ନୂଆଦିଲ୍ଲୀ,୦୧/୦୯:  ହରିୟାଣାରେ ଏକ ଅଭାବନୀୟ ଘଟଣା ସାମ୍ନାକୁ ଆସିଛି। ଗୋମାଂସ ଖାଇବା ସନ୍ଦେହରେ ପ୍ରବାସୀଙ୍କୁ ପିଟିପିଟି ହତ୍ୟା । ତେବେ ପୋଲିସ ଘଟଣାକୁ ଗୁରୁତର ସହ ନେଇ ଏହି ମାମଲାରେ ୭ ଜଣଙ୍କୁ ଗିରଫ କରିଛି । ସେମାନଙ୍କ ମଧ୍ୟରେ ଦୁଇ ଜଣ ନାବାଳକ ମଧ୍ୟ ରହିଛନ୍ତି । ସେପଟେ ଏଭଳି ଘଟଣାକୁ ନିନ୍ଦା କରିଛନ୍ତି ମୁଖ୍ୟମନ୍ତ୍ରୀ ନାୟବ ସିଂ ସୈନି ।

ସୂଚନା ମୁତାବକ, ହରିୟାଣାର ଚରଖି ଦାଦ୍ରିର ବାଢଡାରେ ଜଣେ ପ୍ରବାସୀଙ୍କୁ ପିଟିପିଟି ହତ୍ୟା କରାଯାଇଥିବା ନେଇ ଅଭିଯୋଗ ହୋଇଛି । ଗୋମାଂସ ଖାଇବା ସନ୍ଦେହରେ ଏପରି କରାଯାଇଥିବା ଜଣାପଡ଼ିଛି । ଏହାର ଏକ ଭିଡିଓ ମଧ୍ୟ ସୋସିଆଲ ମିଡିଆରେ ଭାଇରାଲ ହୋଇଛି । ଭିଡିଓ ଭାଇରାଲ ହେବା ମାତ୍ରେ ଆକ୍ସନ ମୋଡକୁ ଆସିଛି ପୋଲିସ । ମୃତକଙ୍କ ସମ୍ପର୍କୀୟଙ୍କ ଏତଲା ଆଧାରରେ ପୋଲିସ ମାମଲା ରୁଜୁ କରିଛି । ଏହାସହ ସମ୍ପୃକ୍ତ ଥିବା ୭ ଜଣଙ୍କୁ ଗିରଫ ଗିରଫ କରିଛି ପୋଲିସ । ସେପଟେ ପ୍ରବାସୀଙ୍କ ମଧ୍ୟରେ ଭୟର ବାତାବରଣ ଥିବାବେଳେ ପୋଲିସ ପକ୍ଷରୁ ସେମାନଙ୍କ ସୁରକ୍ଷା ବନ୍ଦୋବସ୍ତ କରାଯାଇଛି । ଡିଏସପି ଭାରତ ଭୂଷଣ କହିଛନ୍ତି, "ଏପରି ଘଟଣାର ଯେପରି ପୁନରାବୃତ୍ତି ନହେବା ସେଥିପ୍ରତି ପୋଲିସ ସଜାଗ ରହିଛି ।"

ଏନେଇ ହରିୟାଣା ମୁଖ୍ୟମନ୍ତ୍ରୀ ନାୟବ ସିଂ ସୈନି ଏହି ଘଟଣାକୁ ନିନ୍ଦା କରିଛନ୍ତି । ସେ କହିଛନ୍ତି, "ଏଭଳି ଆଚରଣ ଆଦୌ ଗ୍ରହଣୀୟ ନୁହେଁ । ଗୋମାତାଙ୍କ ସୁରକ୍ଷା ପାଇଁ ଆଇନ ଅଛି । ଯଦି କାହାରିକୁ ଗୋମାତା ଅସୁରକ୍ଷିତ ଥିବା ମନେ ହେଉଛି, ତେବେ ସେମାନେ ଆଇନର ଆଶ୍ରୟ ନେଇପାରିବେ । ହେଲେ ତଥାପି ଯଦି ସେମାନଙ୍କୁ ଏମିତି ଲାଗିବ କିଏ ତାଙ୍କୁ ରୋକିବ? ଗୋମାତାଙ୍କ ପ୍ରତି ଗାଁ ଲୋକଙ୍କ ଏତେ ଶ୍ରଦ୍ଧା ଯେ ଏଭଳି ଖବର ସେମାନେ ପାଇ ଉତ୍ତ୍ୟକ୍ତ ହେଲେ ଗାଁ ଭିତରେ କ'ଣ ହେଉଛି କ'ଣ ନହେଉଛି ସେକଥା କେମିତି ବା ଜଣାପଡିବ? ହେଲେ ଏଭଳି ଘଟଣାକୁ ମୁଁ ତୀବ୍ର ନିନ୍ଦା କରୁଛି ।"