ନୂଆଦିଲ୍ଲୀ,୨୨/୦୯: ଖୁବଶୀଘ୍ର  ୮ ହାଇକୋର୍ଟର ମୁଖ୍ୟ ବିଚାରପତିଙ୍କ ନାମ ଘୋଷଣା ହେବାର ସମ୍ଭାବନା ରହିଛି  ବୋଲି ସୁପ୍ରିମକୋର୍ଟର ପ୍ରଧାନ ବିଚାରପତି  ଡି.ୱାଇ ଚନ୍ଦ୍ରଚୂଡ ସୂଚନା ଦେବାର ଦିନକ  ପରେ କେନ୍ଦ୍ର ସରକାର ଶନିବାର ନୂଆ ମୁଖ୍ୟ  ବିଚାରପତିଙ୍କୁ ନିଯୁକ୍ତ କରିଛନ୍ତି । ରାଷ୍ଟ୍ରପତିଙ୍କ  ଅନୁମୋଦନ ପରେ ଏହି ନୂଆ ନିଯୁକ୍ତି  ଓ କେତେକ ବିଚାରପତି ବଦଳି ନେଇ  ସରକାରଙ୍କ ପକ୍ଷରୁ ଘୋଷଣା କରାଯାଇଛି । 

କେନ୍ଦ୍ର ସରକାରଙ୍କ ପକ୍ଷରୁ ମିଳିଥିବା ତଥ୍ୟ ଅନୁସାରେ ବର୍ତ୍ତମାନ ଦିଲ୍ଲୀ ହାଇକୋର୍ଟର କାର୍ଯ୍ୟକାରୀ ମୁଖ୍ୟ ବିଚାରପତି  ଥିବା ମନମୋହନଙ୍କୁ ସେଠାରେ ମୁଖ୍ୟ  ବିଚାରପତି ଭାବେ ନିଯୁକ୍ତ କରାଯାଇଛି । ଦିଲ୍ଲୀ ହାଇକୋର୍ଟର ବିଚାରପତି ରାଜୀବ  ଶକଧିରଙ୍କୁ ହିମାଚଳ ପ୍ରଦେଶର ମୁଖ୍ୟ ବିଚାରପତି କରାଯାଇଛି । ସେହିଭଳି ଦିଲ୍ଲୀ  ହାଇକୋର୍ଟର ଅନ୍ୟତମ ବିଚାରପତି ସୁରେଶ  କୁମାର କୈଟ ମଧ୍ୟପ୍ରଦେଶ ହାଇକୋର୍ଟର  ମୁଖ୍ୟ ବିଚାରପତି ନିଯୁକ୍ତ ହୋଇଛନ୍ତି । କଲିକତା ହାଇକୋର୍ଟର ବିଚାରପତି ଇନ୍ଦ୍ର  ପ୍ରସନ୍ନ ମୁଖାର୍ଜୀ ମେଘାଳୟ ହାଇକୋର୍ଟର  ମୁଖ୍ୟ ବିଚାରପତି ନିଯୁକ୍ତ ହୋଇଛନ୍ତି ।  

ସେହିଭଳି ବମ୍ବେ ହାଇକୋର୍ଟ  ବିଚାରପତି ନୀତିନ ମଧୁକର ଜମଦାର  କେରଳ ହାଇକୋର୍ଟର ମୁଖ୍ୟ ବିଚାରପତି  ହୋଇଥିଲା ବେଳେ ଜମ୍ମୁ-କାଶ୍ମୀର  ଓ ଲଦାଖ ହାଇକୋର୍ଟର ବିଚାରପତି  ତାସି ରବସ୍ତାନଙ୍କୁ ସେହି ହାଇକୋର୍ଟର  ମୁଖ୍ୟ ବିଚାରପତି କରାଯାଇଛି । ବମ୍ବେ  ହାଇକୋର୍ଟର ବିଚାରପତି କେ.ଆର  ଶ୍ରୀରାମଙ୍କୁ ମାଡ୍ରାସ ହାଇକୋର୍ଟ ଏବଂ  ହିମାଚଳ ପ୍ରଦେଶ ହାଇକୋର୍ଟର  ମୁଖ୍ୟ ବିଚାରପତି ଥିବା ଏମ୍‌ଏସ୍‌  ରାମଚନ୍ଦ୍ର ରାଓ ଝାଡଖଣ୍ଡ ହାଇକୋର୍ଟର  ମୁଖ୍ୟ ବିଚାରପତି ନିଯୁକ୍ତ ହୋଇଛନ୍ତି ।  

ଜୁଲାଇ ୧୧ ତାରିଖରେ ସୁପ୍ରିମକୋର୍ଟଙ୍କ  କଲେଜିୟମ ୮ ହାଇକୋର୍ଟ ପାଇଁ ନୂଆ  ମୁଖ୍ୟ ବିଚାରପତି ନିଯୁକ୍ତ ସଂକ୍ରାନ୍ତ  ଏକ ନାମ ତାଲିକା କେନ୍ଦ୍ର ସରକାରଙ୍କ  ନିକଟକୁ ପଠାଇଥିଲେ । ତେବେ  କେତେକ ନାମ ଉପରେ ସରକାର ଆପତ୍ତି ଉଠାଇବା ପରେ ଗତ ୧୭  ତାରିଖରେ କଲେଜିୟମ ଉକ୍ତ ତାଲିକାରେ  ଥିବା ୩ଟି ନାମ ପରିବର୍ତ୍ତନ କରିଥିଲେ ।