ନୂଆଦିଲ୍ଲୀ,୦୭/୦୫: ନେସ୍‌ଲେ ଭଳି ପ୍ରମୁଖ କମ୍ପାନିର ବେବି ଫୁଡ୍‌ ସେରେଲାକ୍‌ରେ ଆବଶ୍ୟକତାଠାରୁ  ଅଧିକ ପରିମାଣର ସୁଗାର ଅଂଶ ରହିଥିବା ଅଭିଯୋଗ ଆସିଥିଲା । ଏଭଳି ଗୁରୁତର ଦିଗକୁ ନଜରରେ ରଖି ଏବେ ଖାଦ୍ୟ ସୁରକ୍ଷା ନିୟାମକ ସାରା ଦେଶରେ  ଏକ ଏନଫୋର୍ସମେଣ୍ଟ ଡ୍ରାଇଭ ଆରମ୍ଭ  କରିଛନ୍ତି । ଏଥିରେ ଶିଶୁଙ୍କ ଖାଦ୍ୟ ପ୍ରସ୍ତୁତ  କରୁଥିବା କମ୍ପାନିଗୁଡିକର ଉତ୍ପାଦର  ନମୁନା ସଂଗ୍ରହ କରାଯାଉଛି । କମ୍ପାନିଗୁଡିକ ଧାର୍ଯ୍ୟ ମାନକ ମଧ୍ୟରେ ଉତ୍ପାଦ ପ୍ରସ୍ତୁତ  କରିଛନ୍ତି କି ନାହିଁ ସେ ସମ୍ପର୍କରେ କଡାକଡି  ଭାବେ ଯାଞ୍ଚ କରାଯିବ । 

ନିୟମ ଅବମାନନା  କରିଥିବା କମ୍ପାନିଗୁଡିକ ବିରୋଧରେ  ଆଇନ ଅନୁସାରେ କଠୋର କାର୍ଯ୍ୟାନୁଷ୍ଠାନ  ଗ୍ରହଣ କରାଯିବ ବୋଲି ଭାରତୀୟ ଖାଦ୍ୟ ସୁରକ୍ଷା ଏବଂ ମାନକ କର୍ତ୍ତୃପକ୍ଷ  (ଏଫ୍‌ଏସ୍‌ଏସ୍‌ଏଆଇ) ଏକ ପ୍ରେସ  ବିବୃତ୍ତିରେ କହିଛି । ଏଫ୍‌ ଏସ୍‌ଏସ୍‌ ଆଇନ  ୨୦୦୬ ଅନୁସାରେ ଖାଦ୍ୟ ଉତ୍ପାଦନ  ଏବଂ ବିତରଣ କ୍ଷେତ୍ରରେ କମ୍ପାନିଗୁଡିକ  ନିଶ୍ଚିତ ପକ୍ଷେ ଆଇନ ପରିସରଭୁକ୍ତ ।  ଅନୁପାଳନ ଅବମାନନା କ୍ଷେତ୍ରରେ  ଆଇନ ଅନୁସାରେ କାର୍ଯ୍ୟାନୁଷ୍ଠାନ  ନିଆଯିବ । ସିଙ୍ଗାପୁର ଏବଂ ହଂକଂରେ  ଭାରତୀୟ ମସଲା ବ୍ରାଣ୍ଡ୍‌ ଏମ୍‌ଡିଏଚ୍‌  ଏବଂ ଏଭରେଷ୍ଟ ଉପରେ କାର୍ଯ୍ୟାନୁଷ୍ଠାନ  ପରଠାରୁ ଭାରତୀୟ ଖାଦ୍ୟ ନିୟାମକଙ୍କ  କାର୍ଯ୍ୟଧାରା ଏବେ ବେଶ ଚର୍ଚ୍ଚାରେ ରହିଛି ।