ଭୁବନେଶ୍ୱର,୩୦/୦୩: ନିର୍ବାଚନ ପାଇଁ ଭଡ଼ାସୂତ୍ରରେ ଲାଗୁଥିବା ବସ୍ର ଦର ବଢ଼ାଇଛନ୍ତି ସରକାର । ନିର୍ବାଚନ କାର୍ଯ୍ୟରେ ୨୦ ସିଟ୍ ବିଶିଷ୍ଟ ବସ୍ ଲାଗିଲେ ଦିନକୁ ୨୦୦ ଟଙ୍କା ଅଧିକ ଭଡ଼ା ମିଳିବ । ୨୧ରୁ ୩୧ ସିଟ୍ ଥିବା ବସ୍ ଭଡ଼ା ଦୈନିକ ୨୫୦ ଟଙ୍କା, ୩୨ରୁ ୪୦ ସିଟ୍ ବିଶିଷ୍ଟ ବସ୍ ପାଇଁ ୩୫୦ ଟଙ୍କା, ୪୦ରୁ ଅଧିକ ବସ୍ ପାଇଁ ୪୦୦ ଟଙ୍କା ଭଡ଼ା ବଢ଼ାଯାଇଛି । ପରିବହନ ବିଭାଗ ପକ୍ଷରୁ ପ୍ରକାଶିତ ବିଜ୍ଞପ୍ତି ଅନୁସାରେ ଏହି ନୂଆ ଦର ଲାଗୁ ହୋଇଛି ।
୨୦୨୩ ସେପ୍ଟେମ୍ବର ପହିଲାରେ ନିର୍ବାଚନ କାର୍ଯ୍ୟରେ ଲାଗୁଥିବା ଗାଡି଼ର ଦର ବଢ଼ାଯାଇଥିଲା । ୨୦ ସିଟ୍ ବିଶିଷ୍ଟ ବସ୍ ଦୈନିକ ୨,୧୫୦ ଟଙ୍କା ପାଉଥିବା ବେଳେ ଚଳିତ ନିର୍ବାଚନରେ ୨,୩୫୦ ଟଙ୍କା ପାଇବ । ସେହିପରି ୨୧ରୁ ୩୧ ସିଟ୍ ଥିବା ବସ୍ ୨,୭୦୦ ଟଙ୍କା ବଦଳରେ ୨,୯୫୦ ଟଙ୍କା, ୩୨ରୁ ୪୦ ସିଟ୍ ଥିବା ବସ୍ ୩,୫୦୦ ଟଙ୍କା ବଦଳରେ ୩,୮୫୦ ଟଙ୍କା, ୪୦ରୁ ଅଧିକ ବସ୍ ପାଇଁ ୪,୮୦୦ ଟଙ୍କା ମିଳିବ । କିନ୍ତୁ ୧୦ ଚକିଆ ଟ୍ରକ ପୂର୍ବ ନିର୍ଦ୍ଧାରିତ ଦର ଅନୁସାରେ ଦୈନିକ ୩,୦୦୦ ଟଙ୍କା, ୧୨,୦୦୦ କେଜିରୁ ୧୮,୫୦୦ କେଜି ମାଲ ବୋହୁଥିବା ଟ୍ରକ ୨,୬୦୦ ଟଙ୍କା, ମିନି ଟ୍ରକ ୧,୬୦୦ ଟଙ୍କା, ୪ ଚକିଆ ମାଲ୍ବାହୀ ଗାଡି଼କୁ ୧,୦୦୦ ଟଙ୍କା ମିଳିବ ।
ନିର୍ବାଚନୀ କାର୍ଯ୍ୟରେ ଟ୍ରାକ୍ଟର ବ୍ୟବହାର ହେଲେ ଦୈନିକ ୧,୧୫୦ ଟଙ୍କା, ବାଇକ୍ ପାଇଁ ୪୦୦ ଟଙ୍କା ମିଳିବ । ଯଦି କୌଣସି ଗାଡି ଗୋଟିଏ ଦିନରେ ୧୨ ଘଣ୍ଟାରୁ ଅଧିକ ସମୟ ପାଇଁ ନିୟୋଜିତ ହେବ ଉକ୍ତ ଗାଡି଼କୁ ଦିନିକିଆ ହିସାବରେ ଭଡ଼ା ମିଳିବ । ୧୨ ଘଣ୍ଟାରୁ କମ୍ ସମୟ ନିୟୋଜିତ ଗାଡି଼ ମାଲିକଙ୍କୁ ଅଧା ଦିନର ଭଡ଼ା ଦିଆଯିବାକୁ ସରକାର ନିଷ୍ପତ୍ତି ନେଇଛନ୍ତି ।