ଭୁବନେଶ୍ଵର, ୧୯/୦୯ : କୋଲକାତା ଆରଜି କର ହସ୍ପିଟାଲ ଡାକ୍ତରଙ୍କୁ ବଳାତ୍କାର ଓ ହତ୍ୟା ଘଟଣା ସାରା ଦେଶକୁ ଦୋହଲାଇ ଦେଇଛି । ଓଡ଼ିଶାରେ ଏଭଳି ନିନ୍ଦନୀୟ ଘଟଣା ଯେପରି ନଘଟିବ ସେଥିପାଇଁ ରାଜ୍ୟ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ବୁଧବାର ହସ୍ପିଟାଲ ଓ ମେଡିକାଲ କଲେଜ ପାଇଁ ସୁରକ୍ଷିତ କର୍ମସ୍ଥଳୀ ପରିବେଶ ମାର୍ଗଦର୍ଶିକା ଜାରି କଲା ସ୍ୱାସ୍ଥ୍ୟ ବିଭାଗ । ଏହି ନିୟମ ଲାଗୁ ହେବା ଦ୍ୱାରା ହସ୍ପିଟାଲରେ କାର୍ଯ୍ୟରତ ଡାକ୍ତର, ସ୍ୱାସ୍ଥ୍ୟ କର୍ମୀ ଓ ଡାକ୍ତରୀ ଛାତ୍ରଛାତ୍ରୀଙ୍କ ସହ ଅଧ୍ୟାପକ/ଅଧ୍ୟାପିକାମାନେ ନିର୍ଭୟରେ ସେମାନଙ୍କ କାର୍ଯ୍ୟ ସମ୍ପାଦନ କରିପାରିବେ।
ଏହି ନିୟମରେ ୮ଟି ଗୁରୁତ୍ୱପୂର୍ଣ୍ଣ ବ୍ୟବସ୍ଥା ରହିଛି । ସେଥିମଧ୍ୟରେ ବାହ୍ୟ ଅନୁପ୍ରବେଶ ନିୟନ୍ତ୍ରଣ, ଆବଶ୍ୟକ ସୁରକ୍ଷା ବ୍ୟବସ୍ଥା, ଡାକ୍ତର ଓ କର୍ମଚାରୀଙ୍କ ପାଇଁ ବିଶ୍ରାମ ଗୃହ, ଘଟଣାସ୍ଥଳରେ ଜରୁରି କାର୍ଯ୍ୟାନୁଷ୍ଠାନ, ସୁସ୍ଥ ବାତାବରଣ, ଅଭିଯୋଗ ରିପୋର୍ଟ, ଅନୁଷ୍ଠାନର ମନିଟରିଂ କମିଟି ଆଦି ଅନ୍ତର୍ଭୁକ୍ତ । ବାହ୍ୟ ଅନୁପ୍ରବେଶ ନିୟନ୍ତ୍ରଣ ନିୟମ ଅନୁସାରେ, ସମସ୍ତ ହସ୍ପିଟାଲ ଓ ମେଡିକାଲ କଲେଜର ଉଚ୍ଚ ପାଚେରି ଓ ନିର୍ଦ୍ଦିଷ୍ଟ ସ୍ଥାନରେ ପ୍ରବେଶ ଏବଂ ପ୍ରସ୍ଥାନ ଫାଟକ ରହିବ । ବାହାରୁ ଆସୁଥିବା ସାଧାରଣ ଜନତା ଓ ଅନ୍ୟ ଗାଡ଼ି ଫାଟକ ପାଖରେ ଯାଞ୍ଚ କରାଯିବ। ହସ୍ପିଟାଲରେ କାର୍ଯ୍ୟରତ କର୍ମଚାରୀମାନେ ପରିଚୟପତ୍ର ଓ ୟୁନିଫର୍ମ ପରିଧାନ କରିବା ବାଧ୍ୟତାମୂଳକ । ୱାର୍ଡରେ ଭର୍ତ୍ତି ହୋଇଥିବା ରୋଗୀଙ୍କୁ ଦେଖିବାକୁ ଆସୁଥିବା ରୋଗୀ ସମ୍ପର୍କୀୟଙ୍କ ପାସ୍ ବ୍ୟବସ୍ଥା ମଧ୍ୟ ବାଧ୍ୟତାମୂଳକ । ଜଣେ ରୋଗୀଙ୍କୁ ଭେଟିବା ପାଇଁ କେବଳ ଦୁଇଜଣଙ୍କୁ ଅନୁମତି ମିଳିବ । ୱାର୍ଡକୁ ପ୍ରବେଶ କରିବା ସମୟରେ ସୁରକ୍ଷା କର୍ମୀମାନେ ଆଟେଣ୍ଡାଣ୍ଟଙ୍କୁ ଯାଞ୍ଚ କରିବେ ।
ସେହିପରି ଓପିଡି ସାମ୍ନାରେ ଉଭୟ ପୁରୁଷ ଓ ମହିଳା ସୁରକ୍ଷା କର୍ମୀ ନିୟୋଜିତ ରହିବା ବାଧ୍ୟତାମୂଳକ । ହସ୍ପିଟାଲର ସମ୍ବେଦନଶୀଳ ସ୍ଥାନ ଓ ଛାତ୍ରଛାତ୍ରୀଙ୍କ ହଷ୍ଟେଲରେ ସିସିଟିଭି ଖଞ୍ଜାଯିବ। ଯାହାଦ୍ୱାରା ହସ୍ପିଟାଲରେ ଘଟୁଥିବା ପ୍ରତିଟି ଘଟଣାର ମନିଟରିଂ କରାଯାଇ ପାରିବ । ପ୍ରତିଦିନ ସୁରକ୍ଷା ବ୍ୟବସ୍ଥା ଯାଞ୍ଚ ହେବ । ଜରୁରିକାଳୀନ ଘଟଣା ପାଇଁ ପ୍ୟାନିକ୍ ବଟନ୍, ଫୋନ୍, ମୋବାଇଲ ଆପ୍ର ବ୍ୟବସ୍ଥା ହେବ। କୌଣସି ଡାକ୍ତର ଓ କର୍ମଚାରୀଙ୍କୁ ଯେପରି କେହି ଖରାପ ବ୍ୟବହାର ପ୍ରଦର୍ଶନ ନ କରିବେ ସେଥିପାଇଁ ସୁସ୍ଥ ବାତାବରଣ ତିଆରି କରାଯିବ। ହସ୍ପିଟାଲରେ ହିଂସା ସୃଷ୍ଟି କରୁଥିବା ଲୋକଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ
