ପାପଡାହାଣ୍ଡି, ୦୨/୦୪ : ୬ ମାସ କାଳ ପାଣି ଟାଙ୍କି ନିର୍ମାଣ ପାଇଁ କଲେ ଝାଳବୁହା ପରିଶ୍ରମ। ପାରିଶ୍ରମିକ ବାବଦକୁ ଟଙ୍କା ପାଇବେ ବୋଲି ଆଶା ବାନ୍ଧିଥିଲେ। ନିରୀହ ଶ୍ରମିକମାନଙ୍କ ସରଳତାର ସୁଯୋଗ ନେଇ କାମ କରାଇଦେଲା ଠିକାଦାର। ହେଲେ କାମଟିକୁ ଅଧାପନ୍ତରିଆ କରିଦେଇ ଶ୍ରମିକଙ୍କ ଟଙ୍କା ନେଇ ଛୁ ହୋଇଗଲା ଠିକାଦାର। ପାଣିରେ ପଡ଼ିଲା ଶ୍ରମିକଙ୍କ ୬ ମାସର ପରିଶ୍ରମ। 

ପାପଡାହାଣ୍ଡି ବ୍ଲକ ମୋକିଆ ପଞ୍ଚାୟତ ବାସନି ଗ୍ରାମରେ ଜିଭିପିଆର କମ୍ପାନୀ ତରଫରୁ ଏକ ପାଣି ଟାଙ୍କି ନିର୍ମାଣ ଲାଗି ଶ୍ରମିକମାନେ କାମ କରିଥିଲେ। ବ୍ରହ୍ମପୁରର ଜଣେ ଠିକାଦାର ଏହି କାମ ଆରମ୍ଭ କରିଥିଲା। ସ୍ଥାନୀୟ ଅଞ୍ଚଳର କିଛି ଯୁବକ ଯୁବତୀମାନଙ୍କୁ ପ୍ରୋଲଭନ ଦେଖାଇ ଠିକାଦାର ଜଣଙ୍କ କାମ କରାଇଥିଲା। ଏକା ସାଥିରେ ଟଙ୍କା ଦିଆଯିବ କହିବାରୁ ଲୋକେ ଠିକାଦାରର କଥାରେ ପଡି ୬ ମାସ କାଳ କାମ କରିଥିଲେ। କିନ୍ତୁ ଯେତେବେଳେ ଶ୍ରମିକମାନେ ଟଙ୍କା ମାଗିଥିଲେ, ଠିକାଦାର ସେମାନଙ୍କୁ ଭୁଆଁ ବୁଲାଇ ଚାଲିଲା। ଶେଷରେ ରାତାରାତି ପ୍ରାୟ ୩ ଲକ୍ଷ ଟଙ୍କା ନଦେଇ ଛୁ ହୋଇଗଲା। ଫଳରେ ଗ୍ରାମର ଶ୍ରମିକମାନଙ୍କର ମୂଲ ପଇସା ସହ କିରାଣୀ ଦୋକାନି, ମାଂସ ଦୋକାନି, ଜଳଖିଆ ଦୋକାନୀ, ଟ୍ରାକ୍ଟର, କ୍ରସର ଟଙ୍କା ଆଦି ବାକି ରହିଛି। ବର୍ଷେ ହେଲାଣି ଶ୍ରମିକମାନେ ଟଙ୍କା ଫେରି ପାଇବା ନେଇ ଚାହିଁ ବସିଛନ୍ତି। ସେପଟେ କାମଟି ଅଧା ପନ୍ତରିଆ ହୋଇ ପଡ଼ିଥିବାରୁ ସମ୍ପୂର୍ଣ୍ଣ ହେବା ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଏ ନେଇ ଜିଭିପିଆର କମ୍ପାନୀ ବି କୌଣସି ତତ୍ପରତା ଦେଖାଉ ନାହିଁ। ନିରୀହ ଗରିବ ଶ୍ରମିକମାନେ ସ୍ଥାନୀୟ ଅଞ୍ଚଳରେ କାମ କରି ବି ଟଙ୍କା ପାଉନଥିବା ବେଳେ କମ୍ପାନୀ ଉକ୍ତ ଠିକାଦାର ବିରୋଧରେ କାହିଁକ ଏପର୍ଯ୍ୟନ୍ତ କାର୍ଯ୍ୟନୁଷ୍ଠାନ ଗ୍ରହଣ କରୁନାହିଁ ତାହା ପ୍ରଶ୍ନବାଚୀ ସୃଷ୍ଟି ହୋଇଛି। ସେପଟେ କମ୍ପାନୀ ଗରିବ ଶ୍ରମିକଙ୍କ ଟଙ୍କା ଫେରାଇବ ବ୍ୟାବସ୍ଥା କରାଇ କାମ ଚାଲୁ କରୁନାହିଁ। ଜିଲ୍ଲାପାଳ ତଥା ଜିଲ୍ଲା ଶ୍ରମ ଅଧିକାରୀ ଏଥିପ୍ରତି ଦୃଷ୍ଟି ଦେବାକୁ ଦାବି ହୋଇଛି। ନଚେତ୍ ଅଗାମୀ ଦିନରେ କମ୍ପାନୀ ଓ ଠିକାଦାର ବିରୋଧରେ ଆଇନର ଆଶ୍ରୟ ନେବୁ ବୋଲି ଶ୍ରମିକମାନେ ଚେତାବନୀ ଦେଇଛନ୍ତି।