ଭୁବନେଶ୍ୱର,୧୩/୦୮: ରାଖୀ ତ ଆପଣମାନେ  ସମସ୍ତେ ଦେଖିଥିବେ । ଯେଉଁଥିରେ ଲାଗିଥାଏ ଚିକିମିକି ଜରି ସହ ବିଭିନ୍ନ ପ୍ରକାର ଷ୍ଟୋନ୍‌ । ହେଲେ କେବେ ଭାବିଛନ୍ତି ଗୋଟିଏ ରାଖୀରୁ ଗଛ ସୃଷ୍ଟି  ହୋଇପାରିବ ବୋଲି । ହଁ ଆଜ୍ଞା ଏଭଳି  ନିଆରା ପ୍ରୟାସ କରିଦେଖାଇଛନ୍ତି ସାମାଜିକ ଅନୁଷ୍ଠାନ ୟୁଥ ଫର ସେବାର କର୍ମକର୍ତ୍ତାମାନେ । ରବିବାର ଏହି ସଂଗଠନର  ଭୁବନେଶ୍ୱର ଶାଖା ପକ୍ଷରୁ  ଗଙ୍ଗନଗର ସ୍ଥିତ ସ୍ୱାମୀ ବିବେକାନନ୍ଦ ଚାଟଶାଳୀରେ  ବିଭିନ୍ନ ରୋପଣଯୁକ୍ତ ମଞ୍ଜିରେ ତିଆରି କରାଯାଇଛି ରାଖୀ ।  ଏହି କାର୍ଯ୍ୟକ୍ରମର ମୂଳ ଲକ୍ଷ୍ୟ ହେଉଛି ପରିବେଶ ସୁରକ୍ଷା । ବଜାରରେ ମିଳୁଥିବା ରାଖୀରେ ବ୍ୟବହୃତ ସାମଗ୍ରୀ ମାଟିରେ  ଅବକ୍ଷୟ ହୋଇପାରିବ ନାହିଁ । କିନ୍ତୁ ମଞ୍ଜି ରାଖୀ ମାଟିରେ  ପଡ଼ିବା ପରେ ସେଥିରୁ ଗଛ ଉଠିବ ଓ ସୃଷ୍ଟି ହେବ ସବୁଜ  ପରିବେଶ । 

ସଂଗଠନର କହିବା କଥା, ବର୍ତ୍ତମାନ ସମୟରେ  ଧୀରେ ଧୀରେ ଗଛ ସଂଖ୍ୟା ହ୍ରାସ ପାଇବାରେ ଲାଗିଛି । ସ୍ନେହ,  ବିଶ୍ୱାସ ଓ ସୁରକ୍ଷାର ପ୍ରତୀକ ରାଖୀ ମାଧ୍ୟମରେ ସବୁଜ ବଳୟ ମଧ୍ୟ ତିଆରି କରିହେବ ।  ରୋପଣଯୋଗ୍ୟ ରାଖୀ ବା ମଞ୍ଜି ରାକ୍ଷୀ ତିଆରି ପଦ୍ଧତି ଅତି ସହଜ । ଆମେ ନିଜ ନିଜ ଘରେ ମଧ୍ୟ  ତିଆରି କରିପାରିବା । ସୂତା, ବୋର୍ଡ଼, ଅଠା ଏବଂ ବିଭିନ୍ନ  ପ୍ରକାର ମଞ୍ଜିକୁ ବ୍ୟବହାର  କରି ତିଆରି ହୋଇଥିବା  ଏହି ରାକ୍ଷୀକୁ ରାକ୍ଷୀ ପୂର୍ଣ୍ଣିମା  ଦିନ ଭାଇମାନଙ୍କ ହାତରେ  ବନ୍ଧାଯାଇପାରିବ ବୋଲି  କର୍ମକର୍ତ୍ତାମାନେ ମତବ୍ୟକ୍ତ କରିଛନ୍ତି । ଏହି ଅବସରରେ ୟୁଥ ଫର ସେବାର ୩୯  ଜଣ ସଦସ୍ୟ ଯୋଗଦେଇଥିଲେ । କାର୍ଯ୍ୟକ୍ରମରେ  କାଳିଆ, ପ୍ରଣୟ, ଶୁଭଲକ୍ଷ୍ମୀ, ଶୁଭଶ୍ରୀ, ଶୁଭସ୍ମିତା, ସାଗରିକା,  ସଙ୍ଗୀତା, ଶୁଭଙ୍କର ଓ ପୂର୍ଣ୍ଣ ପ୍ରମୁଖ ଯୋଗ ଦେଇଥିଲେ।