ନୂଆଦିଲ୍ଲୀ ୨୪/୦୩: ଫିଟ୍ ରହିବା ଲାଗି ଆଜିକାଲି ଲୋକେ ବିଭିନ୍ନ ପ୍ରକାର ଉପାୟ ଅବଲମ୍ବନ କରୁଛନ୍ତି । କିଏ ଜିମ୍ ଯାଉଛନ୍ତି ତ କିଏ ନିୟମିତ ଭାବେ ଚାଲିବା, ଦୌଡ଼ିବା ଭଳି ବ୍ୟାୟାମ କରୁଛନ୍ତି । ଇତିମଧ୍ୟରେ ଆମେରିକାର ୱାଶିଂଟନ୍ ବିଶ୍ୱବିଦ୍ୟାଳୟର ବୈଜ୍ଞାନିକମାନେ ଏବେ ଏମିତି ଏକ ଔଷଧ ପ୍ରସ୍ତୁତ କରିଛନ୍ତି ଯାହାକୁ ଖାଇବା ପରେ ଲୋକମାନଙ୍କୁ ଆଉ ବ୍ୟାୟାମ କରିବାକୁ ପଡି଼ବ ନାହିଁ । ତାର ନାମ ରହିଛି ‘ଏକ୍ସରସାଇଜ୍ ପିଲ୍’ । ବ୍ୟାୟାମ କରିବା ଫଳରେ ଶରୀରକୁ ଯେଉଁ ଉପକାର ମିଳିଥାଏ, ଶରୀରରେ ଯେଉଁ ପରିବର୍ତ୍ତନ ହୋଇଥାଏ ଏହି ପିଲ୍ ଖାଇବା ପରେ ସେହି ସମସ୍ତ ଫାଇଦା ମିଳିବ ବୋଲି କୁହାଯାଉଛି ।
ବର୍ତ୍ତମାନ ଏହାକୁ ମୂଷାଙ୍କ ଉପରେ ପରୀକ୍ଷଣ କରାଯାଇଛି । ସେଥିରୁ ସକରାତ୍ମକ ଫଳାଫଳ ମଧ୍ୟ ମିଳିଛି । ମୂଷାଙ୍କୁ ଯେତେବେଳେ ଏହି ବଟିକା ଖୁଆଗଲା ସେମାନଙ୍କର ଶରୀରର ମେଟାବଲିଜିମ୍ ଠିକ୍ ସେମିତି ହୋଇଗଲା ଯେମିତି ବ୍ୟାୟାମ ପରେ ହୋଇଥାଏ । ଲଗାତର ଏହି ବଟିକା ଖାଇବା ପରେ ମୂଷାଙ୍କ ମାଂସପେଶୀର ଶକ୍ତି ବୃଦ୍ଧି ହେଲା । ଫିଟ୍ନେସ୍ ସ୍ତର ବଢ଼ିବା ସହିତ ଶାରିରୀକ କ୍ଷମତା ବି ୭୦ ପ୍ରତିଶତ ଯାଏ ବଢ଼ିଗଲା । ଏହି ଔଷଧର ରସାୟନିକ ନାମ ଏସଏଲୟୁ-ପିପି୩୩୨ । ଏ ସଂପର୍କରେ ୱାଶିଂଟନ୍ ବିଶ୍ୱବିଦ୍ୟାଳୟର ମୁଖ୍ୟ ଗବେଷକ ଓ ରସାୟନବିତ୍ ୱାହା ଏଲଗେଣ୍ଡି କହିଛନ୍ତି, ଏହି ବଟିକାକୁ ଅନ୍ୟ ସାଧାରଣ ବଟିକା ଭଳି ସହଜରେ ଖାଇହେବ । ଏହାଯୋଗୁ ଶରୀରର ମେଟାବଲିଜିମ୍ ସୁଧୁରିଯିବ । ତାଙ୍କ ଅନୁସାରେ, ଯଦି ମନୁଷ୍ୟଙ୍କ ଶରୀରରେ ଏହି ଔଷଧ ପ୍ରଭାବଶାଳୀ ହୁଏ ତା’ହେଲେ ଏହା ଏକ ବଡ଼ କଥା ହେବ । ଏହାକୁ ବ୍ୟବହାର କରି ଅନେକ ପ୍ରକାର ରୋଗକୁ ଭଲ କରିହେବ ।
New 'Exercise Pill' Could Induce Fitness Benefits Without Exercise https://t.co/sfF3yd4CyN
— ScienceAlert (@ScienceAlert) March 22, 2024
ଏହାପୂର୍ବରୁ ଫ୍ଲୋରିଡ଼ା ବିଶ୍ୱବିଦ୍ୟାଳୟର ବୈଜ୍ଞାନିକମାନେ ମଧ୍ୟ ଏଭଳି ଔଷଧ ପ୍ରସ୍ତୁତି ଲାଗି ଉଦ୍ୟମ କରିଥିଲେ । କିନ୍ତୁ ସେମାନେ ସଫଳ ହୋଇନଥିଲେ । ଆମେ ଏହି ଔଷଧ ପ୍ରସ୍ତୁତ କରିବା ଲାଗି ପ୍ରଥମେ ଏକ ଷ୍ଟାର୍ଟଅପ୍ ଔଷଧ କଂପାନି କରିଛୁ । ମୂଷାଙ୍କ ଉପରେ ଆମର ପରୀକ୍ଷଣ ସଫଳ ହେବା ପରେ ଏହାର କ୍ଲିନିକାଲ୍ ଟ୍ରାଏଲ୍ ଲାଗି ଅନୁମତି ମଗାଯାଇଛି । ଯଦି ସବୁକିଛି ଠିକ୍ଠାକ୍ ରହେ ତା’ହେଲେ ଆସନ୍ତା କିଛି ବର୍ଷ ମଧ୍ୟରେ ଏହାର କ୍ଲିନିକାଲ୍ ଟ୍ରାଏଲ ଆରମ୍ଭ ହେବ । ସାଧାରଣତଃ ଆମେ ବ୍ୟାୟାମ କରିବା ସମୟରେ ଶରୀରରେ ଏଷ୍ଟ୍ରୋଜେନ୍ ରିଲେଟେଡ୍ ରିସେପ୍ଟର୍ସ(ଇଆରଆରଏସ) ସକ୍ରିୟ ହୋଇଯାଇଥାଏ । ଏହି ରିସେପ୍ଟର୍ସ ମାଂସପେଶୀ, ହୃଦୟ ଓ ମସ୍ତିଷ୍କର ଟିସ୍ୟୁରେ ରହିଥାଏ । ଏହା ମେଟାବଲିଜିମ୍, ରୋଗ ପ୍ରତିରୋଧକ ଶକ୍ତି, ଶାରୀରିକ ବିକାଶ, କୋଷିକାର ବିକାଶ ଓ ରିପ୍ରଡକ୍ସନ୍ ସହ ଜଡ଼ିତ ଜିନ୍କୁ ନିୟନ୍ତ୍ରଣ କରିଥାଏ । ‘ଏକ୍ସରସାଇଜ୍ ପିଲ୍’ ଖାଇଲେ ବ୍ୟାୟାମ କରିବା ଭଳି ରିସେପ୍ଟର୍ସ ସକ୍ରିୟ ହୋଇଯିବ ବୋଲି କୁହାଯାଉଛି ।
