ତିହିଡି, (ଅଭୟ ପତି): ଥରକୁ ଥର "ପ୍ରମେୟ' ମାଧ୍ୟମରେ ପ୍ରଶାସନକୁ ସଜାଗ ରହିବା ପାଇଁ ଖବର ପ୍ରକାଶିତ ହୋଇଥିଲା ଯେ, ନିର୍ବାଚନରେ ଜାଲ୍ ନୋଟ୍ ଓ ବିଷାକ୍ତ ମଦ ତିହିଡ଼ି-ଚାନ୍ଦବାଲି ଅଞ୍ଚଳରେ କାରବାର ହେବ । ମାତ୍ର ଏଥିପ୍ରତି ଧ୍ୟାନ ଦେଲାନି ପ୍ରଶାସନ । ଶେଷକୁ ତିହିଡ଼ି-ପୀରହାଟ ଅଞ୍ଚଳ ମଦ ମୃତ୍ୟୁ ଭଳି ଏକ ଅପବାଦ ମୁଣ୍ଡାଇଲା ।
୨୦୧୯ ଏପ୍ରିଲ୍ରେ ଘଟିଥିବା ଏହି ଘଟଣାରେ ୪ ଜଣଙ୍କର ଜୀବନ ଯିବା ସହ ଜଣେ ସାରା ଜୀବନ ଅନ୍ଧ ହୋଇଗଲେ । ସଧବାଙ୍କ ହାତରୁ ଭାଙ୍ଗିଗଲା ଶଙ୍ଖା, ମଥାରୁ ପୋଛିଗଲା ସିନ୍ଦୁର । ଏହା ଆଗରୁ ୨୦୧୭ ଏପ୍ରିଲ ୨୩ରେ ବିଷାକ୍ତ ବିଦେଶୀ ମଦ ମଧ୍ୟ ଜୀବନ ନେଇଥିଲା । ସେତେବେଳେ ଅବକାରୀ ସୁପରିଣ୍ଟେଣ୍ଡେଣ୍ଟ୍ ଭଦ୍ରକ ଆସି ଏହାକୁ ଅତି ଖାମଖିଆଲ ଭାବେ ନେଇଥିଲେ । ଦୁଇ ଜଣଙ୍କର ସେ ସମୟରେ ଜୀବନ ଯାଇଥିଲା । ୧୫ ଅସୁସ୍ଥ ହେଲେ । ତଥାପି ଚେତିଲା ନାହିଁ ପ୍ରଶାସନ । ଏହାର କିଛିଦିନ ପରେ ତିହିଡ଼ି ଥାନାଠାରୁ ମାତ୍ର ଗୋଟିଏ କିଲୋମିଟର ଦୂର ତିହିଡ଼ି କଲେଜ ଛକରେ ନକଲି ମଦ କାରଖାନା ଠାବ ହେଲା । ଏପରିକି ୨୦୧୮ରେ ନକଲି ଜାଲ୍ ନୋଟ କାରବାର ମଧ୍ୟ ଠାବ ହେଲା ପୀରହାଟରେ । ଏସବୁ ପ୍ରତି ପୁଲିସ, ଅବକାରୀ ବିଭାଗ ଓ ପ୍ରଶାସନ, ରାଜନେତା ଆଖି ବୁଜି ଦେଲେ ।
ସେହିପରି ୨୦୧୯ ଏପ୍ରିଲ ୨୯ ତାରିଖ ବିଳମ୍ବିତ ରାତ୍ରିରେ ଏହି ମଦ ଏମିତି କାରନାମା ସୃଷ୍ଟି କଲା ଯେ, ତିହିଡ଼ି-ଚାନ୍ଦବାଲିରେ ୩୦ ତାରିଖ ସକାଳ ବେଳକୁ ୪ ଜଣଙ୍କ ଜୀବନ ଗଲା । ଏପରିକି ତିହିଡ଼ି ଓ ଭଦ୍ରକ ଡାକ୍ତରଖାନାରେ ୪୩ ଜଣ ଚିକିତ୍ସିତ ହୋଇଥିବାବେଳେ ରାଜଧାନୀକୁ ୪, କଟକ ବଡ଼ ଡାକ୍ତରଖାନାକୁ ୪, ଘରୋଇ ହସ୍ପିଟାଲକୁ ୨ ଗୁରୁତର ଚିକିତ୍ସା ପାଇଁ ଯାଇଥିଲେ । ମେ ୧ ତାରିଖ ଯାଏ ୧୫ ଜଣଙ୍କ ଅବସ୍ଥା ସଙ୍ଗିନ ଥିଲା ।
ନିର୍ବାଚନ ପାଇଁ ଆସିଥିଲା ମଦ
୨୦୧୯ ସାଧାରଣ ନିର୍ବାଚନର ଏପ୍ରିଲ ୨୯ ଥିଲା ଶେଷ ନିର୍ବାଚନ ପ୍ରକ୍ରିୟା । ଏହି ନିର୍ବାଚନ ପ୍ରକ୍ରିୟା ପାଇଁ ବିଭିନ୍ନ ରାଜନୈତିକ ଦଳର ନେତା ମଦ, ମାଂସ ଭୋଜି ଓ ଟଙ୍କା ବଣ୍ଟନ ଉପରେ ଗୁରୁତ୍ୱ ଦେଇଥିଲେ । ବିଷାକ୍ତ ମଦ ପିଇ ତିହିଡ଼ି ଥାନା ଅନ୍ତର୍ଗତ ପୀରହାଟ ଅଞ୍ଚଳର ଦୌଲତପୁର ଓ ବାମନବିନ୍ଧା ଗାଁର ଯେଉଁ ୪ ଜଣ ବ୍ୟକ୍ତି ମୃତ୍ୟୁବରଣ କଲେ ସମସ୍ତେ ତତ୍କାଳୀନ ଶାସକ ଦଳର କର୍ମୀ ଥିଲେ ।
ମୃତକଙ୍କ ପରିବାରର ପିଲାମାନେ ଗଣମାଧ୍ୟମ ଆଗରେ ସ୍ୱୀକାର କରିଥିଲେ ଯେ, ତାଙ୍କ ବାପା ଦିନ ୧୧ଟାରୁ ସନ୍ଧ୍ୟା ଯାଏଁ ଥରକୁ ଥର ଏହି ବିଷାକ୍ତ ମଦ୍ୟପାନ କରିଥିଲେ । ପରେ ରାତି ୩ଟା ପରେ ଗୁରୁତର ହେବାରୁ ତାଙ୍କର ମୃତ୍ୟୁ ହୋଇଥିଲା । ମୃତକମାନେ ଥିଲେ ଘନଶ୍ୟାମ ପଢ଼ିଆରିଙ୍କ ପୁଅ ଦୌଲତପୁର ଗ୍ରାମର ରାମଚନ୍ଦ୍ର ପଢିଆରି (୫୫), ନମେଇସାହି ଗ୍ରାମର ହରିହର ନାୟକଙ୍କ ପୁଅ ସାଧୁ ନାୟକ, ପୀରହାଟ ମଝି ବଜାରର କୁନା ଜେନା ଓ ଦୌଲତପୁର ଗାଁର ରତ୍ନାକର ପରିଡ଼ାଙ୍କ ପୁଅ ଶଙ୍କର୍ଷଣ ପରିଡ଼ା । ଏହା ସହ ବିନ୍ଧା ଅଞ୍ଚଳର ଶଙ୍କରା ଦାସ ଅନ୍ଧ ହୋଇଗଲେ ।
୨୯ ରାତିରୁ ଆତଙ୍କ ଖେଳିଲା
ଏପ୍ରିଲ ୨୯ ରାତି ପ୍ରାୟ ୩ଟା ବେଳେ ପ୍ରଥମେ ରାମଚନ୍ଦ୍ର ପଢ଼ିଆରିଙ୍କ ନିଜ ଘରେ ମୃତ୍ୟୁ ହୋଇଥିଲା । ଏହା ପରେ ଆତଙ୍କ ଖେଳି ଯାଇଥିଲା । ଜଣଙ୍କ ପରେ ଜଣେ ତିହିଡ଼ି ଡାକ୍ତରଖାନାକୁ ରାତିରେ ବୁହା ହୋଇଥିଲେ । କେତେକଙ୍କୁ ଭଦ୍ରକ ଡାକ୍ତରଖାନାକୁ ଆମ୍ବୁଲାନ୍ସ ଏବଂ କାର୍ରେ ବୁହା ଯାଇଥିଲା । ସକାଳ ୭ଟା ବେଳକୁ ଆଉ ଦୁଇଜଣଙ୍କ ମୃତ୍ୟୁ ହେଲା ପରେ ଗୁରୁତରଙ୍କୁ କଟକ ନେବାର ବନ୍ଦୋବସ୍ତ କରାଗଲା । କଟକ ନେଉ ନେଉ ଜଣଙ୍କର ମୃତ୍ୟୁ ହୋଇଥିବାବେଳେ କଟକରେ ଆଉଜଣଙ୍କର ମୃତ୍ୟୁ ହେଲା । ଏହି ବିଷାକ୍ତ ମଦ ପିଇଥିବା ଶତାଧିକ ବ୍ୟକ୍ତି ଆତଙ୍କିତ ହୋଇପଡ଼ିଥିଲେ । ବେସରକାରୀ ଭାବେ ସେମାନେ ନିଜ ସମ୍ମାନ ପାଇଁ ବିଭିନ୍ନ ନର୍ସିଂହୋମ୍ ଓ ପ୍ରାଇଭେଟ୍ ହସ୍ପିଟାଲରେ ଭର୍ତ୍ତି ହୋଇ ଚିକିତ୍ସିତ ହେଉଥିଲେ ।
ଚପାଇ ଦିଆଯାଇଥିଲା ମଦ ମୃତ୍ୟୁ
ନିର୍ବାଚନ ପାଇଁ ଆସିଥିବା ମଦ ପାଇଁ ଏହି ଘଟଣା ଘଟିଥିବାରୁ ସାଧାରଣ ଜନତା ଏପରିକି ବରିଷ୍ଠ ବିଜେପି ନେତା ମନମୋହନ ସାମଲ ମଧ୍ୟ ରାଜପଥରେ ଧାରଣାରେ ବସିଥିଲେ । ତଥାପି ମଧ୍ୟ ଅବକାରୀ ବିଭାଗର ଭୂମିକା ଅସ୍ପଷ୍ଟ ରହିଥିଲା । ଗୋଟିଏ ପଟେ ପୀରହାଟ ଗୁମୁରି ଗୁମୁରି କାନ୍ଦୁଥିବା ବେଳେ ଅନ୍ୟପଟେ ଚାଲିଥିଲା ରାସ୍ତାରୋକ ଓ ପୋଡ଼ାଜଳା । କଂଗ୍ରେସ ନେତା ଓ କର୍ମୀ ବି ଧାରଣା ଧର୍ମଘଟରେ କରିଥିଲେ । ତଥାପି ମଧ୍ୟ ନିଦାବିଷ୍ଣୁ ପାଲଟି ଯାଇଥିଲା ଅବକାରୀ ବିଭାଗ । ଘଟଣାକୁ ଚପାଇ ଦିଆଯିବାକୁ ପ୍ରୟାସ କରାଯାଇଥିଲା ।
ପୁଣି ଦେଖାଦେଇପାରେ ଦୌଲତପୁର
ଆତଙ୍କ ଦୌଲତପୁର ଭଳି ତିହିଡ଼ି ବ୍ଲକ୍ର ଆହୁରି ୩ଟି ପଞ୍ଚାୟତରେ ମଦ ମୃତ୍ୟୁ ହେବା ଆଶଙ୍କା ଦେଖାଦେଇଛି । ଏବେ ବି ପ୍ରଶାସନର ନିଦ ଭାଙ୍ଗୁ ନାହିଁ । ନକଲି ବିଦେଶୀ ମଦ ପ୍ରବଳ ମାତ୍ରାରେ ତିଆରି ହେଉଛି । ସବୁ ଜାଣି ମଧ୍ୟ ପ୍ରଶାସନ ଆଖି ବୁଜି ଦେଇଛି । ତିହିଡ଼ି ତହସିଲ୍ ପରିସରରେ ଅବକାରୀ ବିଭାଗ ଥାନା ଖୋଲାଯାଇଥିଲେ ମଧ୍ୟ ମାସରେ ୩୦ ଦିନ ତାଲା ଝୁଲୁଛି । ତିହିଡ଼ି ବ୍ଲକ୍ର ଗାଁ ଗାଁ ଓ ସାହିକୁ ସାହି ଦେଶୀ ମଦ କାରଖାନା ଖୋଲାଯାଇଛି । ଗୋଟିଏ ପଟେ ନକଲି ବିଷାକ୍ତ ମଦ କାରଖାନା ଅନ୍ୟପଟେ ଦେଶୀ ଓ ଚୁଲେଇ ଭାଟି ଯାହାକୁ ଯେତେ ଚାଲିଛି । ଏଥିରେ ରୋକ୍ ନ ଲାଗିଲେ ଆଗାମୀ ଦିନରେ ୨୦୧୯ ଘଟଣାର ପୁନରାବୃତ୍ତି ଘଟିବା ନେଇ ଆଶଙ୍କାକୁ ଏଡ଼ାଇ ଦିଆଯାଇ ନପାରେ ।
ମଦ ସାଙ୍ଗକୁ ବ୍ୟାପିଗଲାଣି ବ୍ରାଉନସୁଗର୍
ତିହିଡ଼ି ବ୍ଲକ୍ରେ କେବଳ ଏହି ବିଷାକ୍ତ ମଦ ଜୀବନ ନେଇନାହିଁ ବରଂ ବ୍ରାଉନସୁଗର୍ ଦୁଇଜଣଙ୍କ ଜୀବନ ନେଲାଣି । ଜଳେଶ୍ୱର ଓ ବସ୍ତା ଅଞ୍ଚଳର ବେପାରୀମାନେ ଏହି ବ୍ରାଉନସୁଗର୍ ଆଣି ତିହିଡ଼ିର ଛୋଟ ବେପାରୀଙ୍କୁ ଦେଉଛନ୍ତି । ରାତିରେ କୋଇଲା ଚୋରି ଅର୍ଥ ଏହି ନିଶା କାରବାରରେ ମଧ୍ୟସ୍ଥି ସାଜିଛି । ବ୍ରାଉନ୍ସୁଗର କାରବାର ଗଳିକନ୍ଦିକୁ ବ୍ୟାପିଗଲାଣି ।
