ନୂଆଦିଲ୍ଲୀ: ନିର୍ବାଚନ ବଣ୍ଡ ଯୋଜନାରେ ସର୍ବାଧିକ ଦାନ କରିଥିବା ବ୍ୟକ୍ତିଙ୍କ ତାଲିକାରେ ଦ୍ୱିତୀୟ ସ୍ଥାନରେ ରହିଥିବା ମେଗା ଇଞ୍ଜିନିୟରିଂ ଆଣ୍ଡ ଇନଫ୍ରାଷ୍ଟ୍ରକଚର ଲିମିଟେଡର ଅଧିକାରୀ ମାନଙ୍କ ଉପରେ ଦୁର୍ନୀତି ଅଭିଯୋଗ ହୋଇଛି । କେନ୍ଦ୍ରୀୟ ଅନୁସନ୍ଧାନ ଏଜେନ୍ସି ସିବିଆଇ ପକ୍ଷରୁ ଏହି ଅଧିକାରୀଙ୍କ ବିରୋଧରେ ଦୁର୍ନୀତି ମାମଲା ରୁଜୁ ହୋଇଛି। ନିର୍ବାଚନ ବଣ୍ଡ ମାଧ୍ୟମରେ ରାଜନୈତିକ ଦଳମାନଙ୍କୁ ଏହି କମ୍ପାନୀ ପକ୍ଷରୁ ୧୨ ଶହ କୋଟି ଟଙ୍କା ଦାନ କରାଯାଇଥିଲା ।
ସିବିଆଇ NISP ପାଇଁ ୩୧୫ କୋଟି ମୂଲ୍ୟର ଏକ ପ୍ରକଳ୍ପ କାର୍ଯ୍ୟକାରୀ କରିବା ପାଇଁ ଦୁର୍ନୀତି ଅଭିଯୋଗରେ କାର୍ଯ୍ୟାନୁଷ୍ଠାନ ଗ୍ରହଣ କରିଛି । ସିବିଆଇ ଇସ୍ପାତ ମନ୍ତ୍ରଣାଳୟର NMDC ଆଇରନ୍ ଏଣ୍ଡ୍ ଷ୍ଟିଲ ପ୍ଲାଣ୍ଟର ୮ ଜଣ ଅଧିକାରୀଙ୍କ ସମେତ ମେଘା ଇଞ୍ଜିନିୟରିଂ ଆଣ୍ଡ ଇନଫ୍ରାଷ୍ଟ୍ରକଚର ଲିମିଟେଡ୍ ବିରୋଧରେ ଏହି ମାମଲା ପଞ୍ଜିକରଣ କରିଛି।
ନିକଟରେ ମେଘା ଇଞ୍ଜିନିୟରିଂ ଏଣ୍ଡ ଇନଫ୍ରାଷ୍ଟ୍ରକଚର ଲିମିଟେଡ୍ ନିର୍ବାଚନ ବଣ୍ଡ ସହ ଜଡିତ ତଥ୍ୟ ବାହାରିବା ପରେ ଚର୍ଚ୍ଚାକୁ ଆସିଥିଲା । ରାଜନୈତିକ ଦଳମାନଙ୍କୁ ଦାନ ତାଲିକାର ଶ୍ରେଷ୍ଠ ୧୦ ତାଲିକାରେ ଏହି କମ୍ପାନୀ ଦ୍ୱିତୀୟ ବୃହତ୍ତମ କ୍ରେତା ଭାବରେ ଉଭା ହୋଇଥିଲା ।
ସୂଚନାଯୋଗ୍ୟ ଯେ ସୁପ୍ରିମକୋର୍ଟ ଫେବୃଆରୀ ମାସରେ ଏକ ଐତିହାସିକ ନିଷ୍ପତ୍ତି ଦେଇଥିବା ବେଳେ ରାଜନୈତିକ ଦଳମାନଙ୍କୁ ଦାନ ପାଇଁ ନିର୍ବାଚନ ବଣ୍ଡ ଯୋଜନା ବାତିଲ କରିଦେଇଛନ୍ତି । ସୁପ୍ରିମକୋର୍ଟଙ୍କ ନିର୍ଦ୍ଦେଶ ପରେ ଏହି ଯୋଜନା ସହ ଜଡିତ ସମ୍ପୂର୍ଣ୍ଣ ତଥ୍ୟ ଏସବିଆଇ ଦ୍ୱାରା ଭାରତର ନିର୍ବାଚନ ଆୟୋଗଙ୍କୁ ହସ୍ତାନ୍ତର କରାଯାଇଛି । ଏହା ପରେ ECI ଏହାକୁ ସର୍ବସାଧାରଣରେ ନିର୍ବାଚନ ଆୟୋଗର ୱେବସାଇଟରେ ଅପଲୋଡ୍ କରିଥିଲେ । ଏହାକୁ ନେଇ ବିରୋଧୀ ଦଳ ମାନେ ବିଜେପିକୁ ଘେରିଥିଲେ ।