ଭୁବନେଶ୍ଵର, ୨୧/୦୫ : ଇଓଡବ୍ଲ୍ୟୁ ପଞ୍ଝାରେ କ୍ଵିକ୍ କ୍ଲିକ୍ ଆଡ ମିଡିଆ କମ୍ପାନୀ ପାର୍ଟନର୍। ୨ କୋଟି ଟଙ୍କାର ଠକେଇ ଅଭିଯୋଗରେ ଅଭିଯୁକ୍ତ ବିମଳାନନ୍ଦ ଭୂୟାଁଙ୍କୁ ଲକ୍ଷ୍ନୌରୁ ଗିରଫ କଲା ଇଓଡବ୍ଲ୍ୟୁ। ଗିରଫ ଅଭିଯୁକ୍ତଙ୍କୁ କୋର୍ଟରେ ହାଜର କରାଯାଇଥିଲା। ତାଙ୍କୁ ଟ୍ରାଞ୍ଜିଟ୍ ରିମାଣ୍ଡରେ ଭୁବନେଶ୍ଵର ଅଣାଯିବ। 

ସୂଚନାନୁଯାୟୀ, ବିକାଶ ପୋଡାର ନାମକ ଜଣେ ବ୍ୟକ୍ତି କ୍ଵିକ୍ କ୍ଲକ୍ ଆଡ୍ ମିଡିଆ କମ୍ପାନୀ ବିରୋଧରେ ଅଭିଯୋଗ କରିଥିଲେ। ତାଙ୍କ ଅଭିଯୋଗ ଆଧାରରେ ମାମଲା ପଞ୍ଜିକୃତ ହୋଇଥିଲା। ତଦନ୍ତ ପରେ ମାଲକାନଗିରିର ବିମଳାନନ୍ଦ ଭୂୟାଁ ଏବଂ ତାଙ୍କ ପତ୍ନୀ ରାମି ଭୂୟାଁ ୫୩ ଜଣ ନିବେଶକଙ୍କ ଠାରୁ ଠକେଇ କରିଥିବା ଜଣାପଡ଼ିଥିଲା। ଏଲଇଡି ଯୋଗାଣ ବାହାନାରେ ସେମାନେ ପ୍ରାୟ ୨ କୋଟି ଟଙ୍କାର ଠକେଇ କରିଥିଲେ। ବିଜ୍ଞାପନରୁ ଆକର୍ଷଣୀୟ ଲାଭ ପାଇବାକୁ ସେମାନଙ୍କ ସହିତ ବିନିଯୋଗ କରିବା ଉଚିତ୍ ବୋଲି କହି ଲୋକଙ୍କୁ ଭୂଆଁ ବୁଲାଇଥିଲେ। 

ଛତିଶଗଡ ରାୟପୁର ଶ୍ୟାମନଗରରେ କ୍ଵିକ୍ କ୍ଲିକ୍ ଆଡ ମିଡିଆ କମ୍ପାନୀର ରହିଛି ମୁଖ୍ୟ କାର୍ଯ୍ୟାଳୟ। ଛତିଶଗଡ଼ ଜଗଦଲପୁର ଏବଂ ଭୁବନେଶ୍ଵର ଜୟଦେବ ବିହାରରେ ରହିଛି ଏହାର ଶାଖା କାର୍ଯ୍ୟାଳୟ। କ୍ଵିକ୍ କ୍ଲିକ୍ ଆଡ ମିଡିଆ କମ୍ପାନୀର ପାର୍ଟନର ଥିଲେ ଅଭିଯୁକ୍ତ ବିମଳାନନ୍ଦ ଭୂୟାଁ ଏଵଂ ତାଙ୍କ ପତ୍ନୀ ରାମି ଭୂୟାଁ। ୨୦୧୭-୧୮ରେ ସେମାନେ ଲୋକଙ୍କୁ ଅଧିକ ରିଟର୍ଣ୍ଣ ଦେବା ଆଶାରେ ସେମାନଙ୍କ ସଂସ୍ଥାରେ ବିନିଯୋଗ କରିବା ପାଇଁ ଲୋଭ ଦେଖାଇଥିଲେ। ଏମାନେ ମୁଖ୍ୟତଃ ଖୋର୍ଦ୍ଧା, କୋରାପୁଟ, ନୟାଗଡ଼, ମୟୂରଭଞ୍ଜ, ବାଲେଶ୍ଵର, ରାଉରକେଲା, ସମ୍ବଲପୁର, ଗଞ୍ଜାମ ଇତ୍ୟାଦି ଅଞ୍ଚଳ ଗୁଡ଼ିକରେ ସେମାନଙ୍କ ନେଟୱାର୍କ ବିସ୍ତାର କରିଥିଲେ। ଏହିଭଳି ଭାବେ ୧୦୦ରୁ ଅଧିକ ନିବେଶକଙ୍କ ଠାରୁ ସେ ୨ କୋଟିରୁ ଉର୍ଦ୍ଧ୍ଵ ଟଙ୍କାର ଠକେଇ କରିଥିଲେ। ଏମାନେ ଦୀର୍ଘଦିନ ହେଲା ଫେରାର୍ ରହିଥିଲେ।