ବାଲେଶ୍ୱର,୧୩/୦୪: ବାଲେଶ୍ୱର ଜିଲ୍ଲା ଅବକାରୀ ବିଭାଗ ହାଜତରେ ଜଣେ ମଦ ବ୍ୟବସାୟୀଙ୍କୁ ଥାର୍ଡ ଡିଗ୍ରୀ ପ୍ରୟୋଗ କରାଯାଇଥିବା ଅଭିଯୋଗ ଆସିଛି । ବ୍ୟବସାୟୀ ଜଣକ ଜିଲ୍ଲା ମୁଖ୍ୟ ଚିକିତ୍ସାଳୟରେ ଚିକିତ୍ସିତ ହେଉଛନ୍ତି । ଅବକାରୀ ବିଭାଗ ପକ୍ଷରୁ ଉକ୍ତ ବ୍ୟବସାୟୀଙ୍କୁ ନିସ୍ତୁକ ମାଡ଼ ମାରି ହତ୍ୟା ଉଦ୍ୟମ କରାଯାଇଥିବା ବୋଲି ତାଙ୍କ ପରିବାର ଲୋକ ଅଭିଯୋଗ ଆଣିଛନ୍ତି ।
ମଦ ବ୍ୟବସାୟୀ ଜଣଙ୍କ ହେଲେ ଟାଉନ ଥାନା ଅନ୍ତର୍ଗତ ପାତ୍ରପଡ଼ା ଅଞ୍ଚଳର ନବକୁମାର ରାୟ(୩୫) । ସେ ଜଣେ ସରକାରୀ ଲାଇସେନ୍ସପ୍ରାପ୍ତ ମଦ ବ୍ୟବସାୟୀ । ତାଙ୍କ ନାମରେ ପାତ୍ରପଡ଼ା, ବଳରାମଗଡ଼ି, ଫୁଲାଡ଼ିରେ ତିନୋଟି ମଦ ଦୋକାନ ଅଛି । ପ୍ରାୟ ୩ ବର୍ଷ ହେଲା ସେ ଏହି ମଦ ଦେକାନଗୁଡ଼କୁ ଚଳାଇ ଆସୁଥିଲେ । ସରକାରୀ ନିର୍ଦ୍ଦେଶକ୍ରମେ ତାଙ୍କର ତିନୋଟି ଯାକ ମଦ ଦେକାନକୁ ଅବକାରୀ ବିଭାଗ ପକ୍ଷରୁ ସିଲ୍ କରାଯାଇଥିଲ । ଏହି ବିଷୟରେ ଆଲୋଚନା କରିବା ପାଇଁ ବିଭାଗ ପକ୍ଷରୁ ତାଙ୍କୁ ଗୁରୁବାର ବାଲେଶ୍ୱର ଅବାକରୀ ଥାନାକୁ ଡାକାଯାଇଥିଲା । ସେ ମଧ୍ୟ ବିଭାଗର ଅଧିକାରୀଙ୍କୁ ଭେଟିବାକୁ ଅସିଥିଲେ । ହେଲେ ସେଠାରେ ତାଙ୍କୁ ଅଟକ ରଖାଯାଇଥିଲା । ଏହି ଖବର ପାଇବା ପରେ ରାତିରେ ନବକୁମାରଙ୍କ ପରିବାର ଲୋକ ତାଙ୍କୁ ଭେଟିବାକୁ ଚାହିଁଥିଲେ । ମାତ୍ର ସେମାନଙ୍କୁ ଭେଟିବାର ସୁଯୋଗ ଦିଆଯାଇନଥିଲା । ନବ କୁମାର ସେଠାରେ ନଥିବା ବିଭାଗ ପକ୍ଷରୁ କୁହାଯାଇଥିଲା । ଫଳରେ ପରିବାର ଅନଲାଇନ୍ ମାଧ୍ୟମରେ ସହଦେବଖୁଣ୍ଟା ଥାନାରେ ଅଭିଯୋଗ କରିଥିଲେ ।
ଶୁକ୍ରବାର ସକାଳେ ନବକୁମାରଙ୍କ ଦେହ ଅସୁସ୍ଥ ଥିବା ଖବର ଅବକାରୀ ବିଭାଗ ପକ୍ଷରୁ ପରିବାରକୁ ଦିଆଯାଇଥିଲା । ପରିବାର ଲୋକ ସେଠାରେ ପହଞ୍ଚିଥିଲେ । ନବକୁମାରଙ୍କୁ ମାରିଦେବା ପାଇଁ ଅବକାରୀ ବିଭାଗ ପକ୍ଷରୁ ଷଡ଼ଯନ୍ତ୍ର କରାଯାଇଥିଲା ବୋଲି ପରିବାର ପକ୍ଷରୁ ଅଭିଯୋଗ କରାଯାଇଥିଲା । ତେବେ ଖବର ଲେଖା ହେବା ସୁଦ୍ଧା ନବକୁମାରଙ୍କ ପରିବାର ଲୋକଙ୍କ ପକ୍ଷରୁ ଏନେଇ ଥାନାରେ କୌଣସି ଅଭିଯୋଗ କରାଯାଇନି ।
ଅପରପକ୍ଷରେ ଅବକାରୀ ବିଭାଗ ଇନ୍ସପେକ୍ଟର କେଶବ ଦାସ ଏଭଳି ଅଭିଯୋଗକୁ ସେ ଖଣ୍ଡନ କରିଛନ୍ତି । ସେ କହିଛନ୍ତି, ନବକୁମାରଙ୍କ ସ୍ୱାସ୍ଥ୍ୟ ଅବସ୍ଥା କଣ ଅଛି³ ସେନେଇ ଚିକିତ୍ସା କରୁଥିବା ଡାକ୍ତରମାନେ କହିବେ । ନବକୁମାର ଏକ ସଙ୍ଗରେ ତିନୋଟି ସରକାରୀ ମଦ ଦୋକାନ ଚଲାଉଛନ୍ତି । ସରକାରୀ ନିୟମ ଅନୁସାରେ ସେ ସରକାରଙ୍କଠାରୁ ମଦ କ୍ରୟ କରୁନାହାନ୍ତି । ଫଳରେ ସରକାରଙ୍କ ୧୫ କୋଟିରୁ ଅଧିକ ଟଙ୍କା କ୍ଷତି ହୋଇଛି । ନିୟମ ଅନୁସାରେ ଯେଉଁମାନଙ୍କ ଲାଇସେନ୍ସ ରିନ୍ୟୁ ହେବ³ ସେମାନେ ସରକାରଙ୍କ ରାଜକୋଷରୁ କ୍ଷତି ହୋଇଥିବା ଟଙ୍କାକୁ ଭରଣା କରିବେ ।
ମାତ୍ର ଏହି ନବକୁମାର ତାହା ନ କରି ବିଭାଗକୁ ଫାଙ୍କି ଆସୁଥିଲେ । କେବଳ ଏତିକି ନୁହେଁ, ସେ ଏକ୍ସପାରି ବିୟରକୁ ପାତ୍ରପଡ଼ାସ୍ଥ ବାସଭବନରେ ରଖି ଲୋକଙ୍କୁ ବିକ୍ରି କରୁଥିଲେ । ଏହି ଖବର ମିଳିବା ପରେ ବିଭାଗ ପକ୍ଷରୁ ତାଙ୍କ ଘରେ ଚଢ଼ଉ କରାଯାଇଥିଲା । ଚଢ଼ଉ ବେଳେ ଘରୁ ୭୪ପେଟି ଏକ୍ସପାରି ବିୟର ଜବତ କରାଯାଇଥିଲା । ଏହି ଅଭିଯୋଗରେ ତାଙ୍କୁ ଗିରଫ କରାଯାଇଥିଲା ବୋଲି ଶ୍ରୀ ଦାସ କହିଥିଲେ । ସୂଚନାଯୋଗ୍ୟ, ଏହି ମଦ ବ୍ୟବସାୟୀଜଣକ କିଛିମାସ ପୂର୍ବେ ସାମ୍ବାଦିକ ସମ୍ମିଳନୀ ଡକାଇ ପୁଲିସ୍ ବିଭାଗର କିଛି ଅଧିକାରୀଙ୍କ ବିରୋଧରେ ଲାଞ୍ଚ ନେବା ଅଭିଯୋଗ ଆଣି ଚର୍ଚ୍ଚାରେ ଥିଲେ ।
