ନୂଆଦିଲ୍ଲୀ,୦୯/୦୮: କେନ୍ଦ୍ର ସରକାର କହିଛନ୍ତି ଯେ ଗତ ତିନିବର୍ଷ ମଧ୍ୟରେ ଦେଶରେ ଡିଟିଏଚ୍ ସଂଯୋଗୀକରଣ ତଥା ସବ୍ସ୍କ୍ରାଇବରଙ୍କ ସଂଖ୍ୟାରେ ଉଲ୍ଲେଖନୀୟ ହ୍ରାସ ଘଟିଛି। ସରକାର କହିଛନ୍ତି ଯେ ଏହାର ଗୋଟିଏ କାରଣ ହେଉଛି ଓଟିଟିର ଲୋକପ୍ରିୟତା। କେନ୍ଦ୍ର ସରକାର ଶୁକ୍ରବାର ଦିନ ରାଜ୍ୟସଭାରେ ଏହି ସୂଚନା ଦେଇଛନ୍ତି। ତେବେ ସରକାର ଏହି ଆକଳନ ବିଷୟରେ ବିସ୍ତୃତ ସୂଚନା ଦେଇନାହାଁନ୍ତି।
ରାଜ୍ୟସଭାରେ କ'ଣ କହିଲେ ସରକାର:
ରାଜ୍ୟସଭାରେ ଟିଏମ୍ସିର ଡୋଲା ସେନ୍ ଜାଣିବାକୁ ଚାହିଁଥିଲେ ଯେ ଓଟିଟି ଆସିବା ହେତୁ କେବୁଲ ଟିଭି ଗ୍ରାହକଙ୍କ ସଂଖ୍ୟା ହ୍ରାସ ପାଇଛି କି? କେବୁଲ ଟିଭି ଗ୍ରାହକଙ୍କ ସଂଖ୍ୟା ହ୍ରାସର ରାଜ୍ୟସ୍ତରୀୟ ବିବରଣୀ ସେ କେନ୍ଦ୍ର ଠାରୁ ମାଗିଥିଲେ। ଏହାର ଉତ୍ତରରେ ସୂଚନା ଓ ପ୍ରସାରଣ ମନ୍ତ୍ରୀ ଡକ୍ଟର ଆର. ମୁରୁଗନ କହିଛନ୍ତି ଯେ ମାର୍ଚ୍ଚ ୨୦୨୦ ରୁ ମାର୍ଚ୍ଚ ୨୦୨୩ ମଧ୍ୟରେ କେବୁଲ ଟିଭି ଗ୍ରାହକଙ୍କ ସଂଖ୍ୟା ୧୦ କୋଟି ୩୦ ଲକ୍ଷରୁ ୬ କୋଟି ୪୦ ଲକ୍ଷକୁ ହ୍ରାସ ପାଇଛି। ଏଥିରେ ଡିଟିଏଚ୍ ଏବଂ ମାଗଣା କେବୁଲ ଉପଭୋକ୍ତାଙ୍କ ହ୍ରାସ ମଧ୍ୟ ଅନ୍ତର୍ଭୁକ୍ତ। ଟେଲିକମ୍ ରେଗୁଲେଟୋରୀ ଅଥରିଟି ଅଫ୍ ଇଣ୍ଡିଆର ବାର୍ଷିକ ରିପୋର୍ଟ ଆଧାରରେ ସେ ଏହି ସୂଚନା ଦିଆଯାଇଛି।
କେଉଁ କାରଣ ପାଇଁ କମିଲେ ଡିଟିଏଚ୍ ଉପଭୋକ୍ତାଙ୍କ ସଂଖ୍ୟା:
ସେ କହିଛନ୍ତି ଯେ ଓଟିଟି ପ୍ଲାଟଫର୍ମର ଆସିବା ମଧ୍ୟ କେବୁଲ ଟିଭି ଗ୍ରାହକଙ୍କ ହ୍ରାସର କାରଣ ହୋଇପାରେ। କେବୁଲ ଟିଭି ଗ୍ରାହକଙ୍କ ସଂଖ୍ୟା ହ୍ରାସ ବିଷୟରେ ସରକାର ସୂଚନା ଦେଇଛନ୍ତି କିନ୍ତୁ ରାଜ୍ୟଓ୍ବାରୀ ଏନେଇ କୌଣସି ତଥ୍ୟ ପ୍ରଦାନ କରିନାହାଁନ୍ତି। ସରକାର ରାଜ୍ୟସଭାକୁ କହିଛନ୍ତି ଯେ ଓଟିଟି ପ୍ଲାଟଫର୍ମଗୁଡିକ ସୂଚନା ପ୍ରଯୁକ୍ତିବିଦ୍ୟା ନିୟମ ୨୦୨୧ ଦ୍ୱାରା ନିୟନ୍ତ୍ରିତ। ଏଠାରେ କେବୁଲ ଟିଭି, କେବୁଲ ଟିଭି ନେଟୱାର୍କ (ରେଗୁଲେସନ) ଆକ୍ଟ ୧୯୯୫ ଏବଂ ଟେଲିକମ୍ ରେଗୁଲେଟୋରୀ ଅଥରିଟି ଅଫ୍ ଇଣ୍ଡିଆ ଟିଆର୍ଏଆଇ ମାଧ୍ୟମରେ ନିୟନ୍ତ୍ରିତ।
