ନୂଆଦିଲ୍ଲୀ,୨୭/୦୫: ଦିଲ୍ଲୀ ମୁଖ୍ୟମନ୍ତ୍ରୀ ତଥା ଆମ୍ ଆଦମୀ ପାର୍ଟି (ଆପ୍) ମୁଖ୍ୟ ଅରବିନ୍ଦ କେଜ୍ରିୱାଲ ସୁପ୍ରିମକୋର୍ଟଙ୍କ ଦ୍ବାରସ୍ଥ ହୋଇଛନ୍ତି। ତାଙ୍କୁ ବାରମ୍ବାର ଡାକ୍ତରୀ ପରୀକ୍ଷା ଦେବାକୁ ପଡୁଥିବାରୁ ସେ ମଧ୍ୟବର୍ତ୍ତୀକାଳୀନ ଜାମିନକୁ ୭ ଦିନ ବୃଦ୍ଧି କରିବାକୁ ସର୍ବୋଚ୍ଚ ନ୍ୟାୟାଳୟଙ୍କ ପାଖରେ ଅପିଲ କରିଛନ୍ତି। କେଜ୍ରିୱାଲ ତାଙ୍କ ପିଟିସନରେ କହିଛନ୍ତି ଯେ ପିଇଓ ଓ ସିଟି ସ୍କାନ ଏବଂ ଅନ୍ୟାନ୍ୟ ଡାକ୍ତରୀ ପରୀକ୍ଷା କରିବା ପାଇଁ ତାଙ୍କର ଅନ୍ତରିଣ ଜାମିନକୁ ଏକ ସପ୍ତାହ ପର୍ଯ୍ୟନ୍ତ ବୃଦ୍ଧି କରାଯାଉ।
ଆମ୍ ଆଦମୀ ପାର୍ଟି କହିଛି ଯେ ଅରବିନ୍ଦ କେଜ୍ରିୱାଲଙ୍କ ଠାରେ ଦେଖାଯାଇଥିବା ଲକ୍ଷଣଗୁଡ଼ିକ କିଡନୀ ଜନିତ ସମସ୍ୟା କିମ୍ବା କର୍କଟ ରୋଗକୁ ସୂଚାଉଛି। ମାର୍ଚ୍ଚ ୨୧ ରେ ଦିଲ୍ଲୀର ମଦ ନୀତି ଦୁର୍ନୀତି ମାମଲାରେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଅରବିନ୍ଦ କେଜ୍ରିୱାଲଙ୍କୁ ଗିରଫ କରିଥିଲା। ଏହା ପରେ, ମେ ୧୦ ତାରିଖରେ, ସୁପ୍ରିମକୋର୍ଟ ଲୋକସଭା ନିର୍ବାଚନରେ ପ୍ରଚାର କରିବା ପାଇଁ ଦିଲ୍ଲୀ ମୁଖ୍ୟମନ୍ତ୍ରୀଙ୍କୁ ଜୁନ୍ ୧ ପର୍ଯ୍ୟନ୍ତ ଅନ୍ତରିଣ ଜାମିନ ପ୍ରଦାନ କରିବାକୁ ନିଷ୍ପତ୍ତି ନେଇଥିଲେ। ତାଙ୍କୁ ଜୁନ୍ ୨ ରେ ଆତ୍ମସମର୍ପଣ କରିବାକୁ ନିର୍ଦ୍ଦେଶ ଦିଆଯାଇଥିଲା।
ଏଥିସହ କେଜ୍ରିୱାଲ ଇଡି ଗିରଫକୁ ଚ୍ୟାଲେଞ୍ଜ କରି ଆବେଦନ ଉପରେ ଏକ ଲିଖିତ ବୀବରଣୀ ମଧ୍ୟ ଦାଖଲ କରିଥିଲେ। ବରିଷ୍ଠ ଓକିଲ ଅମିତ ଦେଶାଇ କେଜ୍ରିୱାଲଙ୍କ ତରଫରୁ ଲିଖିତ ବୀବରଣୀ ଦାଖଲ କରିଛନ୍ତି। ସୁପ୍ରିମକୋର୍ଟଙ୍କ ପୂର୍ବ ନିଷ୍ପତ୍ତିକୁ ଉଲ୍ଲେଖ କରି ସେ କହିଛନ୍ତି ଯେ ଗିରଫ ପାଇଁ ଇଡି ପାଖରେ ଉପଯୁକ୍ତ କାରଣ ନାହିଁ, ଗିରଫ କେବଳ ସନ୍ଦେହ ଆଧାରରେ କରାଯାଇଥିଲା। ପିଏମ୍ଏଲ୍ଏ ରେ ଗିରଫ ପାଇଁ ମାନଦଣ୍ଡ ଅଛି, ଯାହାକୁ ଇଡି ଅନୁସରଣ କରିନାହିଁ।
ସେ କହିଛନ୍ତି ଯେ ଧାରା ୧୯ ରେ ନିର୍ମିତ ମୂଲ୍ୟାଙ୍କନ ଏବଂ ମୂଲ୍ୟାଙ୍କନର ସୁରକ୍ଷା ସ୍ଥିର କରାଯାଇଛି। ଏହି ପ୍ରସଙ୍ଗରେ ଇଡିର କାର୍ଯ୍ୟ ସନ୍ତୁଳିତ ନୁହେଁ। ଧାରା ୧୯ ଅନୁଯାୟୀ ଗିରଫ କେବଳ ଅନୁମାନ ଓ କଳ୍ପନା ଉପରେ ଆଧାରିତ ହୋଇପାରିବ ନାହିଁ। ଗୀରଫଦାରିର ଏକ ଗୁରୁତ୍ୱପୂର୍ଣ୍ଣ ଆଧାର ରହିବା ଜରୁରୀ। ସନ୍ଦେହକୁ ଆଧାର କରି ଗିରଫ କରିବା ବେଆଇନ ଅଟେ। ଧାରା ୧୯ ଆଧାରରେ ଏକ ଠୋସ୍ ମୂଲ୍ୟାଙ୍କନ କରାଯାଇଛି। କୌଣସି ଅପରାଧର ସିଦ୍ଧାନ୍ତରେ ପହଞ୍ଚିବା ପାଇଁ ଏକ ଦୃଢ଼ ଆଧାର ରହିବା ଆବଶ୍ୟକ। ଗିରଫ ପ୍ରକ୍ରିୟାରେ ଯଦି ନିୟମ ପାଳନ କରାଯାଏ ନାହିଁ, ତେବେ ଏହାକୁ ବେଆଇନ ବୋଲି କୋର୍ଟ ଖଣ୍ଡନ କରିପାରିବେ।