ନୂଆଦିଲ୍ଲୀ: ଉତ୍ତରପ୍ରଦେଶର ନୋଏଡାରୁ ଏକ ଆଶ୍ଚର୍ଯ୍ୟଜନକ ଖବର ସାମ୍ନାକୁ ଆସିଛି । ଏଠାରେ ଏକ ବନ୍ଦ କୋଠରୀରୁ ୪ ଜଣଙ୍କ ମୃତଦେହ ମିଳିଛି । ସୂଚନାନୁସାରେ, ଏହି ଘଟଣା ନୋଏଡାର ଇକୋଟେକର ତୁସ୍ୟାନା ଗାଁରେ ଘଟିଛି । ଏହି ଘଟଣା ସାମ୍ନାକୁ ଆସିବା ପରେ ଏହି ଅଞ୍ଚଳରେ ଆତଙ୍କ ଖେଳିଯାଇଛି । କୁହାଯାଉଛି ଯେ କୋଠରୀ ଭିତରୁ ବାହାରକୁ ଦୁର୍ଗନ୍ଧ ଆସିବା ପରେ ପଡୋଶୀ ମାନେ ଘର ମାଲିକକୁ ଏହି ଖବର ଦେଇଥିଲେ । ଘର ମାଲିକ ଏହି ଖବର ପାଇବା ମାତ୍ରେ ସେ ପୋଲିସକୁ ସୂଚନା ଦେଇଥିଲେ ।
ପୋଲିସ ଘଟଣାସ୍ଥଳରେ ପହଞ୍ଚି ଘରେ କୋଠରୀର ତାଲା ଭାଙ୍ଗିବା ପରେ ଚାରି ଜଣଙ୍କ ମୃତଦେହ ମିଳିଥିଲା । ଏହି ଘଟଣା ସମ୍ପର୍କରେ ସେଣ୍ଟ୍ରାଲ ନୋଏଡା ଡିସିପି ସୁନୀତି କହିଛନ୍ତି ଯେ ତୁସ୍ୟାନା ଗ୍ରାମ ନିବାସୀ ପୱନ ସିଂ ସୂଚନା ଦେଇଥିଲେ ଯେ ତାଙ୍କ ଘରେ ଚାରିଜଣ ଭଡାଟିଆ ରହୁଥିଲେ ଏବଂ ସେମାନଙ୍କ ମୃତଦେହ କୋଠରୀ ଭିତରେ ପଡି ରହିଛି । ଘଟଣା ସମ୍ପର୍କରେ ସୂଚନା ପାଇବା ମାତ୍ରେ ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲା । ପୋଲିସ କୋଠରୀର କବାଟ ଭାଙ୍ଗି ଭିତରକୁ ଯାଇ ଚାରି ଜଣଙ୍କର ମୃତ୍ୟୁ ହୋଇଥିବା ଜାଣିବାକୁ ପାଇଥିଲା ।
ଚାରିଜଣ ମୃତ ବ୍ୟକ୍ତିଙ୍କ ପରିଚୟ ମିଳିଥିବା ସୁନୀତି କହିଛନ୍ତି । ସେ କହିଛନ୍ତି ଯେ ମୃତ ବ୍ୟକ୍ତି ଚନ୍ଦ୍ରଶ କୁମାର, ତାଙ୍କ ଭାଇ ରାଜେଶ, ଭଉଣୀ ବବଲି ଏବଂ ଚନ୍ଦ୍ରଶ କୁମାରଙ୍କ ପତ୍ନୀ ନିଶା ବୋଲି ଜଣାପଡିଛି । ତେବେ ଏହି ଘଟଣା କିପରି ଘଟିଲା ସେ ସମ୍ପର୍କରେ ସୁନୀତି କହିଛନ୍ତି ଯେ, କୋଠରୀ ସବୁ ଦିଗରୁ ବନ୍ଦ ହୋଇଯାଇଥିଲା, ତେଣୁ ଏହା ସମ୍ଭବତ ଶ୍ୱାସରୁଦ୍ଧ ହୋଇ ମୃତ୍ୟୁ ହୋଇଥାଇପାରେ । ତେବେ ମୃତ୍ୟୁର ପ୍ରକୃତ କାରଣ କ’ଣ ବୋଲି ପୋଲିସ ଅନୁସନ୍ଧାନ କରୁଛି । ପୋଲିସ କହିଛି ଯେ ଚାରିଜଣଙ୍କ ମୃତଦେହ ଉଦ୍ଧାର କରିବା ପରେ ସେମାନଙ୍କୁ ପୋଷ୍ଟମର୍ଟମ ପାଇଁ ପଠାଯାଇଛି।
