ବୌଦ୍ଧ,୨୪। ୮ : ବୌଦ୍ଧ ଆଦର୍ଶ ଥାନା ଅଧୀନ ଖୋର୍ଦ୍ଧା ବଲାଙ୍ଗୀର ୫୭ ନଂ ଜାତୀୟ ରାଜପଥ ରଇଠାଣି ବାଇପାସ ଛକରେ ହାଇୱା ଓ ବାଇକ୍ ମଧ୍ୟରେ ମୁହାଁମୁହିଁ ଧକ୍କା ହୋଇଛି।  ଘଟଣା ସ୍ଥଳରେ ଜଣେ ଯୁବତୀଙ୍କ ମୃତ୍ୟୁ ହୋଇଥିବା ବେଳେ ବାଇକ୍ ଚାଳକ ଏବଂ ଅନ୍ୟ ଜଣେ ଯୁବତୀ ଗୁରୁତର ହୋଇଛନ୍ତି । ମୃତ ଯୁବତୀ ଜଣକ ହେଲେ ମର୍ଜାକୁଦ ଗ୍ରାମର ପାୟଲ ରାଜହଂସ । ଟୁଟୁସୀଙ୍ଗା ଗ୍ରାମର ଆରତୀ ଝାଙ୍କର ଓ ଶ୍ରୀତମ ବେହେରାଙ୍କୁ ଗୁରୁତର ଅବସ୍ଥାରେ ବୌଦ୍ଧ ଡାକ୍ତରଖାନାରେ ଭର୍ତ୍ତି କରାଯାଇଛି । ସେପଟେ ଘଟଣା ସ୍ଥଳରେ ଉତ୍ତେଜନା ପ୍ରକାଶ ପାଇଥିବା ବେଳେ ଆଦର୍ଶ ଥାନା ପୋଲିସ ଘଟଣା ସ୍ଥଳରେ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାସୁଝା କରିବା ସହିତ ଘଟଣାର ତଦନ୍ତ କରୁଛି।

ବିଜୁ ପଟ୍ଟନାୟକ ଛକ ପଟରୁ ଏକ ପଥର ବୋଝେଇ ହାଇୱା ଚାରିଛକ୍ ଅଭିମୁଖେ ଯାଉଥିବା ବେଳେ ବିପରୀତ ଦିଗରୁ ଏକ ବାଇକରେ ଜଣେ ଯୁବକ ଏବଂ ଦୁଇ ଜଣ ଯୁବତୀ ବୌଦ୍ଧକୁ  ଆସୁଥିଲେ ।  ରଇଠାଣୀ ବାଇପାସ ଛକ ନିକଟରେ ହାଇୱା ସହିତ ବାଇକର ମୁହାଁମୁହିଁ ଧକ୍କା ହୋଇଥିଲା । ଫଳରେ ଘଟଣା ସ୍ଥଳରେ ଜଣେ ଯୁବତୀଙ୍କ ମୃତ୍ୟୁ ହୋଇଥିଲା । ଏଥିସହ ବାଇକ୍ ଆରୋହୀ ଓ ଅନ୍ୟ ଜଣେ ଯୁବତୀ ଗୁରୁତର ହୋଇଛନ୍ତି । ସେପଟେ ବାଇକକୁ ଧକ୍କା ଦେଇ ହାଇଓ୍ବା ରାସ୍ତା କଡ଼କୁ ଓଲଟି ପଡ଼ିଥିବା ବେଳେ  ଡ୍ରାଇଭର ଫେରାର ହୋଇଯାଇଛି। ଘଟଣା ସ୍ଥଳରେ ଉତ୍ତେଜନା ଦେଖା ଦେଇଥିବା ବେଳେ ଆଦର୍ଶ ଥାନା ପୋଲିସ ପହଞ୍ଚି ଲୋକଙ୍କୁ ବୁଝା ସୂଝା କରିବା ସହିତ ଉକ୍ତ ସ୍ଥାନରେ ହମ୍ପ୍ସ୍ ନିର୍ମାଣ ଓ ଟ୍ରାଫିକ ପୋଷ୍ଟ ପ୍ରତିଷ୍ଠା ପାଇଁ ଆଦର୍ଶ ଥାନା ଅଧିକାରୀ ରଞ୍ଜିତ ମୁନୀ ପ୍ରତିଶ୍ରୁତି ଦେଇଛନ୍ତି ।