ଭୁବନେଶ୍ୱର,୦୧/୦୯: ରାଜଧାନୀରେ ଜଣେ କଲେଜ ଛାତ୍ରଙ୍କୁ ଭୁଜାଲିରେ ଆକ୍ରମଣ ହୋଇଛି। ବଡ଼ଗଡ଼ ଥାନା ପାଣ୍ଡବନଗରରେ ଥିବା ଏକ ଘରୋଇ କଲେଜ ଛାତ୍ରଙ୍କୁ ସହପାଠୀ ତା’ ସହଯୋଗୀଙ୍କ ସହ ମିଶି ଭୁଜାଲିରେ ପେଟକୁ ଭୁସି ଦେଇଛି । ଗୁରୁତର ଅବସ୍ଥାରେ ଛାତ୍ର ବିଶ୍ୱଜିତ ସ୍ୱାଇଁଙ୍କୁ ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଛି । ତାଙ୍କ ଅବସ୍ଥା ସଂକଟାପନ୍ନ ରହିଛି । ସାମାନ୍ୟ ବଚସାରୁ ବିଶ୍ୱଜିତଙ୍କୁ ଭୁଜାଲିରେ ଆକ୍ରମଣ ହୋଇଥିବା ଜଣାପଡ଼ିଛି । ପୁଲିସ ଆକ୍ରମଣକାରୀଙ୍କୁ ଗିରଫ କରିବା ପାଇଁ ବିଭିନ୍ନ ସ୍ଥାନରେ ଚଢ଼ଉ ଜାରି ରଖିଛି ।
ଘଟଣାରୁ ଜଣାଯାଇଛି, ବାଙ୍କୁଆଳର ବିଶ୍ୱଜିତ ପାଣ୍ଡବନଗରରେ ଥିବା ଏକ ଘରୋଇ କଲେଜରେ ଯୁକ୍ତ-୩ ଦ୍ୱିତୀୟ ବର୍ଷରେ ପଢ଼ନ୍ତି । ଆଜି ପରୀକ୍ଷା ସରିବା ପରେ ସେ ଦିନ ସାଢ଼େ ଗୋଟାଏ ବେଳେ ସହପାଠୀ ଚନ୍ଦନ ପଣ୍ଡାଙ୍କ ସହ କଲେଜରୁ ବାହାରୁଥିଲେ । ଏହି ସମୟରେ ଚନ୍ଦନଙ୍କ ସହ ତାଙ୍କର କୌଣସି କଥାକୁ ନେଇ ବଚସା ହୋଇଥିଲା । ଏଥିରେ ଚନ୍ଦନ ଉତ୍କ୍ଷିପ୍ତ ହୋଇ ସଙ୍ଗେ ସଙ୍ଗେ ଜଣେ ଅଣଛାତ୍ରଙ୍କୁ ଡ଼କାଇଥିଲେ । ସେ ଭୁଜାଲି ନେଇ କଲେଜରେ ପହଞ୍ଚିବା ପରେ ଚନ୍ଦନ ଓ ତାଙ୍କ ସାଙ୍ଗ ମିଶି ବିଶ୍ୱଜିତଙ୍କୁ ଭୁଜାଲିରେ ଚୋଟ ପକାଇଥିଲେ । ବିଶ୍ୱଜିତ ହାତ ଦେଖାଇ ଦେବାରୁ ଚୋଟ ତାଙ୍କ ହାତରେ ବାଜିଥିଲା । ତା'ପରେ ସେମାନେ ତାଙ୍କ ପେଟକୁ ଭୁଜାଲିରେ ଭୁସି ପକାଇଥିଲେ । ଚନ୍ଦନ ରକ୍ତ ଜୁଡୁବୁଡୁ ହୋଇ ତଳେ ପଡ଼ି ଯାଇଥିଲା । ଏହାପରେ ଚନ୍ଦନ ଅଣଛାତ୍ରଙ୍କ ସହ ବାଇକ୍ରେ ସେଠାରୁ ଖସି ପଳାଇଥିଲେ ।
ଗୁରୁତର ଅବସ୍ଥାରେ ବିଶ୍ୱଜିତଙ୍କୁ ଅନ୍ୟ ସାଙ୍ଗମାନେ ଉଦ୍ଧାର କରି ଏକ ଘରୋଇ ହସ୍ପିଟାଲକୁ ନେଇଥିଲେ । ଖବରପାଇ ବିଶ୍ୱଜିତଙ୍କ ପରିବାର ଲୋକେ ହସ୍ପିଟାଲରେ ପହଞ୍ଚିଥିଲେ । ବିଶ୍ୱଜିତଙ୍କ ଅବସ୍ଥା ସଂକଟାପନ୍ନ ଥିବାରୁ ତାଙ୍କୁ ପରିବାର ଲୋକେ ଅନ୍ୟ ଏକ ଘରୋଇ ହସ୍ପିଟାଲକୁ ସ୍ଥାନାନ୍ତର କରିଛନ୍ତି । ରିପୋର୍ଟ ଲେଖାଯିବା ପର୍ଯ୍ୟନ୍ତ ଥାନାରେ କୌଣସି ଲିଖିତ ଅଭିଯୋଗ ହୋଇ ନଥିବା ବଡ଼ଗଡ଼ ଥାନା ଅଧିକାରୀ ତୃପ୍ତିରଞ୍ଜନ ନାୟକ କହିଛନ୍ତି । ତଥାପି ଅଭିଯୁକ୍ତମାନଙ୍କୁ ଗିରଫ କରିବା ପାଇଁ ବିଭିନ୍ନ ସ୍ଥାନରେ ଚଢ଼ଉ ଜାରି ରହିଥିବା ସେ କହିଛନ୍ତି । ତେବେ ସାମାନ୍ୟ ବଚସାରୁ ଜଣେ କଲେଜ ଛାତ୍ରଙ୍କୁ ସହପାଠୀ ଭୁଜାଲିରେ ହାଣିଦେବା ଘଟଣା ରାଜଧାନୀରେ ଚର୍ଚ୍ଚର ବିଷୟ ପାଲଟିଛି ।
