ଭୁବନେଶ୍ୱର,୦୬/୦୬: ଝିଅକୁ ଦୁଷ୍କର୍ମ ଉଦ୍ୟମ କଲା । ବିଫଳ ହେବାରୁ କଟୁରୀ ବେଣ୍ଟରେ ନିସ୍ତୁକ ମାଡ଼ ମାରିବା ସହ ତଣ୍ଟିଚିପି ହତ୍ୟା ଉଦ୍ୟମ କଲା । ଏଭଳି ଜଣେ କାମାନ୍ଧ ତଥା ନୃଶଂସ ବାପାକୁ ବାନ୍ଧିଛି ଏୟାରଫିଲ୍ଡ ଥାନା ପୁଲିସ । ତା ନାମ ଅରୁଣ କୁମାର  ଜେନା(୬୫) । ସେ ସୁନ୍ଦରପଦା  ଅଞ୍ଚଳରେ ରହୁଥିଲା ।  

ପୁଲିସ ସୂଚନା ଅନୁଯାୟୀ, ଅରୁଣ ଜଣେ ଗାଡ଼ି ଚାଳକ । ଘରେ ପୁଅ, ବୋହୂ ସମେତ ୨୭ ବର୍ଷର ଝିଅ ସ୍ୱପ୍ନା(ଛଦ୍ମନାମ)ଙ୍କ ସହ ରହୁଥିଲା । ଅରୁଣ ସବୁବେଳେ ନିଶାସକ୍ତ ଅବସ୍ଥାରେ ଆସି ସ୍ୱପ୍ନାଙ୍କୁ ଅଶ୍ରାବ୍ୟ ଭାଷାରେ ଗାଳିଗୁଲଜ କରେ । ଗତ ୨ ତାରିଖ ବିଳମ୍ବିତ ରାତିରେ ଅରୁଣ ନିଶାସକ୍ତ ଅବସ୍ଥାରେ ଘରକୁ ଆସିଥିଲା । ସ୍ୱପ୍ନା ଶୋଇଥିବା ବେଳେ ଅରୁଣ ତାଙ୍କୁ ଦୁଷ୍କର୍ମ ଉଦ୍ୟମ କରିଥିଲା । ବହୁ କଷ୍ଟରେ ସ୍ୱପ୍ନା  ବାପାକୁ ଠେଲି ତା କବଳରୁ ମୁକୁଳି  ଆସିଥିଲା । ଦୁଷ୍କର୍ମରରେ ଅକୃତକାର୍ଯ୍ୟ  ହେବାରୁ ଅରୁଣ ସ୍ୱପ୍ନାଙ୍କୁ ଝାଡ଼ୁ ଏବଂ  କଟୁରୀ ବେଣ୍ଟରେ ନିସ୍ତୁକ ପିଟିଥିଲା । ଏଥିସହ ତାଙ୍କ ତଣ୍ଟିକୁ ଚିପି ହତ୍ୟା  ଉଦ୍ୟମ କରିଥିସା । ସ୍ୱପ୍ନାଙ୍କ ପାଟିଶୁଣି  ଭାଇ-ଭାଉଜ ଚାଲି ଆସି ତାଙ୍କୁ ଉଦ୍ଧାର  କରିଥିଲେ । ଖଣ୍ଡିଆଖାବରା ହୋଇଥିବା  ସ୍ୱପ୍ନାଙ୍କୁ ପ୍ରଥମେ ସେମାନେ ହସ୍ପିଟାଲ  ନେଇ ଚିକିତ୍ସା କରାଇଥିଲେ । ପରଦିନ  ଏନେଇ ସ୍ୱପ୍ନା ଏୟାରଫିଲ୍ଡ ଥାନାରେ  ଅଭିଯୋଗ କରିଥିଲେ । ପୁଲିସ ଏକ  ମାମଲା ରୁଜୁକରି ତଦନ୍ତ ଚଳାଇଥିଲା । ବୁଧବାର ପୁଲିସ ଅରୁଣକୁ ଗିରଫ କରି  କୋର୍ଟ ଚାଲାଣ କରିଥିଲା । ଜାମିନ  ନାମଞ୍ଜୁର ହେବାରୁ ତାଙ୍କୁ ଜେଲ୍‌  ହାଜତକୁ ପଠାଇ ଦିଆଯାଇଛି।