କଟକ,୨୧/୧୧: ଓରମାସ୍ ପକ୍ଷରୁ ଆୟୋଜିତ ଜାତୀୟ ପଲ୍ଲିଶ୍ରୀ ମେଳା ପ୍ରତିବର୍ଷ ବାଲିଯାତ୍ରାର ମୁଖ୍ୟ ଆକର୍ଷଣ ସାଜିଥାଏ । ଏଥର ଏହି ମେଳା ନିଜର କାୟା ବୃଦ୍ଧି କରି ଆହୁରି ଅଧିକ ଷ୍ଟଲ୍ ଏବଂ ନୂଆ ଆକର୍ଷଣ ଯୋଡ଼ିବାକୁ ଯାଉଛି । ଏଥର ଓରମାସ୍ରେ ୪୨୦ଟି ଷ୍ଟଲ୍ କରାଯିବ । ହସ୍ତତନ୍ତ, ହସ୍ତଶିଳ୍ପ ସହିତ ରାଜ୍ୟ ତଥା ଜାତୀୟ ସ୍ତରର ଅନେକ ହସ୍ତକଳା ଏଥିରେ ପ୍ରଦର୍ଶିତ ହେବ । କିଣାବିକାର ସୁଯୋଗ ସୃଷ୍ଟି ହେବ ।
ଏଥର ବାଲିଯାତ୍ରାରେ ମନମୋହିବ ‘କଟକ ଇନ୍ କଟକ’ର ଗାଁ ପରିବେଶ
ରାଜ୍ୟର ବିଭିନ୍ନ ଜିଲ୍ଲାରୁ ଉତ୍ପାଦକ ଗୋଷ୍ଠୀମାନେ ବାଲିଯାତ୍ରାରେ ସାମିଲ୍ ହେବେ । ଜାତୀୟ ସ୍ତରରୁ ପଞ୍ଜାବ, ହରିୟାଣା, ଦିଲ୍ଲୀ, ରାଜସ୍ଥାନ, ପଶ୍ଚିମବଙ୍ଗ, ଆସାମ, ମେଘାଳୟ, ଆନ୍ଧ୍ରପ୍ରଦେଶ, ତେଲେଙ୍ଗାନା, ତାମିଲନାଡୁ, କେରଳ, କର୍ଣ୍ଣାଟକ, ମଣିପୁର, ମହାରାଷ୍ଟ୍ର ଭଳି ୨୨ଟି ରାଜ୍ୟରୁ ଏବେ ଆସିବା ଆଜି ସୁଦ୍ଧା ନିଶ୍ଚିତ ହୋଇଛି । ଓରମାସ୍ ଭିତରେ ଏଥର ଡେମେନଷ୍ଟ୍ରେସନ୍ ବା ପ୍ରଦର୍ଶନୀ ଷ୍ଟଲ୍ ଖୋଲିବ । ବିଭିନ୍ନ ହସ୍ତତନ୍ତ ତଥା ହସ୍ତକଳାର ନିର୍ମାଣ ପ୍ରକ୍ରିୟାକୁ ଲୋକେ ଦେଖିପାରିବେ । ଟେରାକୋଟା, କନ୍ଥା ସିଲାଇ, ଡୋକ୍ରା ପ୍ରମୁଖ ପ୍ରଦର୍ଶନୀ କରାଯିବ ।
ଐତିହାସିକ ବାଲିଯାତ୍ରା ପାଇଁ ଅତିଥି ଚୂଡାନ୍ତ
ଚଳିତ ବର୍ଷ ଓରମାସ୍ ଭିତରେ କୋଣାର୍କ ସୂର୍ଯ୍ୟମନ୍ଦିର ଢାଞ୍ଚାରେ ପ୍ୟାଭିଲିୟନ୍ କରାଯିବ । ୫୦ ଫୁଟ୍ରେ ୫୦ ଫୁଟ୍ ମାପର ଏହି ପ୍ୟାଭିଲିୟନ୍ ମୁଖ୍ୟ ଆକର୍ଷଣ ହେବ ବୋଲି ଓରମାସ୍ର ଡେପୁଟି ନିର୍ଦ୍ଦେଶକ ବିପିନ୍ ରାଉତ ପ୍ରକାଶ କରିଛନ୍ତି । ପଲିଶ୍ରୀ ମେଳାକୁ ପ୍ଲାଷ୍ଟିକ୍ ଫ୍ରି ଜୋନ୍ କରାଯାଇଛି ।
କାଗଜ, କପଡ଼ା ଓ ଝୋଟ ପ୍ରସ୍ତୁତ ବ୍ୟାଗ୍ ବ୍ୟବହାର କରିବା ବାଧ୍ୟତାମୂଳକ କରାଯାଇଛି । କଟକର ୪ଟି, ପୁରୀ ଓ ଜଗତସିଂହପୁରରୁ ଗୋଟିଏ ଲେଖାଏଁ ଉତ୍ପାଦକ ଗୋଷ୍ଠୀ ବ୍ୟାଗ୍ ଯୋଗାଇବେ । ଗତବର୍ଷ ପଲିଶ୍ରୀ ମେଳା ୨୪ କୋଟି ୫୬ଲକ୍ଷ ଟଙ୍କା ବ୍ୟବସାୟ କରିଥିବା ବେଳେ ଏଥର ୩୫ କୋଟି ଟଙ୍କା ବ୍ୟବସାୟ କରିବାକୁ ଲକ୍ଷ୍ୟ ରଖାଯାଇଥିବା ଶ୍ରୀ ରାଉତ ପ୍ରକାଶ କରିଛନ୍ତି ।
