ପୁରୀ, ୪।୯: ବ୍ରାହ୍ମଣଙ୍କୁ ବାଇଶି ପାହାଚରେ ଶ୍ରାଦ୍ଧ କରିବାକୁ ସମ୍ପୂର୍ଣ୍ଣ କଟକଣା ଲଗାଯିବା ପରେ ଏବେ ପରିକ୍ରମା ମାର୍ଗରୁ ବି ସେମାନଙ୍କୁ ତଡ଼ିବାକୁ ଶ୍ରୀମନ୍ଦିର ପ୍ରଶାସନ ନିଷ୍ପତ୍ତି ନେଇଛି । ଶ୍ରାଦ୍ଧ କାର୍ଯ୍ୟ ସମ୍ପାଦନ କରୁଥିବା ବ୍ରାହ୍ମଣମାନଙ୍କୁ ଶ୍ରୀମନ୍ଦିର ପରିକ୍ରମା ପ୍ରକଳ୍ପ ମଧ୍ୟରେ ବସିବା ପାଇଁ ଅନୁମତି ଦିଆଯିବ ନାହିଁ । ସେମାନେ ମାର୍କଣ୍ଡ ପୁଷ୍କରିଣୀ କିମ୍ବା ଶ୍ୱେତଗଙ୍ଗା ପୁଷ୍କରିଣୀ ନିକଟରେ ଶ୍ରାଦ୍ଧ କାର୍ଯ୍ୟ ସମ୍ପାଦନ କରିବେ ବୋଲି ପରିଚାଳନା କମିଟି ନିଷ୍ପତ୍ତି ନେଇଛି । ଦୁଇଦିନ ତଳେ ବସିଥିବା ପରିଚାଳନା କମିଟିର ଏହି ନିଷ୍ପତ୍ତି ଜାଣିବା ପରେ ପରିକ୍ରମା ମାର୍ଗରେ ବସି ଶ୍ରଦ୍ଧାଳୁଙ୍କ ପିତୃପୁରୁଷଙ୍କ ଉଦ୍ଧାର ନିମନ୍ତେ ପିଣ୍ଡଦାନ କରି ଗୁଜୁରାଣ ମେଣ୍ଟାଉଥିବା ବ୍ରହ୍ମଣମାନେ ଦୁଃଖ ପ୍ରକାଶ କରିଛନ୍ତି । 

ଦେଶର ୪ ଧାମ ମଧ୍ୟରେ ଶ୍ରୀକ୍ଷେତ୍ର ପ୍ରସିଦ୍ଧ । ଶ୍ରୀମନ୍ଦିର କଳ୍ପବଟଠାରୁ ତୀର୍ଥରାଜ ମହୋଦଧି ପର୍ଯ୍ୟନ୍ତ ପ୍ରତିଟି ରେଣୁରେ ମୁକ୍ତି ପ୍ରଦାନକାରୀ ଶକ୍ତି ରହିଛି । ଶ୍ରୀମନ୍ଦିର ଭିତରେ ଥିବା ରୋହିଣୀ କୁଣ୍ଡ, ବାହାରେ ଥିବା ମାର୍କଣ୍ଡେୟ, ଇନ୍ଦ୍ରଦ୍ୟୁମ୍ନ, ଶ୍ୱେତଗଙ୍ଗା, ମହୋଦଧି ପବିତ୍ର ତୀର୍ଥ ଭାବେ ବେଶ ଜଣାଶୁଣା । କାହିଁ କେଉଁ ଅନାଦି ସମୟରୁ ଶ୍ରୀମନ୍ଦିର ନିକଟ କିମ୍ବା ତୀର୍ଥ ସ୍ଥଳ ନିକଟରେ ଶ୍ରଦ୍ଧାଳୁମାନେ ପିତୃପୁରୁଷଙ୍କୁ ଶ୍ରାଦ୍ଧ ଦେବା ସହ ମହାପ୍ରସାଦ ଦେଇ ବ୍ରାହ୍ମଣଙ୍କୁ ସନ୍ତୁଷ୍ଟ କରି ଆସୁଛନ୍ତି । ମାତ୍ର ସେମାନଙ୍କୁ ବିରୋଧ କରାଯିବା ଶ୍ରାଦ୍ଧ କାର୍ଯ୍ୟ ସମ୍ପାଦନ କରି ପରିବାର ପ୍ରତିପୋଷଣ କରୁଥିବା ବ୍ରାହ୍ମଣଙ୍କ ଭିତରେ ଅସନ୍ତୋଷ ସୃଷ୍ଟି କରିଛି ।