କଟକ,୦୮/୦୨: ଚୋରା ନିଶା ବେପାରୀକୁ ପିଛା କରି ଗୋଡ଼େଇ ଧରିବାକୁ ଅବକାରୀ ଥାନା ଅଧିକାରୀଙ୍କ ପାଖରେ ଗାଡ଼ି ନାହିଁ । ଥାନା ଅଫିସର, କର୍ମଚାରୀମାନେ ନିଜ ବାଇକ୍, ସ୍କୁଟର୍ରେ ଅଭିଯୁକ୍ତଙ୍କୁ ପିଛା କରୁଛନ୍ତି । କେବେ କେବେ ଧରି ନିଶା ସାମଗ୍ରୀ ଜବତ କରୁଛନ୍ତି । ଅନେକ ସମୟରେ କିନ୍ତୁ ଅପରାଧୀ ଖସିଯାଉଛନ୍ତି । ରାଜ୍ୟର ଅଧିକାଂଶ ଅବକାରୀ ଥାନାରେ ଏମିତିକା ଦୟନୀୟ ଅବସ୍ଥା ।
ରାଜ୍ୟରେ ୩୩ଟି ଅବକାରୀ ଜିଲ୍ଲାରେ ୨୦୧ ଅବକାରୀ ଥାନା ରହିଛି । ଏସବୁ ଥାନାରେ ଗୋଟିଏ ହେଲେ ଚାରିଚକିଆ ଗାଡ଼ି ନାହିଁ । କେବଳ ୩୩ ଅବକାରୀ ଜିଲ୍ଲାରେ ଥିବା ୩୩ଟି ମଡେଲ୍ ଅବକାରୀ ଥାନା ଭଡ଼ା ଗାଡ଼ି ବ୍ୟବହାର କରିପାରିବେ ବୋଲି ବିଭାଗର ଅନୁମତି ରହିଛି । ବାକି ଅନ୍ୟ ଅବକାରୀ ଥାନା ପାଇଁ ସରକାରୀ ଗାଡ଼ି ତ ଦୂରର କଥା, ଭଡ଼ା ଗାଡ଼ି ବ୍ୟବସ୍ଥା ବା ଅନୁମତି ନାହିଁ ।
ରାଜ୍ୟବ୍ୟାପୀ ସହରାଞ୍ଚଳଠୁ ଗ୍ରାମାଞ୍ଚଳ ଯାଏ ସବୁଠି ବେଆଇନ ନିଶା କାରବାର ଜନିତ ଅପରାଧ ବୃଦ୍ଧି ପାଉଛି । ନିଶା ମାଫିଆମାନେ ସମସ୍ତଙ୍କୁ ଚକ୍ମା ଦେଇ ବ୍ରାଉନ୍ସୁଗର୍, ଗଞ୍ଜେଇ ଏବଂ ମଦ ଚୋରାଚାଲାଣ କରୁଛନ୍ତି । ହେଲେ ଅବକାରୀ ଥାନା ସ୍ତରରେ ଗାଡ଼ି ନଥିବାରୁ ବିଭାଗୀୟ ଅଧିକାରୀମାନେ ରେଞ୍ଜ୍ ସ୍ତରରେ ଥିବା ଅଫିସର୍ମାନଙ୍କ ଗାଡ଼ି ଧରି ଧରପଗଡ଼ କରୁଛନ୍ତି । ରାଜ୍ୟର ୭୧ଟି ରେଞ୍ଜରେ ସବୁଠି ମଧ୍ୟ ଗାଡ଼ି ନାହିଁ । ରେଞ୍ଜ ସ୍ତରରେ ଥିବା ଇନ୍ସପେକ୍ଟରମାନେ ଭଡ଼ା ଗାଡ଼ି ଆଣି କେବେ କେମିତି ଅବକାରୀ ଥାନାକୁ ଚଢଉ, ଧରପଗଡ଼ରେ ସହାୟତା କରୁଛନ୍ତି । ଏମିତି ଚାଲିଛି । ପୁଲିସ ପରି ଅବକାରୀ ବିଭାଗ ଏନଫୋର୍ସମେଣ୍ଟ୍ କାର୍ଯ୍ୟ କରୁଥିଲେ ମଧ୍ୟ ଉକ୍ତ ବିଭାଗରେ ସରକାରୀ ଗାଡ଼ି ନ ରହିବା ନେଇ ବିଭାଗର ଅନେକ ଅଧିକାରୀ ଆଶ୍ଚର୍ଯ୍ୟ ପ୍ରକଟ କରୁଛନ୍ତି । ଏମିତିକି ଘରୋଇ ବ୍ୟକ୍ତିବିଶେଷଙ୍କ ଗାଡ଼ି ଏବଂ ବାହାର ଡ୍ରାଇଭରମାନଙ୍କୁ ନେଇ ଅବକାରୀ ଧରପଗଡ଼ ବର୍ଷ ବର୍ଷ ହେଲା ଚାଲିଛି । ଏହାଦ୍ୱାରା ଅବକାରୀ ବିଭାଗର ଅନେକ ଗୁପ୍ତ ଯୋଜନା ଅଧିକାଂଶ ସମୟରେ ପ୍ରଘଟ ହୋଇଯାଉଛି ।
ଅବକାରୀ ଟିମ୍ ଘଟଣାସ୍ଥଳରେ ଚଢ଼ଉ କରିବା ପୂର୍ବରୁ ଅଭିଯୁକ୍ତ ଚମ୍ପଟ ମାରୁଛନ୍ତି । ଏମିତିକି ଅଭିଯୁକ୍ତ ଆଗୁଆ ସୂଚନା ପାଇ, ପୂରା ପ୍ରସ୍ତୁତ ହୋଇ ଅବକାରୀ କର୍ମଚାରୀଙ୍କ ଉପରେ ଆକ୍ରମଣ କରୁଥିବା ଭଳି ଘଟଣା ମଧ୍ୟ ଘଟୁଛି । ନିକଟ ଅତୀତରେ ଆଠଗଡ଼, ଚୌଦ୍ୱାର, ବାଙ୍କୀ ସମେତ ରାଜ୍ୟର କେତେକ ଅଞ୍ଚଳରେ ଅବକାରୀ କର୍ମଚାରୀମାନେ ନିଶା ମାଫିଆଙ୍କ ଆକ୍ରମଣର ଶିକାର ହୋଇଛନ୍ତି । ଧରପଗଡ଼ ବେଳେ ଯେତିକି ଅଭିଯୁକ୍ତ ଧରାପଡ଼ୁଛନ୍ତି, ତାଠାରୁ ଅଧିକ ଅଭିଯୁକ୍ତ ଖସି ଯାଉଛନ୍ତି ବୋଲି ଅବକାରୀ ବିଭାଗ ପକ୍ଷରୁ ନିକଟରେ ହୋଇଥିବା ଏକ ସମୀକ୍ଷା ବୈଠକରେ ଆଲୋଚନା ହୋଇଥିଲା । ଏନେଇ ବିଭାଗୀୟ ଉଚ୍ଚ କର୍ତ୍ତୃପକ୍ଷ ଅସନ୍ତୋଷ ବ୍ୟକ୍ତ କରିଥିଲେ । ଗାଡ଼ି ସମସ୍ୟା ଯୋଗୁଁ ନିଶା ଚାଲାଣକାରୀଙ୍କୁ ପିଛା କରି ହେଉନଥିବା କଥା କେତେକ ଅଧିକାରୀ କହିଥିଲେ ।
ସେହିପରି ଅବକାରୀ ଥାନାଗୁଡ଼ିକରେ କର୍ମଚାରୀ ଅଭାବ ମଧ୍ୟ ସମସ୍ୟା ହୋଇ ଛିଡ଼ା ହୋଇଛି । ଅଧିକାଂଶ ଥାନାର ଅଫିସର ଇନଚାର୍ଜ ଭାବେ ଏଏସ୍ଆଇମାନେ ଦାୟିତ୍ୱ ସମ୍ଭାଳିଛନ୍ତି । ଆଗକୁ ନିର୍ବାଚନ ଆସୁଛି । ନିର୍ବାଚନ ସମୟରେ ବେଆଇନ ନିଶା କାରବାର ଓ ଚୋରାଚାଲାଣ ଉପରେ ରୋକ ଲଗାଇବା ପାଇଁ ଅବକାରୀ ବିଭାଗ ସକ୍ରିୟ ରହିବା କଥା । ତେବେ ବିଭାଗର ଦୁର୍ବଳ ଭିତ୍ତିଭୂମି ଥାନା ସ୍ତରରେ ଥିବା ଅଫିସରମାନଙ୍କୁ ଚିନ୍ତାରେ ପକାଉଛି । ବିନା ଗାଡ଼ିରେ, ଅଳ୍ପ ସଂଖ୍ୟକ କର୍ମଚାରୀରେ ସେମାନେ କିପରି ଅବକାରୀ ଧରପଗଡ଼ କରିବେ ତାହାକୁ ନେଇ ଆମେ ଏବେ ଚାପ ଓ ଚିନ୍ତା ଭିତରେ ଅଛୁ ବୋଲି କେତେଜଣ ଥାନା ଅଧିକାରୀ କହିଛନ୍ତି । ଏ ସମ୍ପର୍କରେ ବିଭାଗୀୟ ଯୁଗ୍ମ କମିସନର ଡ. ଦିବ୍ୟଲୋଚନ ମହାନ୍ତିଙ୍କ ପ୍ରତିକ୍ରିୟା ନେବାରେ ସେ କହିଛନ୍ତି, ଜିଲ୍ଲାର ମଡେଲ୍ ଅବକାରୀ ଥାନାରେ ଘରୋଇ ଗାଡ଼ି ନେଇ ଧରପଗଡ଼ ଚାଲିଛି । ଯେଉଁ ଥାନାରେ ଗାଡ଼ି ନାହିଁ ସେଠାରେ ଗାଡି଼ ସୁବିଧା ଉପଲବ୍ଧ କରାଇବା ଲାଗି ସରକାରୀ ସ୍ତରରେ ଖୁବ ଶୀଘ୍ର ପଦକ୍ଷେପ ନିଆଯାଉଛି ।