ନୂଆଦିଲ୍ଲୀ,୨୯/୦୮: ଦେଶର ୨୩୪ ନୂଆ ସହରରେ ଘରୋଇ ଏଫ୍‌ଏମ୍‌ ରେଡିଓ ଆରମ୍ଭ କରିବାକୁ କେନ୍ଦ୍ର ସରକାର ଅନୁମୋଦନ ପ୍ରଦାନ କରିଛନ୍ତି । ମାତୃଭାଷାରେ ସ୍ଥାନୀୟ ବିଷୟର ପ୍ରସାରଣ ଏବଂ ନୂତନ ନିଯୁକ୍ତି ସୃଷ୍ଟିକୁ ଏହା ପ୍ରୋତ୍ସାହିତ କରିବ ବୋଲି ସରକାର ଆଶାବାଦୀ ରହିଛନ୍ତି । ଏହି କ୍ଷେତ୍ର ଗୁଡିକ ମଧ୍ୟରେ ଆକାଂକ୍ଷୀ, ସୀମାବର୍ତ୍ତୀ ଅଞ୍ଚଳ ଏବଂ ନସ୍କଲ ପ୍ରଭାବିତ ଅଞ୍ଚଳ ରହିଛନ୍ତି । ଏହି ସବୁ ସ୍ଥାନଗୁଡିକରେ ମୋଟ ୭୩୦ଟି ଚ୍ୟାନେଲ ପାଇଁ ତୃତୀୟ ବ୍ୟାଚ୍‌ ଇ-ନିଲାମ ପ୍ରସ୍ତାବକୁ ଅନୁମୋଦନ ମିଳିଛି । ଜିଏସ୍‌ଟିକୁ ବାଦ ଦେଇ ଏଫ୍‌ଏମ୍‌ ଚ୍ୟାନେଲର ବାର୍ଷିକ ଲାଇସେନ୍ସ ଶୁଳ୍କ ମୋଟ ରାଜସ୍ୱର ୪% ଆଦାୟ  କରିବାକୁ ମଧ୍ୟ ପ୍ରସ୍ତାବ ରହିଛି । ଏହା ଦ୍ୱାରା ଏଫ୍‌ଏମ୍‌ ଚାହିଦା ପୂରଣ, ଭାଷା ସଂସ୍କୃତିକୁ ପ୍ରୋତ୍ସାହନ ଏବଂ ଲୋକାଲ ଫର୍‌ ଭୋକାଲ ତ୍ୱରାନ୍ୱିତ ହେବ ବୋଲି ସରକାର ଆଶା ରଖିଛନ୍ତି ।