ଭୁବନେଶ୍ୱର,୧୩/୦୪: ଅନ୍ତର୍ଜାତିକ ସ୍ତରରେ ରାଜନୀତି ଓ ଯୁଦ୍ଧ ସ୍ଥିତିର ଅନିଶ୍ଚିତତା ଭିତରେ ସୁନା ଦର ହୁ ହୁ ହୋଇ ବଢ଼ି ଚାଲିଛି । ଇରାନ-ଇସ୍ରାଏଲ ଯୁଦ୍ଧ ଆଶଙ୍କା ଦରକୁ ଐତିହାସିକ ସ୍ତରରେ ପହଞ୍ଚାଇଲାଣି । ଦିନକୁ ଦିନ ଏହା ନୂଆ ରେକର୍ଡ ଯୋଡ଼ିଚାଲିଛି । ଶୁକ୍ରବାର ୭୩,୦୦୦ ସ୍ତର ପାର୍ କରିଛି ସୁନା ।
ଏହି ଟ୍ରେଣ୍ଡ ଜାରି ରହିଲେ ଖୁବ୍ଶୀଘ୍ର ୮୦,୦୦୦ ଟଙ୍କା ଡେଇଁବ ବୋଲି ଅନୁମାନ କରିଛନ୍ତି ବଜାର ବିଶେଷଜ୍ଞ । ତେବେ ସୁନା ଦରରେ ଏହି ଦ୍ରୁତ ବୃଦ୍ଧି ଲୋକଙ୍କ ମଧ୍ୟରେ ନିବେଶ ମନୋଭାବ ବଢ଼ାଇଛି । ଭଲ ରିଟର୍ଣ୍ଣ ପାଇବା ଆଶାରେ ଲୋକେ ଚଢ଼ା ଦରରେ ବି ସୁନା କିଣୁଥିବା ଜଣାପଡ଼ିଛି ।
ଶୁକ୍ରବାର ଓଡ଼ିଶାର ରାଜଧାନୀ ଭୁବନେଶ୍ୱରରେ ୧୦ ଗ୍ରାମ ପିଛା ୨୪ କ୍ୟାରେଟ୍ ସୁନା ଦାମ ୭୩,୩୧୦ ଟଙ୍କାରେ ପହଞ୍ଚିଛି । ଏଥିରେ ୧,୦୯୦ ଟଙ୍କା ବୃଦ୍ଧି ଘଟିଛି । ସେହିଭଳି ୧୦ ଗ୍ରାମ ପିଛା ୨୨ କ୍ୟାରେଟ ସୁନା ଦର ୧,୦୦୦ ଟଙ୍କା ବଢ଼ି ୬୭,୨୦୦ ଟଙ୍କା ହୋଇଛି ।
ରୁପା ମଧ୍ୟ ନୂଆ ରେକର୍ଡ କରିଚାଲିଛି । ରାଜଧାନୀ ଭୁବନେଶ୍ୱରରେ କିଲୋଗ୍ରାମ ପିଛା ରୁପା ୧୫୦୦ ଟଙ୍କା ମହଙ୍ଗା ହୋଇ ୯୦,୦୦୦ ଟଙ୍କା ହୋଇଛି ।
ଖୁବ୍ଶୀଘ୍ର ସୁନା ୮୦,୦୦୦ ଟଙ୍କା ଛୁଇଁବା ନେଇ ଆକଳନ କରିଛନ୍ତି ବଜାର ବିଶେଷଜ୍ଞ । ଗତ ୬ ମାସରେ ଏହା ୧୩,୦୦୦ ଟଙ୍କାରୁ ଅଧିକ ମହଙ୍ଗା ହୋଇଗଲାଣି । ସୂଚନାଯୋଗ୍ୟ, ଭୁ-ରାଜନୈତିକ ସମସ୍ୟା ତେଜିଲେ ଇକ୍ୱିଟି ବଜାରରେ ଅସ୍ଥିରତା ଦେଖାଦିଏ । ତେଣୁ ଲୋକେ ସୁନାରେ ନିବେଶ କରିବାକୁ ସୁରକ୍ଷିତ ମଣିଥାନ୍ତି । ଏହା ଦରକୁ ବଢ଼ାଇଥାଏ ।
କମୋଡିଟି ବଜାର ବିଶେଷଜ୍ଞମାନଙ୍କ କହିବାନୁସାରେ, ୨୦୨୪-୨୫ ଆର୍ଥିକବର୍ଷ ସୁନା ଦରରେ ବୃଦ୍ଧି ଧାରା ଜାରି ରହିବ । ଏହାର ଏକ ପ୍ରମୁଖ କାରଣ ହେଉଛି ଆମେରିକା ଫେଡେରାଲ ରିଜର୍ଭର ମୁଦ୍ରାନୀତି ପଦକ୍ଷେପ । ଫେଡେରାଲ ରିଜର୍ଭ ଇତିମଧ୍ୟରେ ସଂକେତ ଦେଇଛି ଯେ, ଏହା ୨୦୨୪ରେ ପ୍ରମୁଖ ସୁଧ ହାରରେ ୩ଟି ହ୍ରାସ କରିପାରେ ।
ସୁନା ଦର ବଢ଼ିବାର ଆହୁରି ଅନେକ କାରଣ ରହିଛି । ବିଶ୍ୱବ୍ୟାପୀ ମାନ୍ଦାବସ୍ଥା ଆଶଙ୍କା, ଆଗାମୀ ବିବାହ ଋତୁ ଯୋଗୁ ଚାହିଦା ବୃଦ୍ଧି, ବିଶ୍ୱର ବିଭିନ୍ନ ପ୍ରାନ୍ତରେ କେନ୍ଦ୍ରୀୟ ବ୍ୟାଙ୍କଗୁଡ଼ିକ ଦ୍ୱାରା ପ୍ରଚୁର ମାତ୍ରାରେ ସୁନା କ୍ରୟ ଆଦି ଯୋଗୁ ଏହି ଧାତୁ ଦର ବଢୁଛି ।
