ଭୁବନେଶ୍ୱର,୨୧/୦୫: ନିର୍ବାଚନ ପାଇଁ ଫୁରସତ ନାହିଁ । ସକାଳୁ ଦୋକାନ ଖୋଲିଲେ, କର୍ମୀମାନେ ଆସି ଆଗୁଆ ବଇନା ଦେଉଛନ୍ତି । ରାତିକି ଏତିକି କେଜି ମାଂସ ଦରକାର । କେଉଁଦିନ ୧୦ କେଜି, ତ କେଉଁଦିନ ୨୦ । ମାଂସ କାଟିକାଟି ହାତ ଥକିଯାଉଛି । ମାସକ ତଳେ ଦୈନିକ ପ୍ରାୟ ୫୦ କେଜି ଚିକେନ୍ ବିକ୍ରି କରୁଥିବା ବେଳେ ଏବେ ଦିନକୁ ୭୦ କେଜି ପର୍ଯ୍ୟନ୍ତ ବିକ୍ରି ହେଉଛି । ସ୍ଥାନୀୟ ୪ ନମ୍ବର ହାଟର ଜଣେ ଚିକେନ ବ୍ୟବସାୟୀ ଏଭଳି କହିଛନ୍ତି ।
ସକାଳୁ ନେଇ ରାତି ପର୍ଯ୍ୟନ୍ତ ଜୋରଦାର ପ୍ରଚାର । ଛକ, ବଜାର, ଗଳକନ୍ଦିରେ ବୁଲୁଛି ଦଳୀୟ ପ୍ରଚାର ଗାଡ଼ି । ଖରା ଓ ଗୁଳୁଗୁଳିରେ ପ୍ରାର୍ଥୀମାନେ ସମର୍ଥକଙ୍କୁ ଧରି ଝାଳନାଳ ହୋଇ ବିଭିନ୍ନ ୱାର୍ଡ ଓ ବଜାର ବୁଲୁଛନ୍ତି । ତେଣୁ ସେମାନଙ୍କ ପେଟପୂଜା ପାଇଁ ଆଗୁଆ ପ୍ରସ୍ତୁତ ହେଉଛନ୍ତି ପ୍ରାର୍ଥୀ । ରାତିରେ ଡିନରରେ ପରଷା ଯାଉଛି ଭାତ ଆଉ ଚିକେନ୍ ଝୋଳ । କେହି କେହି ନାନ୍ ଓ ପରଟା ବି ଦେଉଛନ୍ତି । ନିର୍ବାଚନ ସମୟରେ ଏବେ ରାଜଧାନୀର ଚାରିଆଡେ ଭୋଜିଭାତ(ଫିଷ୍ଟ)ର ଆସର ଜମୁଛି । ଏଥିରେ ସବୁଠୁ ଅଧିକ ପସନ୍ଦର ଖାଦ୍ୟ ହେଉଛି ଚିକେନ୍ । ଯିଏ ଯେତେ ଖାଇ ପାରିଲା । କର୍ମୀଙ୍କୁ ସନ୍ତୁଷ୍ଟ କରିବାକୁ ପ୍ରାର୍ଥୀଙ୍କ ଇଏ ହେଉଛି ପସନ୍ଦର ଫଣ୍ଡା । ରାଜଧାନୀର ବଡ଼ ଆମିଷ ବଜାର ହେଉଛି ୟୁନିଟ-୪ ହାଟ । ଏତଦବାଦ୍ ୟୁନିଟ-୮, ପଟିଆ, ଡୁମୁଡୁମା, ଓଲ୍ଡ ଟାଉନରେ ମଧ୍ୟ ଛୋଟବଡ଼ ଆମିଷ ବଜାର ଅଛି । ପୂର୍ବରୁ ଆନ୍ଧ୍ର ଓ ଭୁବନେଶ୍ୱର ବାହାରୁ ଚିକେନ ଆସୁଥିବା ବେଳେ କିଛିବର୍ଷ ହେବ ଭୁବନେଶ୍ୱର ଉପକଣ୍ଠରେ ଚିକେନ୍(ବ୍ରଏଲର)ଉତ୍ପାଦନ ବଢ଼ିଛି । ତେଣୁ ଆଉ ବାହାରୁ ଏହା ଆସୁନି ।
ରାଜଧାନୀର ବିଭିନ୍ନ ଅଞ୍ଚଳରେ ଚିକେନ୍ ଦୋକାନୀଙ୍କ ସଂଖ୍ୟା ପାଖାପାଖି ୧୫ଶହ । ମାସକ ତଳେ ଦୈନିକ ଭୁବନେଶ୍ୱରକୁ ଆସୁଥିଲା ୨୨ଟି ଚିକେନ୍ ଗାଡି । ଗୋଟିଏ ଗାଡିରେ ୨.୫ରୁ ୩ କୁଇଣ୍ଟାଲ ଲେଖାଏଁ ଚିକେନ୍ ରୁହେ । ଏହାର ଅର୍ଥ ୫୫ରୁ ୬୬ କ୍ୱିଣ୍ଟାଲ ଚିକେନ୍ ଭୁବନେଶ୍ୱରକୁ ଆସେ । ସେଥିମଧ୍ୟରୁ ୪୦ରୁ୫୦ କ୍ୱିଣ୍ଟାଲ ବିକ୍ରି ହୋଇଯାଏ । ନିର୍ବାଚନ ଯୋଗୁ ଏହି ଗାଡି ସଂଖ୍ୟା ୨୫ରୁ ୩୦ ପର୍ଯ୍ୟନ୍ତ ବୃଦ୍ଧି ପାଇଛି । ଯେଉଁଥିରେ ପ୍ରାୟ ୬୨ କ୍ୱିଣ୍ଟାଲରୁ ନେଇ ୭୫ କୁଇଣ୍ଟାଲ ଚିକେନ ଆମଦାନୀ କରାଯାଉଛି । ଦୈନିକ ୭୦ କ୍ୱିଣ୍ଟାଲରୁ ଅଧିକ ଚିକେନ୍ ବେପାର ହେଉଛି । ମାସକ ମଧ୍ୟରେ ୨୦ କ୍ୱିଣ୍ଟାଲ ଚିକେନ୍ ଆମଦାନୀ ବୃଦ୍ଧି ପାଇଥିବା ଅଲ ଓଡ଼ିଶା ଆମିଷ ବ୍ୟବସାୟୀ ସଂଘ ପକ୍ଷରୁ କୁହାଯାଇଛି ।
ସେହିପରି ନିର୍ବାଚନ ଋତୁରେ ମାଂସ କେଜି ମଧ୍ୟ ବଢ଼ିଛି । ଭୁବନେଶ୍ୱରର କେତେକ ସ୍ଥାନରେ କଟା ମାଂସ(ବ୍ରଏଲର) କିଲୋ ୩ଶହଟଙ୍କାରେ ବିକ୍ରି ହେଉଥିବା ବେଳେ ଆଉ କେତେକ ସ୍ଥାନରେ ଦର ରହିଛି ୨୬୦ରୁ ୨୮୦ । ତେବେ ଫାର୍ମ ଦର ଦେଖିଲେ ଗୋଟା କୁକୁଡ଼ା କେଜି ହେଉଛି ୧୩୯ଟଙ୍କା । ସେହିପରି ଦେଶୀ କୁକୁଡ଼ା କିଲୋ ରହିଛି ୫ଶହ । କୁକୁଡ଼ା ମାଂସ ବେପାର ଆଗକୁ ଆହୁରି ବୃଦ୍ଧି ପାଇବ ବୋଲି ଆକଳନ କରାଯାଇଛି ।
