ଢେଙ୍କାନାଳ ୦୪/୦୩: ଜଙ୍ଗଲୀ ଜନ୍ତୁ ଶିକାର ପାଇଁ ରଖାଯାଇଥିବା ବୋମା ଖାଇ ଏକ ହାତୀ ଗୁରୁତର ହୋଇପଡ଼ିଛି । ହାତୀର ପାଟିରେ ବୋମାଟି ଫୁଟି ଯିବାରୁ ତାରସମ୍ମୁଖ ଭାଗ ନଷ୍ଟ ହୋଇଯାଇଛି । ହାତୀଟି ଖାଦ୍ୟ ଗ୍ରହଣ କରିପାରୁନଥିବାରୁ ତାର ଜୀବନ ସଙ୍କଟରେ ପଡ଼ିଛି । ହାତୀଟିକୁ ଉଦ୍ଧାର କରାଯାଇ କପିଳାସ ଚିଡ଼ିଆଖାନା ପରିସରରେ ଥିବା ହାତୀ ଉଦ୍ଧାର କେନ୍ଦ୍ରରେ ରଖାଯାଇ ଚିକିତ୍ସା ଜାରି ରହିଛି ।
ସୂଚନା ଅନୁସାରେ, ଢେଙ୍କାନାଳ ସଦର ବନାଞ୍ଚଳ ଅନ୍ତର୍ଗତ ମେଘା ଜଙ୍ଗଲର କାଇମାଟି ଲୋଚାପଲ୍ଲୀ ନିକଟରେ ଗତ ଶୁକ୍ରବାର ଦିନ ଏକ ହାତୀ ଅସୁସ୍ଥ ଅବସ୍ଥାରେ ବୁଲୁଥିଲା । କିଛି ଖାଦ୍ୟ ଗ୍ରହଣ କରିନପାରି ଜଙ୍ଗଲରେ ଡହଳବିକଳ ହେଉଥିଲା । ବନବିଭାଗ କର୍ମଚାରୀମାନେ ଖବରପାଇ ହାତୀ ନିକଟରେ ପହଞ୍ଚିଥିଲେ । ଉପରିସ୍ଥ ଅଧିକାରୀଙ୍କ ନିର୍ଦ୍ଦେଶକ୍ରମେ ଅସୁସ୍ଥ ହାତୀକୁ ଟ୍ରାଙ୍କୁଲାଇଜ୍ କରି ଏକ ଟ୍ରକ୍ରେ କପିଳାସ ହାତୀ ଉଦ୍ଧାର କେନ୍ଦ୍ରକୁ ଅଣାଯାଇଥିଲା । ଉଦ୍ଧାର ମାଈହାତୀଟିର ବୟସ ୧୧ ବର୍ଷ ହେବ । ରାସାୟନିକ ପଦାର୍ଥରେ ତିଆରି ବୋମା ଚୋବାଇଦେବା ଦ୍ୱାରା ହାତୀଟିର ସମ୍ମୁଖ ଭାଗ ସମେତ ପାଟିର ଆଭ୍ୟନ୍ତରିଣ ଅଂଶରେ ଗୁରୁତର କ୍ଷତ ସୃଷ୍ଟି ହୋଇଥିବା ଦେଖିବାକୁ ମିଳିଥିଲା । ସାତକୋଶିଆ, ଭୁବନେଶ୍ୱର ଓୟୁଏଟି ସମେତ କପିଳାସର ପ୍ରାଣୀ ଚିକିତ୍ସକ ଓ ବନ କର୍ମଚାରୀଙ୍କ ସହାୟତାରେ ଅସୁସ୍ଥ ହାତୀଟିର ଚିକିତ୍ସା କରାଯାଇଥିଲା । ଚିକିତ୍ସାର ଦୁଇଦିନ ସତ୍ତେ୍ୱ ବି ହାତୀଟି କୌଣସି ଖାଦ୍ୟପଦାର୍ଥ ଗ୍ରହଣ କରିପାରୁନାହିଁ । କେବଳ ଆଣ୍ଟିବାୟୋଟିକ୍ ଓ ସାଲାଇନ୍ ଦିଆଯାଉଛି । ପାଟିରେ କ୍ଷତ ସୃଷ୍ଟି ହୋଇଥିବାରୁ ଖାଦ୍ୟ ଦେଲେ ମଧ୍ୟ ତାହାକୁ ଏଡ଼ାଇ ଦେଉଛି । ପ୍ରାଣୀ ଚିକିତ୍ସକମାନେ ହାତୀର ଚିକିତ୍ସା କରୁଥିବା ବେଳେ ତାର ଜୀବନ ସଙ୍କଟାପନ୍ନ ଥିବା ରହିଥିବା ସୂଚନା ମିଳିଛି । ହାତୀଟିର ଚିକିତ୍ସା ଚାଲିଛି । ହାତୀଟି ସୁସ୍ଥ ହୋଇଯିବ ବୋଲି ଆଶା ରହିଥିବା ଢେଙ୍କାନାଳ ବନଖଣ୍ଡ ଅଧିକାରୀ ସୁମିତ କର ପ୍ରକାଶ କରିଛନ୍ତି ।