ମୁମ୍ବାଇ,୦୮/୮:  ପ୍ୟାରିସ୍ ୨୦୨୪ ଅଲିମ୍ପିକ୍ସରୁ ଭାରତୀୟ ମହିଳା ରେସଲର ଭିନେଶ ଫୋଗାଟଙ୍କୁ ଅଯୋଗ୍ୟ ଘୋଷିତ ପରେ ସେ ଅବସର ଘୋଷଣା କରିଛନ୍ତି କୁସ୍ତିରୁ । ଏହି ସମୟରେ ତାଙ୍କ ସମର୍ଥନରେ ବଲିଉଡର ଅନେକ ସେଲିବ୍ରିଟି ଆଗେଇ ଆସିଛନ୍ତି। ଭିନେଶ ଫୋଗାଟଙ୍କ ଅବସର ଘୋଷଣା ପରେ ବଲିଉଡ ତାରକା ଅନୁଷ୍କା ଶର୍ମା, କଙ୍ଗନା ରାଣାୱତ, କରଣ ଜୋହର, ମଲାଇକା ଆରୋରା, ଆଲିଆ ଭଟ୍ଟଙ୍କ ସମେତ ଅନେକ ସେଲିବ୍ରିଟି ତାଙ୍କୁ ସମର୍ଥନ କରିବା ସହ ଆତ୍ମବିଶ୍ୱାସ ବଢାଇଛନ୍ତି।

 ଅନୁଷ୍କା ଶର୍ମା ନିଜ ଇନଷ୍ଟା ଷ୍ଟୋରୀରେ ତାଙ୍କୁ ଉପରେ ଏକ ନୋଟ୍ ସେୟାର କରିଛନ୍ତି । ସେ ଲେଖିଛନ୍ତି, ''ଆମେ ସମସ୍ତେ ଦୁଃଖିତ, କିନ୍ତୁ ମୁଁ କଳ୍ପନା କରିପାରୁ ନାହିଁ ଯେ ଆପଣଙ୍କ ଉପରେ ବିତୁଛି । ଆପଣ ଜଣେ ପ୍ରକୃତ ଚାମ୍ପିଅନ । ଆପଣ ଆମକୁ ଜଣେ ଭାରତୀୟ ଭାବରେ ଗର୍ବିତ କର । ଦୁନିଆ ଆପଣଙ୍କୁ ନେଇ ପୁଣି ସେଲିବ୍ରେସନ କରିବ ।''ସେହିପରି ସାରା ଅଲି ଖାନ ଭିନେଶଙ୍କର ଏକ ଫଟୋ ସେୟାର କରି କ୍ୟାପସନରେ ଲେଖିଛନ୍ତି, '' ଭିନେଶ ଫୋଗାଟ, ତୁମେ ଆମ ସମସ୍ତଙ୍କ ପାଇଁ ପ୍ରକୃତ ଚାମ୍ପିୟନ । ଆମେ ତୁମ ପାଇଁ ଗର୍ବିତ ।'' 

କରଣ ଜୋହର ମଧ୍ୟ ଭିନେଶଙ୍କ ପାଇଁ ଲେଖିଛନ୍ତି, 'ଭିନେଶ ଫୋଗାଟ ଇତିହାସରେ ତାଙ୍କ ନାମ ପଞ୍ଜିକରଣ କରିଛନ୍ତି । ତାଙ୍କର ଦୃଢତା, ଶକ୍ତି ଏବଂ ଅବିସ୍ମରଣୀୟତା ହେଉଛି ତାଙ୍କର ପଦକ । ସେ ଗୋଲ୍ଡ ଏବଂ କିମ୍ବଦନ୍ତୀ ଅଟନ୍ତି ।' ସେହିପରି ମଲାଇକା ଆରୋରା, ଅନୀଲ କପୁର, ସୁନୀଲ ଶେଟ୍ଟୀ, ବରୁଣ ଧୱନ, ସୋନୁ ସୁଦ, ତାପସୀ ପନ୍ନୁ ଓ କଙ୍ଗନାଙ୍କ ସମେତ ଅନେକ ତାରକା ଭିନେଶଙ୍କୁ ସମର୍ଥନ ସହ ମନୋବଳ ବଢାଇଛନ୍ତି ।