ଟାଙ୍ଗୀ, ୨୩/୦୮: ମଦ ନିଶାରେ ଚୁର୍ ହେଲେ ଟାଙ୍ଗୀ ସବ୍-ଟ୍ରେଜେରୀ କାର୍ଯ୍ୟାଳୟର ହେଡ୍-କିରାଣୀ । ମାତାଲ ହୋଇକି ବୁଲିଲେ । ଯିବା ଆସିବା କରିବା ବେଳେ ଲୋକଙ୍କୁ ଅଶ୍ଳୀଳ ଭାଷାରେ ଗାଳି ଗୁଲଜ କରି ବୁହାଏ ଛେଚା ଖାଇଲେ । ପରେ ପୁଣି ମଦ ପିଇ ନିଜ କାର୍ ଚଳାଇ ୨ ବାଇକକୁ ଧକ୍କା ଦେଲେ । ଦୁର୍ଘଟଣାରେ ଅଳ୍ପକେ ବର୍ତ୍ତିଲେ ବାଇକ ଚାଳକ । ହେଡ୍-କିରାଣୀ ଜଣକ ସୁଜିତ୍ କୁମାର ମଲିକ ବୋଲି ଜଣାପଡ଼ିଛି । ଖୋର୍ଦ୍ଧା ଜିଲ୍ଲା ଟାଙ୍ଗୀ ବ୍ଲକ ଛକ ନିକଟରେ ଏଭଳି ଦୃଶ୍ୟ ଦେଖିବାକୁ ମିଳିଛି ।

ସୂଚନା ଅନୁଯାୟୀ, ମଦନିଶାରେ ନିୟନ୍ତ୍ରଣ ହରାଇଲେ ବାବୁ । ଉପୁରି ପଇସା ମିଳିଥିବାରୁ ମଦ ପିଇ ମାତାଲ ହୋଇ ବୁଲିଲେ ଟାଙ୍ଗୀ ସବ୍-ଟ୍ରେଜେରୀ କାର୍ଯ୍ୟାଳୟର ହେଡ୍-କିରାଣୀ । ନିଶାଶକ୍ତ ଅବସ୍ଥାରେ ରାସ୍ତାରେ ଯିବା ଆସିବା କରୁଥିବା ଲୋକଙ୍କୁ ଅଶ୍ଳୀଳ ଭାଷାରେ ଗାଳିଗୁଲଜ କରିଥିଲେ । ଏଥିରେ ଉତ୍ୟକ୍ତ ହୋଇ ସ୍ଥାନୀୟଲୋକେ ସରକାରୀ ବାବୁଙ୍କୁ  ନିର୍ଧୁମ ଛେଚିଥିଲେ । ବାବୁ ଏକା ନୁହନ୍ତି , ତାଙ୍କ ସାଙ୍ଗ ମଧ୍ୟ ଏଥିରେ ସାମିଲ ଥିଲେ । ତେଣୁ ଉଭୟଙ୍କୁ ଲୋକେ ମାଡ଼ ମାରିଥିଲେ । 

କିନ୍ତୁ ସେତିକିରେ ବାବୁଙ୍କ ମନ ଶାନ୍ତି ହୋଇ ନଥିଲା । ପରେ ପୁଣି ମଦ ପିଇ ନିଜ କାର ଚଳାଇ ରାସ୍ତା କଡ଼ରେ ଥିବା ୨ଟି ବାଇକ ସହ ଧକ୍କା କରିଥିଲେ । ଫଳରେ ଦୁଇଟି ବାଇକ ଭାଙ୍ଗି ଯାଇଥିଲା । ଏହି ଦୁର୍ଘଟଣାରେ ଦୁଇ ବାଇକ ଚାଳକ ଅଳ୍ପକେ ବର୍ତ୍ତିଯାଇଥିଲେ ।ପରେ ପୁଣି ଲୋକଙ୍କ ଠାରୁ ମାଡ଼ ଖାଇ ବାବୁଙ୍କ ନିଶା ଛାଡ଼ିଥିଲା । 

ତେବେ ଏହି ଘଟଣା ହୋଇଥିବା ସମୟରେ କିଛି ଲୋକ ଏହି ଦୃଶ୍ୟକୁ ମୋବାଇଲରେ କଏଦ କରିଥିଲେ । ଫଟୋ ଉଠାଇବା ବେଳେ ବାବୁ ଇଂଲିସରେ କଥା କହିଥିଲେ । ଏନେଇ ସ୍ଥାନୀୟ ଲୋକେ ପୋଲିସକୁ ଖବର ଦେଇଥିଲେ । ଖବର ପାଇ ଘଟଣା ସ୍ଥଳରେ ପୋଲିସ ପହଞ୍ଚି ବାବୁଙ୍କୁ ଉଦ୍ଧାର କଲେ ।