ନୂଆଦିଲ୍ଲୀ: ୨୦୨୪ ଚତୁର୍ଥ ପର୍ଯ୍ୟାୟ ଲୋକସଭା ନିର୍ବାଚନ ମେ ୧୩ (ସୋମବାର)ରେ ହେବ । ଏଥିପାଇଁ ଶନିବାର (ମେ ୧୧) ନିର୍ବାଚନ ପ୍ରଚାର ଶେଷ ହୋଇଯାଇଛି। ଚତୁର୍ଥ ପର୍ଯ୍ୟାୟରେ ୧୦ ଟି ରାଜ୍ୟରେ ମୋଟ ୯୬ ଟି ଲୋକସଭା ଆସନରେ ଭୋଟ୍ ଗ୍ରହଣ କରାଯିବ। ଏହି ପର୍ଯ୍ୟାୟରେ ଓଡ଼ିଶାର ୪ଟି ଲୋକସଭା ଆସନ ବ୍ରହ୍ମପୁର, କୋରାପୁଟ,କଳାହାଣ୍ଡି ଓ ନବରଙ୍ଗପୁରରେ ଭୋଟ୍ ପଡ଼ିବ। 

ସେହିପରି ଆନ୍ଧ୍ରପ୍ରଦେଶର ୨୫ ଟି ଆସନ ଏବଂ ତେଲେଙ୍ଗାନାର ସମସ୍ତ ୧୭ ଟି ଆସନରେ ମତଦାନ ହେବ। ଏହା ବ୍ୟତୀତ ଉତ୍ତରପ୍ରଦେଶରେ ୧୧ ଟି, ମହାରାଷ୍ଟ୍ରରେ ୧୧ ଟି, ମଧ୍ୟପ୍ରଦେଶ ଏବଂ ପଶ୍ଚିମବଙ୍ଗରେ ୮ ଟି, ବିହାରରେ ୫ ଟି, ଝାଡ଼ଖଣ୍ଡରେ ୪ ଟି ଏବଂ ଜାମ୍ମୁ କାଶ୍ମୀରରେ ଗୋଟିଏ ଆସନରେ ମତଦାନ ହେବ। ଚତୁର୍ଥ ପର୍ଯ୍ୟାୟ ଭୋଟ ସରିବା ସହ ମୋଟ ୨୩ ଟି ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳର ମୋଟ ୩୮୧ ଟି ଆସନରେ ଭୋଟ୍ ଶେଷ ହୋଇଯିବ। ସେହିପରି ସୋମବାର ମଧ୍ୟ ଆନ୍ଧ୍ରପ୍ରଦେଶରେ ବିଧାନସଭା ନିର୍ବାଚନ ଅନୁଷ୍ଠିତ ହେବ।

ଚତୁର୍ଥ ପର୍ଯ୍ୟାୟ ନିର୍ବାଚନରେ ମଧ୍ୟ ବହୁ ହେଭିଓ୍ବେଟଙ୍କ ଭାଗ୍ୟ ପରୀକ୍ଷା ହେବ। କନ୍ନୌଜରୁ ଅଖିଳେଶ ଯାଦବ, ଶ୍ରୀନଗରରୁ ଓମାର ଅବଦୁଲ୍ଲା, ବେଗୁସରାଇରୁ କେନ୍ଦ୍ର ମନ୍ତ୍ରୀ ଗିରିରାଜ ସିଂ, ବହରାମପୁରର ଅଧିର ରଂଜନ ଚୌଧୁରୀ, କୃଷ୍ଣନଗରରୁ ମହୁଆ ମୋଇତ୍ର, ଆସାନସୋଲରୁ ଶତ୍ରୁଘ୍ନ ସିହ୍ନା ଓ କଡପ୍ପୋ ଆସନରୁ ୱାଇଏଶ ଶର୍ମିଲା, ହାଇଦ୍ରାବାଦରୁ ଅସଦୁଦ୍ଦିନ ଓୱେସୀଙ୍କ ପାଇଁ ସୋମବାର ଭୋଟ୍‌ ଗ୍ରହଣ କରାଯିବ।