ଲଣ୍ଡନ, ୨୫/୦୩: ଲଣ୍ଡନରେ ଭାରତୀୟ ଛାତ୍ରୀଙ୍କ ମୃତ୍ୟୁ । ୩୩ ବର୍ଷୀୟ ଚେଇସ୍ତା କୋଚରଙ୍କ ମୃତ୍ୟୁ ଗତ ସପ୍ତାହରେ ହୋଇଛି । ସେ ସାଇକେଲ୍ ଯୋଗେ ଘରକୁ ଫେରୁଥିବା ବେଲେ ତାଙ୍କୁ ଏକ ଟ୍ରକ୍ ଚାପି ଦେଇଥିଲା । ଫଳରେ ତାଙ୍କର ମୃତ୍ୟୁ ହୋଇଛି । ଚେଇସ୍ତା ପୂର୍ବରୁ ନୀତି ଆୟୋଗଙ୍କ ସହ କାମ କରିଥିବା ବେଳେ ଏବ ଲଣ୍ଡନ ସ୍କୁଲ୍ ଅଫ୍ ଇକୋନୋମିକ୍ସରେ ପିଏଚଡି କରୁଥିଲେ ।

ନୀତି ଆୟୋଗର ପୂର୍ବତନ ସିଇଓ ଅମିତାଭ କାନ୍ତ ଏକ ଅନଲାଇନ୍ ପୋଷ୍ଟରେ ଚେଇସ୍ତା କୋଚରଙ୍କ ଦେହାନ୍ତ ନେଇ ସୂଚନା ଦେଇଛନ୍ତି । ଅମିତାଭ ଏକ୍ସରେ ଲେଖିଛନ୍ତି, ଚେଇସ୍ତା କୋଚର ମୋ ସହ ଲାଇଫ୍ କାର୍ଯ୍ୟକ୍ରମରେ କାମ କରୁଥିଲେ । ଲଣ୍ଡନରେ ସାଇକେଲ୍ ଚଳାଇବା ବେଳେ ଏକ ଭୟଙ୍କର ଦୁର୍ଘଟଣାର ଶିକାର ହୋଇ ମୃତ୍ୟୁବରଣ କରିଛନ୍ତି ।

ସୂଚନା ଅନୁସାରେ, ମାର୍ଚ୍ଚ ୧୯ରେ ଚେଇସ୍ତା କୋଚର ସାଇକେଲ୍ ଯୋଗେ ଫେରୁଥିବା ବେଳେ ତାଙ୍କୁ ଏକ ଟ୍ରକ୍ ଧକ୍କା ଦେଇଥିଲା । ଦୁର୍ଘଟଣା ସମୟରେ ଚେଇସ୍ତାଙ୍କ ସ୍ୱାମୀ ତାଙ୍କ ଆଗେ ଆଗେ ଯାଉଥିଲେ । ଟ୍ରକ୍ ଧକ୍କା ପରେ ସେ ତୁରନ୍ତ ବଞ୍ଚାଇବା ପାଇଁ ପ୍ରୟାସ କରିଥିଲେ, ହେଲେ ଘଟଣାସ୍ଥଳରେ ଚେଇସ୍ତା ଆଖି ବୁଜିଥିଲେ ।

ଗୁରୁଗ୍ରାମରେ ରହୁଥିବା ଚେଇସ୍ତା ପିଏଚଡି କରିବା ଲାଗି ଲଣ୍ଡନକୁ ଗତବର୍ଷ ସେପ୍ଟେମ୍ବର ଯାଇଥିଲେ । ଏହା ପୂର୍ବରୁ ସେ ଦିଲ୍ଲୀ ବିଶ୍ୱବିଦ୍ୟାଳୟ, ଅଶୋକ ବିଶ୍ୱବିଦ୍ୟାଳୟ ଓ ପେନସିଲଭାନିଆ ଏବଂ ଚିକାଗୋ ବିଶ୍ୱବିଦ୍ୟାଳୟରେ ଅଧ୍ୟୟନ କରୁଥିଲେ ।