ଭୁବନେଶ୍ୱର,୧୯/୦୩: ଚଳିତ ସପ୍ତାହରେ କଂଗ୍ରେସର ପ୍ରଥମ ପ୍ରାର୍ଥୀ ତାଲିକା ଆସିବ ବୋଲି କୁହାଯାଉଥିଲା । ମାତ୍ର ଏବେ ବିଳମ୍ବ ହେବ କଂଗ୍ରେସ ପ୍ରାର୍ଥୀ ତାଲିକା ଘୋଷଣା । ରାଜ୍ୟରେ ବିଜେଡି-ବିଜେପି ମେଣ୍ଟର ଚୂଡାନ୍ତ ନିର୍ଯ୍ୟାସକୁ ଅପେକ୍ଷା କରିଛି କଂଗ୍ରେସ । ସେଥି ପାଇଁ ୧୯ ତାରିଖରେ ଦିଲ୍ଲୀରେ ହେବାକୁ ଥିବା କଂଗ୍ରେସର ସ୍କ୍ରିନିଂ କମିଟି ବୈଠକକୁ ଘୁଞ୍ଚାଇ ଦିଆଯାଇଛି । ଓଡ଼ିଶାର ନିର୍ବାଚନ ତାରିଖ ବି ବିଳମ୍ବରେ ଥିବାରୁ ତଥା ମେଣ୍ଟର ସ୍ଥିତି ସ୍ପଷ୍ଟ ହେଉନଥିବାରୁ କଂଗ୍ରେସ ମଧ୍ୟ ତା’ର ରଣନୀତି ନିର୍ଦ୍ଧାରଣ କରିବାରେ ବିଳମ୍ବ କରୁଛି । ସେମାନେ ଘୋଷିତ ହେଉ କିମ୍ବା ଅଘୋଷିତ ହେଉ ମେଣ୍ଟ ନିହାତି କରିବେ ବୋଲି ପ୍ରଭାରୀ ଡ. ଅଜୟ କୁମାର ଦୃଢୋକ୍ତି ପ୍ରକାଶ କରିଛନ୍ତି । ଅଜୟଙ୍କ ଅନୁସାରେ ପ୍ଲାନ୍-‘ଏ’ କାମ ନକଲେ ପ୍ଲାନ୍-‘ବି’ କରିବ ବୋଲି ଯୁକ୍ତି ବାଢିଛନ୍ତି । ଯଦି ମେଣ୍ଟ କରି ପ୍ରାର୍ଥୀ ନ ଦିଅନ୍ତି, ତେବେ ପ୍ଲାନ୍ ବି ଅନୁସାରେ ଆଲୋଚନା କରି ଉଭୟ ଦଳ କିଛି ସ୍ଥାନରେ ପରସ୍ପରକୁ ଜିତାଇବା ପାଇଁ ଦୁର୍ବଳ ପ୍ରାର୍ଥୀ ଦେବେ ବୋଲି ଅଜୟ ଯୁକ୍ତି ବାଢିଛନ୍ତି ।
ଉଲ୍ଲେଖଯୋଗ୍ୟ ଗତ ୧୪ ତାରିଖ ଦିନ ପ୍ରଭାରୀ ଅଜୟ କୁମାର କହିଥିଲେ, ଶୀଘ୍ର କଂଗ୍ରେସର ଓଡ଼ିଶାର ପ୍ରଥମ ପର୍ଯ୍ୟାୟ ଟିକଟ୍ ଘୋଷଣା ହେବ । କଂଗ୍ରେସ ପ୍ରଥମ ପର୍ଯ୍ୟାୟରେ ଓଡ଼ିଶାର ୪୨ ସିଟ୍ର ତାଲିକା ଆଣିବ । ୩୨ ବିଧାନସଭା ସିଟ୍ ଓ ୧୦ ଲୋକସଭା ସିଟ୍ର ସ୍କ୍ରିନିଂ ସରିଛି । ତେଣୁ ପ୍ରଥମ ପର୍ଯ୍ୟାୟରେ ସେହି ଆସନଗୁଡିକ ଘୋଷଣା ହେବ । ଅବଶିଷ୍ଟ ସିଟ୍ର ସ୍କ୍ରିନିଂ ଆସନ୍ତା ୧୯ କିମ୍ବା ୨୦ ତାରିଖରେ ହେବ ।