ନୂଆଦିଲ୍ଲୀ: ଦ୍ବିତୀୟ ପର୍ଯ୍ୟାୟ ନିର୍ବାଚନ ପାଇଁ ପ୍ରଚାର ଶେଷ ହୋଇଛି । ଏପ୍ରିଲ ୨୬ ତାରିଖରେ ୧୨ ରାଜ୍ୟ ଓ ଗୋଟିଏ କେନ୍ଦ୍ର ଶାସିତ ଅଞ୍ଚଳରେ ୮୮ଟି ଆସନରେ ମତଦାନ ହେବାକୁ ଯାଉଛି । ୧୨୦୬ ପ୍ରାର୍ଥୀ ଭାଗ୍ୟ ପରୀକ୍ଷା କରିବେ। ମଧ୍ୟପ୍ରଦେଶର ବୈତୁଲ ଆସନର ବିଏସପି ପ୍ରାର୍ଥୀଙ୍କ ମୃତ୍ୟୁ ହୋଇଥିବାରୁ ଏହି ଆସନରେ ମତଦାନ ସ୍ଥଗିତ ରହିଛି । କେରଳରେ ସର୍ବାଧିକ ୨୦ଟି ଲୋକସଭା ଆସନ, କର୍ଣ୍ଣାଟକରେ ୧୪ଟି, ରାଜସ୍ଥାନରେ ୧୩ଟି ଆସନରେ ମତଦାନ ହେବ ।
ସେହଭଳି ଉତ୍ତର ପ୍ରଦେଶର ୮, ମହାରାଷ୍ଟ୍ର ୮, ମଧ୍ୟପ୍ରଦେଶ ୬, ବିହାର ୫, ଆସାମ ୫, ପଞ୍ଚିମବଙ୍ଗ ୩, ଛତିଶଗଡ଼ ୩, ଜାମ୍ମୁକାଶ୍ମୀର ୧ ଏବଂ ତ୍ରିପୁରାରେ ଗୋଟିଏ ଆସନରେ ନିର୍ବାଚନ ହେବାକୁ ଯାଉଛି । ଦ୍ବିତୀୟ ପର୍ଯ୍ୟାୟରେ କେରଳ ୱାୟନାଡରେ ରାହୁଲ ଗାନ୍ଧୀ, ରାଜସ୍ଥାନ କୋଟାରୁ ଓମ ବିର୍ଲା, ଛତିଶଗଡ଼ ରାଜନନ୍ଦଗାଁଓ ଆସନରୁ ଭୂପେଶ ବଘେଲ, କେରଳର ଥିରୁଅନନ୍ତପୁରମରେ ରାଜୀବ ଚନ୍ଦ୍ରଶେଖର, ଶଶୀ ଥରୁରଙ୍କ ଭଳି ପ୍ରାର୍ଥୀଙ୍କ ପାଇଁ ମତସାବ୍ୟସ୍ତ କରିବେ ମତଦାତା ।
ଏପ୍ରିଲ ୧୯ତାରିଖରେ ଅନୁଷ୍ଠିତ ପ୍ରଥମ ପର୍ଯ୍ୟାୟ ମତଦାନରେ ପ୍ରାୟ ୬୪ ପ୍ରତିଶତ ମତଦାନ ହୋଇଥିଲା । ଚଳିତ ଲୋକସଭା ନିର୍ବାଚନ ୭ଟି ପର୍ଯ୍ୟାୟରେ ଅନୁଷ୍ଠିତ ହେଉଛି । ଜୁନ୍ ପହିଲାରେ ଶେଷ ପର୍ଯ୍ୟାୟ ଓ ଜୁନ୍ ୪ ତାରିଖରେ ଭୋଟ ଗଣତି ହେବା ସହ ଫଳାଫଳ ପ୍ରକାଶ ପାଇବ ।