ଭୁବନେଶ୍ୱର,୨୬/୮: ବ୍ଲକିଂ ବେଳେ ବାରିକେଡ୍‌ ଭାଙ୍ଗି ପୁଲିସକୁ ଗାଡ଼ି ଚଢ଼ାଇବାକୁ ଉଦ୍ୟମ କରିବା ଅଭିଯୋଗରେ  ମଞ୍ଚେଶ୍ୱର ଥାନା ପୁଲିସ ମଦ୍ୟପ ଚାଳକଙ୍କୁ  ଗିରଫ କରିଛି । ଏଥିସହ ଗାଡ଼ିକୁ ଜବତ  କରିଛି । ଗିରଫ ଅଭିଯୁକ୍ତ ହେଲେ ପଟିଆ  ଶ୍ରୀ ବିହାରର କାହ୍ନୁ ରାଉତ(୩୫) ।

ପୁଲିସ ସୂଚନା ଅନୁଯାୟୀ, ଗତକାଲି  ରାତିରେ ମଞ୍ଚେଶ୍ୱର ଥାନା ପୁଲିସ ପକ୍ଷରୁ  ପଦ୍ମକେଶରପୁର ଛକ ନିକଟରେ ବ୍ଲକିଂ  କରାଯାଇ ଗାଡ଼ିମୋଟର ଯାଞ୍ଚ ଚାଲିଥିଲା ।  ଏହି ସମୟରେ ଏକ ଟୟୋଟା ଫର୍ଚୁନର  କାର୍‌ରେ କାହ୍ନୁ ଆସୁଥିଲେ । ପୁଲିସ  ଯାଞ୍ଚ କରୁଥିବା ଦେଖି ସେ ଦ୍ରୁତଗତିରେ  ଗାଡ଼ି ଚଳାଇ ରାସ୍ତାରେ ଥୁଆ ହୋଇଥିବା  ବାରିକେଡ୍‌କୁ ଧକ୍କା ଦେଇ ଘୋଷାଡ଼ି  ନେଇଥିଲେ ।  ତାଙ୍କୁ ପୁଲିସ କର୍ମଚାରୀ ଅଟକାଇବାକୁ  ଉଦ୍ୟମ କରୁଥିବା ବେଳେ ସେ ପୁଲିସ  ଉପରକୁ ଗାଡ଼ି ଚଢ଼ାଇଦେବାକୁ ଉଦ୍ୟମ  କରିଥିଲେ । ପୁଲିସ କର୍ମଚାରୀ ଜୀବନ ବିକଳରେ ଡେଇଁପଡ଼ି ବର୍ତ୍ତି ଯାଇଥିଲେ ।  ପୁଲିସ ଗୋଡ଼ାଇ ଗୋଡ଼ାଇ ଗାଡ଼ିକୁ  ଜବତ କରିବା ସହ କାହ୍ନୁଙ୍କୁ ଗିରଫ  କରିଥିଲା । ଆଜି କାହ୍ନୁଙ୍କୁ ଅଦାଲତ ଚାଲାଣ  କରାଯାଇଛି ।