ବ୍ରହ୍ମପୁର ୨୦/୦୨: କିଏ କହୁଛି ଡ୍ୟାନ୍ସ ଓସ୍ତାଦ, ତ କିଏ କହୁଛି ଏକ୍ସପ୍ରେସନ୍ ମାଷ୍ଟର୍ । ମାତ୍ର ୮ ବର୍ଷ ବୟସରେ ଜାତୀୟସ୍ତରର ରିଆଲିଟି ସୋ’ରେ ଭାଗନେଇ ବିଚାରକଙ୍କ ଦୃଷ୍ଟି ଆକର୍ଷଣ କରିଥିବା ବ୍ରହ୍ମପୁରର ଆଦର୍ଶ ପାତ୍ର ଏବେ ଚର୍ଚ୍ଚାରେ । ‘ଡ୍ୟାନ୍ସ ଦିୱାନେ’ରେ ଭାଗ ନେଇ ମାଧୁରୀ ଦିକ୍ଷୀତ ଓ ସୁନିଲ୍ ସେଟ୍ଟୀଙ୍କ ଦ୍ୱାରା ଉଚ୍ଚ ପ୍ରଶଂସିତ ହୋଇଛନ୍ତି ଆଦର୍ଶ । ତାଙ୍କ ଏକ୍ସପ୍ରେସନ୍ ଉଭୟ ବିଚାରକଙ୍କ ପସନ୍ଦ ଆସିଥିବା ଆଦର୍ଶଙ୍କ ବାପା କହିଛନ୍ତି ।
ବ୍ରହ୍ମପୁର ନୀଳାଦ୍ରି ବିହାର ତ୍ରିନାଥ ନଗର ବାସିନ୍ଦା ସମ୍ପୂର୍ଣ୍ଣ କୁମାର ପାତ୍ର ଓ ରଶ୍ମିତାରାଣୀଙ୍କ ପୁଅ ଆଦର୍ଶ । ଡିଏଭି ସ୍କୁଲ୍ର ତୃତୀୟ ଶ୍ରେଣୀରେ ପଢ଼ନ୍ତି । ୪ ବର୍ଷରୁ ଆଦର୍ଶ ଡ୍ୟାନ୍ସ ପ୍ରତି ଆକର୍ଷିତ ହୋଇଥିଲେ । ଟିଭି ଦେଖି ନୃତ୍ୟ କରୁଥିବା ଆଦର୍ଶଙ୍କୁ ୱାଓ ଡ୍ୟାନ୍ସ ଏକାଡେମୀରେ ପ୍ରଶିକ୍ଷଣ ପାଇଁ ଭର୍ତ୍ତି କରିଥିଲେ । ଡ୍ୟାନ୍ସ ମାଷ୍ଟର୍ ଗଣେଶ ମିସ୍ତ୍ରୀଙ୍କ ଠାରୁ ଆଦର୍ଶ ନୃତ୍ୟଶିକ୍ଷା ହାସଲ କରି ଆଗକୁ ବଢ଼ି ଚାଲିଛନ୍ତି । ପ୍ରଥମେ ସ୍ଥାନୀୟ ମଞ୍ଚରେ ନୃତ୍ୟ କରୁଥିବା ଆଦର୍ଶ ଜିଲ୍ଲା ଓ ରାଜ୍ୟ ମଞ୍ଚରେ ଉତ୍ତମ ପ୍ରଦର୍ଶନ କରି ଦର୍ଶକଙ୍କ ମନ ଜିଣିଥିଲେ । ପରେ ଓଡ଼ିଆ ଟେଲିଭିଜନ୍ ଚ୍ୟାନେଲ୍ରେ ପ୍ରସାରିତ ନାଚ୍ ଓଡ଼ିଶା, ଟିକେ ଡାନ୍ସ-ଟିକେ ଆକ୍ଟିଂ, ବିବି ନମ୍ବର ୱାନ୍ ଆଦି ରିଆଲିଟି ସୋ’ରେ ଭାଗନେଇ ଚମତ୍କାର ନୃତ୍ୟ କରିଥିଲେ । କିଛି ସୋ’ରେ ୱିନର୍ ହେବା ପରେ ଡ୍ୟାନ୍ସ ଦିୱାନେ ଜାତୀୟ ନୃତ୍ୟ ସୋ’ରୁ ନିମନ୍ତ୍ରଣ ମିଳିଥିଲା । ଏଥିପାଇଁ ଭୁବନେଶ୍ୱରରେ ଦୁଇ ରାଉଣ୍ଡ, କୋଲକାତାରେ ଦୁଇଟି ଅଡିସନ୍ରେ ସଫଳତା ହାସଲ କରି ମୁମ୍ବାଇ୍ ଅଡିସନ୍ ପାଇଁ ବିବେଚିତ ହୋଇଥିଲେ ଓ ତାପରେ ଟିଭି ରାଉଣ୍ଡକୁ ଉନ୍ନୀତ ହୋଇଥିଲେ ଆଦର୍ଶ । ସାରା ଦେଶରୁ ଟପ୍ ୧୦୦ଙ୍କୁ ନେଇ ମେଗା ରାଉଣ୍ଡ ହୋଇଥିଲା । ଯେଉଁଥିରେ ଆଦର୍ଶ ଟପ୍ ୧୮ ସ୍ଥାନ ପାଇଥିଲେ । ଡ୍ୟାନ୍ସ ଦିୱାନେ ମଞ୍ଚରେ ତାଙ୍କ ପ୍ରଦର୍ଶନକୁ ନେଇ ବିଚାରକମାନେ ବେଶ ଆକର୍ଷିତ ହୋଇଥିଲେ । ବର୍ତ୍ତମାନ ଇଣ୍ଡିଆ ଗଟ୍ ଟ୍ୟାଲେଣ୍ଟ ପାଇଁ ପ୍ରସ୍ତୁତି ଚଳାଇଛନ୍ତି ।
