍ଟା ପରେ ଅନ୍ୟ ଏକ ଡ଼ଙ୍ଗା ଆସି ଡ଼ଙ୍ଗାକୁ କୂଳକୁ ନେବା ପରେ ସେଥିରେ ଥିବା ଯାତ୍ରୀମାନେ ସୁରକ୍ଷିତ ଥିବା ଜଣାପଡିଛି। ଚିଲିକାରେ ଏଭଳି ବାରମ୍ବାର ଅଘଟଣ ଘଟୁଥିଲେ ସୁଧା ଏ ଦିଗରେ ଜିଲ୍ଲା ପ୍ରଶାସନ ଦୃଷ୍ଟି ଦେବାକୁ ଅଞ୍ଚଳବାସୀ ଦାବି କରିଛନ୍ତି।