ପୁରୀ,୨୨/୦୮: ଭିନ୍ନକ୍ଷମ ହରିହର ସାହୁ ହତ୍ୟାକାଣ୍ଡରେ ସମ୍ପୃକ୍ତ ୯ ଜଣଙ୍କୁ ଗିରଫ କରିଛି ଟାଉନ୍ ଥାନା ପୁଲିସ । ଏହି ହତ୍ୟା ମାମଲାରେ ବାପପୁଅଙ୍କୁ ଜେଲ୍ ପଠାଯାଇଥିବା ବେଳେ ୭ ନାବାଳକଙ୍କୁ ଜୁଭେନାଇଲ୍ ହୋମ୍ ପଠାଯାଇଛି । ଗିରଫ ବାପପୁଅ ହେଲେ ମାର୍କଣ୍ଡେଶ୍ୱର ସାହି ରାଧାଗୋବିନ୍ଦ ଲେନ୍ର ଖଜା ବ୍ୟବସାୟୀ ବିଜୟ ଖୁଣ୍ଟିଆ(୪୫) ଓ ତାର ବଡ଼ପୁଅ ରାକେଶ କୁମାର ଖୁଣ୍ଟିଆ(୨୦) । ଅଭିଯୁକ୍ତଙ୍କଠାରୁ ପୁଲିସ ହତ୍ୟାକାଣ୍ଡରେ ବ୍ୟବହୃତ ଗୋଟିଏ ଖଣ୍ଡା, ୨ଟି କଟୁରି ଓ ଏକ ଚାପଡ଼ ଜବତ କରିଛି ବୋଲି ବୁଧବାର ସାମ୍ବାଦିକ ସମ୍ମିଳନୀରେ ଏସ୍ପି ପିନାକ ମିଶ୍ର ସୂଚନା ଦେଇଛନ୍ତି । ଏହି ହତ୍ୟାକାଣ୍ଡ ପଛର ଖଜା ବ୍ୟବସାୟରୁ ଶତ୍ରୁତା ଏବଂ ପରେ ପ୍ରତିଶୋଧରୁ ଘଟିଥିବା ଏସ୍ପି ଶ୍ରୀ ମିଶ୍ର କହିଛନ୍ତି । ଏହି ମାମଲାରେ ମୋଟ ୧୧ ଜଣ ସମ୍ପୃକ୍ତ ଥିବା ବେଳେ ଆଉ ୨ ଜଣ ନାବାଳକ ଏବେବି ଫେରାର୍ ଥିବା ଜଣାପଡ଼ିଛି ।
ଗତ ୮ ତାରିଖରେ ଖଜା ବ୍ୟବସାୟୀ ବିଜୟ ଖୁଣ୍ଟିଆର ସାନପୁଅ ଦୀନେଶ(୧୮) ଙ୍କୁ ହତ୍ୟା କରାଯାଇଥିଲା । ହରିହରଙ୍କ ପୁଅ ପ୍ରଦୀପ୍ତ ସାହୁ ଓରଫ କାହ୍ନା ଓ ତା’ ସହଯୋଗୀମାନେ ଏହି ହତ୍ୟାକାଣ୍ଡ ରଚିଥିଲେ । ସେହି ମାମଲାରେ କାହ୍ନା ଓ ତା’ ୩ ଜଣ ସହଯୋଗୀ ମୋଟ ୪ ଜଣ ଜେଲ୍ ଯାଇଥିବା ବେଳେ ଜଣେ ନାବାଳକ ଜୁଭେନାଇଲ୍ ହୋମ୍ ପଠାଯାଇଥିଲା । ଏହାପରେ ଦୀନେଶଙ୍କ ବାପା ଓ ଭାଇ ପ୍ରତିଶୋଧ ନେବାକୁ ଯୋଜନା କରିଥିଲେ । ୯ ଜଣ ନାବାଳକଙ୍କ ସହଯୋଗ ନେଇ ପ୍ରସ୍ତୁତ ହୋଇଥିଲା ବ୍ଲୁ ପ୍ରିଣ୍ଟ୍ । ଦୀନେଶ ହତ୍ୟାକାଣ୍ଡର ଠିକ୍ ୧୨ ଦିନ ପରେ ଗତ ୧୯ ତାରିଖ ସନ୍ଧ୍ୟାରେ କାହ୍ନାର ବାପା ହରିହର ଖାଜିଆ ସାହୁଙ୍କ ଖଜା ଦୋକାନରୁ ଘରକୁ ଫେରୁଥିବା ବେଳେ ତାଙ୍କୁ ବାଟରେ ଖଣ୍ଡା, କଟୁରି ଓ ଚାପଡ଼ରେ ହାଣି ହତ୍ୟା କରାଯାଇଥିଲା । ନାବାଳକମାନେ ହତ୍ୟା ସମୟର ବୀଭତ୍ସ ଦୃଶ୍ୟକୁ ମୋବାଇଲ୍ରେ ରେକର୍ଡ କରି ପରେ ଭାଇରାଲ୍ କରିଥିଲେ । ପୁଲିସ ପ୍ରଥମେ ବାପପୁଅଙ୍କୁ ଉଠାଇ ନେଇଥିଲା । ପରେ ଅନ୍ୟମାନଙ୍କୁ ଗିରଫ କରିଥିଲା ।
ପୁଲିସ ଗିରଫ କରିଥିବା ୯ ଜଣ ଯାକ ପୂର୍ବରୁ ଏକାଧିକ ମାମଲାରେ ଜଡ଼ିତ ଥିବା ପୁଲିସ ସୂଚନା ଦେଇଛି । ଏହି ହତ୍ୟା ମାମଲା ପୂର୍ବରୁ ବିଜୟ ବିରୋଧରେ ଗୋଟିଏ ଓ ରାକେଶ ବିରୋଧରେ ୯ଟି ମାମଲା ରହିଛି । ନାବାଳକଙ୍କ ମଧ୍ୟରୁ ୩ ଜଣଙ୍କ ବିରୋଧରେ ଗୋଟିଏ ଲେଖାଏଁ, ୨ ଜଣଙ୍କ ବିରୋଧରେ ୨ଟି ଲେଖାଏଁ, ଜଣଙ୍କ ବିରୋଧରେ ୩ଟି ଓ ଅନ୍ୟ ଜଣଙ୍କ ବିରୋଧରେ ୮ଟି ମାମଲା ରହିଥିବା ପୁଲିସ ରେକର୍ଡରୁ ଜଣାପଡ଼ିଛି । ଫେରାର୍ ଥିବା ୨ ଜଣ ନାବାଳକ ଧରାପଡ଼ିବା ପରେ ସେମାନଙ୍କ କ୍ରାଇମ୍ ହିଷ୍ଟ୍ରି ଜଣାପଡ଼ିବ ବୋଲି କହିଛନ୍ତି ଟାଉନ୍ ଥାନା ଆଇଆଇସି ସୁନୀଲ ପ୍ରଧାନ । ଅନ୍ୟପଟେ ମୃତ ହରିହର ମଧ୍ୟ ବହୁ ମାମଲାରେ ଜଡ଼ିତ ଥିବା ପୁଲିସ କହିଛି । ସେ ୨୦୦୦ ମସିହାରେ ବୋମା ଭିଡ଼ୁଥିବା ବେଳେ ବିସ୍ଫୋରଣ ହୋଇ ୨ ପାପୁଲି ହରାଇଥିବା ପୁଲିସ କହିଛି ।
ହରିହର ଓ ବିଜୟଙ୍କ ପରିବାର ମଧ୍ୟରେ ବହୁ ପୂର୍ବରୁ ବିବାଦ ଥିଲା । ଖଜା ବ୍ୟବସାୟକୁ କେନ୍ଦ୍ର କରି ବିବାଦ ବଢ଼ିଥିବା ବେଳେ ଆକ୍ରମଣ ଓ ପ୍ରତିଆକ୍ରମଣ ନେଇ ପୂର୍ବରୁ ମାମଲା ମଧ୍ୟ ରୁଜୁ ହୋଇଥିଲା ବୋଲି କହିଛନ୍ତି ଏସ୍ପି । ଏତେ ସଂଖ୍ୟକ ନାବାଳକ ଏତେ ବଡ଼ ଅପରାଧ ଘଟାଇବା ପରେ ଚିନ୍ତାବ୍ୟକ୍ତ କରିଛନ୍ତି ଏସ୍ପି ଶ୍ରୀ ମିଶ୍ର । ନାବାଳକଙ୍କୁ ଅପରାଧଠାରୁ ଦୂରେଇ ରହିବା ପାଇଁ ଫୋକସ୍ ଦେବାକୁ ସମୟ ଆସିଥିବା ସେ କହିଛନ୍ତି ।
ଅପରାଧରେ ଜଡ଼ିତ ନାବାଳକଙ୍କ ତାଲିକା ପ୍ରସ୍ତୁତ ହେବ
ଅପରାଧରେ ଜଡ଼ିତ ଥିବା ନାବାଳକଙ୍କ ତାଲିକ ପ୍ରସ୍ତୁତ ହେବ । ଜିଲ୍ଲାର ସମସ୍ତ ଥାନା ପୁଲିସ ନିଜ ନିଜ ଅଞ୍ଚଳରେ ଥିବା ବାଳ ଅପରାଧୀଙ୍କ ତାଲିକା ପ୍ରସ୍ତୁତ କରିବା ପରେ ସେମାନଙ୍କୁ ସଚେତନ କରାଯିବ । ସିଡବ୍ଲୁସି, ଶିଶୁ ସୁରକ୍ଷା ୟୁନିଟ୍ ତଥା ଶିଶୁ ସୁରକ୍ଷା ଅଧିକାରୀ, ବୁଦ୍ଧିଜୀବୀ, ଏନ୍ଜିଓ, ଅଭିଭାବକ ଓ ପୁଲିସ ସହଯୋଗରେ ଏହି ବାଳ ଅପରାଧୀଙ୍କୁ ଅପରାଧ ଏବଂ ନିଶାଠାରୁ ଦୂରେଇ ରହିବାକୁ ସଚେତନ କରାଯିବ ବୋଲି କହିଛନ୍ତି ଏସ୍ପି । ଏହା ଫଳରେ ସମାଜର ମୁଖ୍ୟ ସ୍ରୋତରେ ଏହି ନାବାଳକମାନେ ସାମିଲ୍ ହୋଇ ପାରିବେ ବୋଲି ଆଶାବ୍ୟକ୍ତ କରିଛନ୍ତି ଏସ୍ପି ଶ୍ରୀ ମିଶ୍ର ।
ପୁଲିସକୁ ଚ୍ୟାଲେଞ୍ଜ୍ ଦେଇ ମାରିଦେଲେ
ଦୀନେଶ ଖୁଣ୍ଟିଆ ହତ୍ୟାକାଣ୍ଡ ପରେ ପ୍ରତିଶୋଧ ନେବାକୁ ଖୁଲମ୍ଖୁଲ୍ଲା ଚ୍ୟାଲେଞ୍ଜ୍ ଦେଇଥିଲେ ଅଭିଯୁକ୍ତ । ମୁଣ୍ଡ ଗଡ଼ାଇବାକୁ ଯୋଜନା ଚାଲିଥିବା ବେଳେ ଖବର ପାଇଥିଲା ପୁଲିସ । ହରିହରଙ୍କ ପରିବାର ସହ ପୁଲିସ ଯୋଗାଯୋଗରେ ଥିଲା । ତଥାପି ଅଭିଯୁକ୍ତ ହରିହରଙ୍କୁ ହତ୍ୟା କଲେ । ସୁରକ୍ଷା ଯୋଗାଇବାରେ ବିଫଳ ହୋଇଥିଲା ପୁଲିସ । ତେବେ ଦ୍ୱିତୀୟ ହତ୍ୟାକାଣ୍ଡ ପରେ ଗ୍ୟାଙ୍ଗ୍ ୱାର୍ ଆଶଙ୍କା ଥିବାରୁ କଡ଼ା ନଜର ରଖାଯାଇଥିବା ପୁଲିସ କହିଛି ।
ହତ୍ୟାକାଣ୍ଡର ରହସ୍ୟ
ଉତ୍ତର ପାଶ୍ୱର୍ ମଠ ପାଖରେ ଉଭୟ ଗୋଷ୍ଠୀଙ୍କ ଖଜା ଦୋକାନ ରହିଛି । ଉଭୟ ଗୋଷ୍ଠୀର ମୃତକ ଓ ଅଭିଯୁକ୍ତ ତଥା ନାବାଳକମାନେ ଖଜା ଦୋକାନରେ କାମ କରନ୍ତି । ବ୍ୟବସାୟ ସମୟରେ ଉଭୟ ପକ୍ଷଙ୍କ ମଧ୍ୟରେ ବିବାଦ ଥିଲା । ଅନେକ ସମୟରେ ଖଜାର ଓଜନ ନେଇ ଠକେଇ ହେଉଥିବା ଅଭିଯୋଗ ହୁଏ । ୧ କେଜି ଓଜନର ଖଜାର ପ୍ରକୃତରେ ୭ ଶହରୁ ୮ ଶହ ଗ୍ରାମ୍ ହୋଇଥାଏ । କେତେକ ଖଜା ଦୋକାନରେ ଏଭଳି ଠକେଇ କରାଯାଇଥାଏ । ପ୍ରତି କେଜିରେ ଦୁଇରୁ ତିନି ଶହ ଗ୍ରାମ୍ ଖଜା ଓଜନରେ ଠକେଇ ହୁଏ । ଗୋଟିଏ ଗୋଷ୍ଠୀଠାରୁ ଖଜା କିଣି ନେଉଥିବା ଯାତ୍ରୀଙ୍କୁ ଏହି ଓଜନ୍ ଠକେଇ ସମ୍ପର୍କରେ ଅନ୍ୟ ଗୋଷ୍ଠୀ କହି ସମସ୍ୟା ସୃଷ୍ଟି କରନ୍ତି । ନିଜ ଠାରୁ ଖଜା କିଣିବା ପାଇଁ ପ୍ରବର୍ତ୍ତାଇଥାନ୍ତି । ଯାହାକୁ ନେଇ ବହୁ ସମୟରେ ଗ୍ରାହକଙ୍କ ସାମ୍ନାରେ ଉଭୟ ଗୋଷ୍ଠୀ ମଧ୍ୟରେ ବଚସା ହୁଏ । ବ୍ୟବସାୟରେ ବାଧା ସୃଷ୍ଟି ହେଉଥିବାରୁ ଧୀରେ ଧୀରେ ଏହି ବିବାଦ ବଢ଼ିଥିଲା । ପାଠ ପଢ଼ିବା ବୟସରେ ନାବାଳକମାନେ ଖଜା ଦୋକାନରେ କାମ କରି ଦିପଇସା ରୋଜଗାର କରୁଥିଲେ । ଟଙ୍କା ରୋଜଗାର କରିବା ପରେ ଏମାନେ କୁସଙ୍ଗରେ ପଡ଼ି ନିଶା ଦ୍ୱାରା କବଳିତ ହୋଇଯାଇଥିଲେ । କିଛି ଦିନ ତଳେ ଜଣେ ଖଜା ବେପାରୀଙ୍କୁ ଧମକ ଦେଇ ଖଜା ତିଆରି ଦୋକାନରେ କାମ ନ କରିବାକୁ କହିଥିଲେ ଦୀନେଶ । ଏହାପରେ ବିବାଦ ଉଗ୍ର ରୂପ ନେଇଥିଲା । ବିରୋଧୀ ଗୋଷ୍ଠୀ ଦୀନେଶଙ୍କୁ ହତ୍ୟା କରିଥିଲେ । ତେବେ ଏହାର ପ୍ରତିଶୋଧ ନେଇ ହରିହରଙ୍କୁ ହତ୍ୟା କରିଥିଲେ ଦୀନେଶ ଗୋଷ୍ଠୀ
