ବୁର୍ଲା,୨୬/୦୮:ବୁର୍ଲା ଭିମ୍ସାରରେ ଚିକିତ୍ସାଧୀନ ଜଣେ ଡେଙ୍ଗୁ ଆକ୍ରାନ୍ତ ଯୁବକଙ୍କ ଶରୀରରେ ବିରଳ ଲକ୍ଷଣ ଦେଖିବାକୁ ମିଳିଛି । ପକ୍ଷଘାତ ଭଳି ତାଙ୍କ ମୁହଁ ବଙ୍କେଇ ଯାଇଛି । ଆୟୁର୍ବିଜ୍ଞାନ ଭାଷାରେ ଏହାକୁ ‘ବେଲ୍ସ ପେଲ୍ସି’ ବୋଲି କୁହାଯାଉଛି । ‘ବେଲ୍ସ ପେଲ୍ସି’ ଯଦିଓ ବିରଳ ନୁହେଁ³ ତଥାପି ଡେଙ୍ଗୁରୋଗୀଙ୍କ କ୍ଷେତ୍ରରେ ଏହା କ୍ୱଚିତ୍ ପରିଲକ୍ଷିତ ହୋଇଥାଏ ବୋଲି ଡେଙ୍ଗୁ ନିୟନ୍ତ୍ରଣ ବିଭାଗର ନୋଡାଲ ଅଫିସର୍ ତଥା ମେଡିସିନ୍ ଆସିଷ୍ଟାଣ୍ଟ ପ୍ରଫେସର ଡା. ଶଙ୍କର ରାମଚନ୍ଦାନୀ କହିଛନ୍ତି ।
ଉଲ୍ଲେଖଯୋଗ୍ୟ, ଭିମ୍ସାର୍କୁ ପ୍ରାୟ ମାସେ ହେଲା ଡେଙ୍ଗୁ ଆକ୍ରାନ୍ତଙ୍କ ସୁଅ ଛୁଟୁଛି । ଆକ୍ରାନ୍ତମାନେ ଦୀର୍ଘ ଦିନ ଚିକିତ୍ସା ପରେ ସୁସ୍ଥ ହୋଇ ଘରକୁ ଫେରୁଛନ୍ତି । ଏବେ ବି ଅନେକ ରୋଗୀ ଚିକିତ୍ସାଧୀନ ଅଛନ୍ତି । ସେମାନଙ୍କ ମଧ୍ୟରୁ ଜଣେ ଡେଙ୍ଗୁ ଆକ୍ରାନ୍ତ ଯୁବକ ‘ବେଲ୍ସ ପେଲ୍ସି’ର ଶିକାର ହୋଇଛନ୍ତି । ତାଙ୍କ ମୁହଁ ଗୋଟିଏ ପାଶ୍ୱର୍କୁ ମୋଡ଼ି ହୋଇଯାଇଛି । ମୂଳତଃ ଏହା ପକ୍ଷାଘାତ ଭଳି । ବିଭିନ୍ନ ସମୟରେ ମଣିଷ ‘ବେଲ୍ସ ପେଲ୍ସି’ର ଶିକାର ହୋଇଥାଏ । ହେଲେ ଡେଙ୍ଗୁ ରୋଗୀଙ୍କ କ୍ଷେତ୍ରରେ ଏହା ବିରଳ । ପ୍ରାୟ ୧୦ ହଜାର ଡେଙ୍ଗୁ ଆକ୍ରାନ୍ତଙ୍କ ମଧ୍ୟରେ ଜଣଙ୍କ କ୍ଷେତ୍ରରେ ଏଭଳି ଲକ୍ଷଣ ଦେଖାଦେଇପାରେ । ଏହା ମାରାତ୍ମକ ଲକ୍ଷଣ ନୁହେଁ । କିନ୍ତୁ ରୋଗୀଙ୍କୁ ସୁସ୍ଥ ହେବାକୁ ଅଧିକ ସମୟ ଲାଗେ ବୋଲି ଡା. ରାମଚନ୍ଦାନୀ କହିଛନ୍ତି ।
‘ବେଲ୍ସ ପେଲ୍ସି’ର ଶିକାର ରୋଗୀଙ୍କ ନିକଟରେ ବିଚିତ୍ର ଲକ୍ଷଣ ଦେଖିବାକୁ ମିଳିଥାଏ । ମୁହଁ ମୋଡ଼ି ହୋଇଯାଏ । ଆଖି ଠିକ୍ ଭାବରେ ବନ୍ଦ କରିହୁଏ ନାହିଁ । ଶରୀରର ଗୋଟିଏ ପାଶ୍ୱର୍ ମାଂସପେଶୀ ଦୁର୍ବଳ ହୋଇଯିବା କାରଣରୁ ପାଟି ଭିତରୁ ପାଣି ବାହାରିଯାଏ । କଥା କହିବା ବେଳକୁ ଗୋଟିଏ ପାଖ ଟାଣି ହୋଇଯିବା ଭଳି ଲକ୍ଷଣ ଦେଖିବାକୁ ମିଳେ । ଭିମ୍ସାର ଇତିହାସରେ ଡେଙ୍ଗୁ ରୋଗୀଙ୍କ କ୍ଷେତ୍ରରେ କେହି ‘ବେଲ୍ସ ପେଲ୍ସି’ର ଶିକାର ହେବା ରେକର୍ଡ ନାହିଁ । ଚଳିତ ବର୍ଷ ପ୍ରଥମ ଥର ଜଣେ ସଂକ୍ରମିତଙ୍କ ନିକଟରେ ଏଭଳି ଲକ୍ଷଣ ଦେଖିବାକୁ ମିଳିଛି ବୋଲି ଡା. ରାମଚନ୍ଦାନୀ କହିଛନ୍ତି।
