ନୂଆଦିଲ୍ଲୀ,୦୭/୦୫: ମନି ଲଣ୍ଡରିଂ ମାମଲାରେ ଇଡି (ପ୍ରବର୍ତ୍ତନ ନିର୍ଦ୍ଦେଶାଳୟ) ଗିରଫଦାରୀକୁ ଚାଲେଞ୍ଜ କରି ସୋମବାର ଝାଡଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ହେମନ୍ତ ସୋରେନ ସୁପ୍ରିମକୋର୍ଟ ଯାଇଛନ୍ତି । ତାଙ୍କ ପାଇଁ ଆଡଭୋକେଟ କପିଲ ସିବଲ ମାମଲାକୁ ପ୍ରଧାନ ବିଚାରପତି ଡି.ୱାଇ ଚନ୍ଦ୍ରଚୂଡଙ୍କ ନିକଟରେ ରଖିବା ସହ ଲୋକସଭା ନିର୍ବାଚନ ପରିପ୍ରେକ୍ଷୀରେ ଏହାର ତୁରନ୍ତ ଶୁଣାଣି ଲାଗି ଅପିଲ କରିଛନ୍ତି ।
ସେ କହିଛନ୍ତି ଝାଡଖଣ୍ଡରେ ଆସନ୍ତା ୧୩ ତାରିଖରେ ଭୋଟ ଗ୍ରହଣ ଅନୁଷ୍ଠିତ ହେବ । ତା ପୂର୍ବରୁ ହେମନ୍ତଙ୍କୁ ପ୍ରଚାର କରିବା ଲାଗି ଅନୁମତି ଦିଆଯାଉ । ତେବେ ତାଙ୍କ ଆବେଦନ ଉପରେ ବିଚାର କରାଯିବ ବୋଲି ପ୍ରଧାନ ବିଚାରପତି ଜଷ୍ଟିସ ଚନ୍ଦ୍ରଚୂଡ, ବିଚାରପତି ଜେ.ବି ପାରଦିୱାଲା ଓ ମନୋଜ ମିଶ୍ରଙ୍କୁ ନେଇ ଗଠିତ ଖଣ୍ଡପୀଠ କହିଛନ୍ତି । ଇଡି ଗିରଫଦାରୀକୁ ବିରୋଧ କରି ହେମନ୍ତ କରିଥିବା ଆବେଦନକୁ ଝାଡଖଣ୍ଡ ହାଇକୋର୍ଟ ଗତ ୩ ତାରିଖରେ ଖାରଜ କରିଦେଇଥିଲେ ।
