ଭୁବନେଶ୍ୱର,୧୩/୦୮: ବିଧାନସଭା ଆଲୋଚନାରେ କେମିତି ଭାଗ ନେବେ? ନିଜ ଅଞ୍ଚଳର ସମସ୍ୟାକୁ କିଭଳି ପ୍ରଭାବୀ ଢଙ୍ଗରେ ସରକାରଙ୍କ ଦୃଷ୍ଟି ଆକର୍ଷଣ କରିବେ । ବିରୋଧୀ ବିଧାୟକମାନେ ଗଠନମୂଳକ ଚର୍ଚ୍ଚାରେ କେମିତି  ଅଂଶଗ୍ରହଣ କରିବେ । ଏଥିପାଇଁ ବିଧାନସଭା ପକ୍ଷରୁ ଦୁଇଦିନିଆ କର୍ମଶାଳା ଅନୁଷ୍ଠିତ ହେବ। ୪ କେନ୍ଦ୍ରମନ୍ତ୍ରୀ ଏହି କର୍ମଶାଳାରେ ନୂଆ ବିଧାୟକମାନଙ୍କୁ  ପାଠ ପଢ଼ାଇବେ । 

ଆସନ୍ତା ୧୭ ଓ ୧୮ରେ ବିଧାନସଭାରେ ନବ ନିର୍ବାଚିତ ବିଧାୟକମାନଙ୍କ ପାଇଁ  ତାଲିମ କର୍ମଶାଳାର ଆୟୋଜନ କରାଯାଇଛି । ଏହି କର୍ମଶାଳାରେ ବିଧାୟକମାନଙ୍କୁ  ପାଠ ପଢ଼ାଇବେ କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ଜେପି  ନଡ୍ଡା ଓ ସଂସଦୀୟ ବ୍ୟାପାର ମନ୍ତ୍ରୀ କିରଣ  ରିଜିଜୁ । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ଜୁଏଲ  ଓରାମ ବି ଏହି କର୍ମଶାଳାରେ ଯୋଗଦେଇ  କ୍ଲାସ ନେବାର କାର୍ଯ୍ୟକ୍ରମ ରହିଛି । ବିଧାନସଭାର ବରିଷ୍ଠ ବିଧାୟକମାନେ  ମଧ୍ୟ ନବାଗତଙ୍କୁ ମନ୍ତ୍ର ଦେବେ । କ’ଣ ରହିଛି ଗୃହର ନିୟମ ଓ ପରମ୍ପରା ସେ ସମ୍ପର୍କରେ ନୂଆ ବିଧାୟକମାନେ ଅବଗତ ହୋଇପାରିବେ ବୋଲି ସୂଚନା ଦେଇଛନ୍ତି ସଂସଦୀୟ ବ୍ୟାପାର ମନ୍ତ୍ରୀ ମୁକେଶ ମହାଲିଙ୍ଗ ।  

ଉଲ୍ଲେଖଯୋଗ୍ୟ, ବିଧାନସଭାର ୧୪୭ ଆସନରୁ ୮୪ ଜଣ ଅଛନ୍ତି ନୂଆ  ବିଧାୟକ । ଶାସକ ଦଳର ପ୍ରାୟ ୬୦ ବିଧାୟକ ଅଛନ୍ତି । ଏହି ବିଧାୟକମାନେ  ପ୍ରଭାବୀ ଢଙ୍ଗରେ କାମ କରିବାକୁ ତାଲିମ କର୍ମଶାଳା ଜରୁରୀ ବୋଲି  ଅଧିବେଶନରେ ଦଳ ମତ ନିର୍ବିଶେଷରେ ମତ ପ୍ରକାଶ ପାଇଥିଲା ।