ନୂଆଦିଲ୍ଲୀ,୩୧/୮: କୋଲକାତା ଡାକ୍ତରଙ୍କ ଦୁଷ୍କର୍ମ ଓ ହତ୍ୟା ଘଟଣା। ଏହାକୁ ନେଇ ଜଳୁଛି ପୂରା ଦେଶ। ରାଜନୈତିକ ବିବାଦ ମଧ୍ୟ ଲାଗି ରହିଥିବା ବେଳେ ଏହାରି ଭିତରେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଶୁକ୍ରବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଦ୍ୱିତୀୟ ଚିଠି ଲେଖିଛନ୍ତି। ଏହି ଚିଠିରେ ମମତା ବାନାର୍ଜୀ ଦୁଷ୍କର୍ମ ଓ ହତ୍ୟା ଭଳି ଜଘନ୍ୟ ଅପରାଧ ପାଇଁ କଠୋର ଆଇନ ଏବଂ ଦଣ୍ଡ ଦାବି କରିଥିଲେ। ତେବେ ମମତାଙ୍କ ଏହି ଚିଠିର ଏବେ ଜବାବ ଦେଇଛି କେନ୍ଦ୍ର। ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ଚିଠି ଲେଖି କେନ୍ଦ୍ର ମହିଳା ଓ ଶିଶୁ ବିକାଶ ମନ୍ତ୍ରୀ ଅନ୍ନପୂର୍ଣ୍ଣା ଦେବୀ କହିଛନ୍ତି, ମମତା ସରକାର ନିଜ ଭୁଲ୍‌ ଲୁଚାଇବାକୁ ଚେଷ୍ଟା କରୁଛି। ଦୁଷ୍କର୍ମ ଏବଂ ପିଓସିଓସି ଆକ୍ଟ ମାମଲାର ମୁକାବିଲା ପାଇଁ ସ୍ୱତନ୍ତ୍ର ଭାବେ ଫାଷ୍ଟ ଟ୍ରାକ ସ୍ପେଶାଲ କୋର୍ଟ (ଏଫଟିଏସସି) ଗଠନ କରାଯାଇଛି। ପଶ୍ଚିମବଙ୍ଗରେ ୪୮,୬୦୦ ଦୁଷ୍କର୍ମ ଏବଂ ପିଓସିଓସି ମାମଲାର ପେଣ୍ଡିଂ ରହିଛି। ଏହା ସତ୍ତ୍ୱେ ରାଜ୍ୟ ଅତିରିକ୍ତ ୧୧ଟି FTSC କାର୍ଯ୍ୟକ୍ଷମ କରିନାହିଁ। ଯାହାକି ରାଜ୍ୟର ଆବଶ୍ୟକତା ଅନୁଯାୟୀ ଉଭୟ ଦୁଷ୍କର୍ମ ଏବଂ ପିଓସିଓସି ମାମଲା ବିଚାର କରିବା ପାଇଁ ଆବଶ୍ୟକ ଅଟେ।

ସେ କହିଛନ୍ତି, 'ଆପଣଙ୍କ ଚିଠିରେ ଦିଆଯାଇଥିବା ତଥ୍ୟ ବାସ୍ତବରେ ଭୁଲ। ଏହା ରାଜ୍ୟ ଦ୍ୱାରା ଫାଷ୍ଟ ଟ୍ରାକ ସ୍ୱତନ୍ତ୍ର କୋର୍ଟ କାର୍ଯ୍ୟକ୍ଷମ ହେବାରେ ବିଳମ୍ବ ଓ ତଥ୍ୟ ଲୁଚାଇବା ନିମନ୍ତେ ଉଦ୍ଦିଷ୍ଟ ପରି ମନେ ହେଉଛି। ମହିଳାଙ୍କ ପ୍ରତି ହେଉଥିବା ହିଂସା ତଥା ଅପରାଧର ମୁକାବିଲା ପାଇଁ କେନ୍ଦ୍ର ସରକାର ପ୍ରସ୍ତୁତ କରିଥିବା ଆଇନଗୁଡ଼ିକ ବ୍ୟାପକ ଏବଂ ବେଶ୍‌ କଠୋର। ଯଦି ରାଜ୍ୟ ସରକାର କେନ୍ଦ୍ରୀୟ ନିୟମକୁ ଠିକ୍ ଭାବରେ ପାଳନ କରନ୍ତି, ତେବେ ଏହା ନିଶ୍ଚିତ ଭାବେ ଅପରାଧିକ ନ୍ୟାୟ ବ୍ୟବସ୍ଥାକୁ ମଜବୁତ କରିବାରେ ସହାୟକ ହେବ। ଅପରାଧିକୁ କଠୋର ପରିଣାମର ସମ୍ମୁଖୀନ ହେବାକୁ ପଡ଼ିବ।' ପ୍ରକାଶ ଥାଉକି,କୋଲକାତା ଆର୍‌ଜି କର ମେଡିକାଲ କଲେଜରେ ଅଗଷ୍ଟ ୯ ତାରିଖରେ ଟ୍ରେନି ଡାକ୍ତରଙ୍କ ସହ ଦୁଷ୍କର୍ମ ଓ ହତ୍ୟା ମାମଲାକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଦୁଇଟି ଚିଠି ଲେଖିଥିଲେ ମମତା ବାନାର୍ଜୀ।