ନୂଆଦିଲ୍ଲୀ ୦୧/୦୪: ଦୁଇ ମୁଣ୍ଡ କିନ୍ତୁ ଶରୀର ଗୋଟିଏ । ଜନ୍ମରୁ ପରସ୍ପର ଶରୀର ସହ ଯୋଡ଼ି ହୋଇଥିବା ଯାଆଁଳା ଭଉଣୀଙ୍କ ମଧ୍ୟରୁ ଜଣେ ବିବାହ କରିଛନ୍ତି । ଦୁଇ ଭଉଣୀ ଏବି ହେଁସଲ ଏବଂ ବ୍ରିଟନି ହେଁସଲଙ୍କ ମଧ୍ୟରୁ ଏବି ପୂର୍ବତନ ସୈନିକ ତଥା ନର୍ସ ଜୋଶ୍ ବାଉଲିଂଙ୍କୁ ନିଜ ଜୀବନସାଥୀ ବାଛିଛନ୍ତି । ଉଭୟଙ୍କ ବିବାହ ୨୦୨୧ରେ ହୋଇଥିଲେ ହେଁ ଏବେ ତାହା ସାମ୍ନାକୁ ଆସିଛି ।
୧୯୯୬ରେ ଓପ୍ରା ୱିନ୍ଫ୍ରେ ଶୋ’ରେ ଆସିବା ପରେ ୩୪ ବର୍ଷୀୟା ଏହି ଦୁଇ ଭଉଣୀ ବେଶ୍ ଚର୍ଚ୍ଚାକୁ ଆସିଥିଲେ । ପରେ ତାଙ୍କର ନିଜର ଟିଏଲ୍ସି ସିରିଜ ଆସିଥିଲା । ଏଥିରେ ଉଭୟେ ନିଜ ଦୈନନ୍ଦିନ ଜୀବନ କିପରି କାଟୁଛନ୍ତି ତାହା ଦେଖାଇଥିଲେ । ଏବି ହେଁସଲ ନିଜ ପ୍ରୋଫାଇଲ ଫଟୋ ବଦଳାଇ ଦେଇଛନ୍ତି । ସେ ତାଙ୍କ ଆକାଉଣ୍ଟ ଭଉଣୀ ବ୍ରିଟନିଙ୍କ ସହ ସେୟାର କରନ୍ତି । ଅପ୍ଲୋଡ କରିଥିବା ଫଟୋ ବିବାହ ସମୟର । ଏକ ଭିଡିଓରେ ଦମ୍ପତି ଡ୍ୟାନ୍ସ କରୁଥିବାର ଦେଖିବାକୁ ମିଳିଛି ।
ଏକ ରିପୋର୍ଟ ଅନୁସାରେ, ଦୁଇ ଭଉଣୀ ଆମେରିକାର ମିନୋସୋଟାରେ ପିଲାଙ୍କୁ ପାଠ ପଢ଼ାନ୍ତି । ସେଠାରେ ହିଁ ଉଭୟେ ବଢ଼ିଛନ୍ତି । ଅଣ୍ଟା ତଳକୁ ଉଭୟଙ୍କ ଶରୀର ଗୋଟିଏ । ଏବି ନିଜ ଡାହାଣ ହାତ ଏବଂ ଗୋଡ଼କୁ ନିୟନ୍ତ୍ରଣ କରୁଥିବାବେଳେ ବ୍ରିଟନି ବାମ ହାତ ଏବଂ ଗୋଡ଼କୁ ନିୟନ୍ତ୍ରଣ କରିଥାନ୍ତି।୧୯୯୦ରେ ଉଭୟଙ୍କ ଜନ୍ମ ପରେ ତାଙ୍କ ମାତାପିତା ତାଙ୍କ ସର୍ଜରୀ ପାଇଁ ମନାକରିଥିଲେ । କାରଣ ସର୍ଜରୀ ପରେ ସେମାନଙ୍କ ଜୀବିତ ରହିବା ଆଶା କ୍ଷୀଣ ଥିଲା ।