ଗୁରୁଗ୍ରାମ୍ – ଦେଶରେ ପ୍ରତିଦିନ କେଉଁଠି ନା କେଉଁଠି ସଡ଼କ ଦୁର୍ଘଟଣା ହେଉଛି। ଅନେକ ଦୁର୍ଘଟଣା ଏତେ ଭୟଙ୍କର ହୋଇଥାଏ ଯେ, ଦେଖୁ ଥିବା ଲୋକଙ୍କ ହୃଦୟ ଥରି ଉଠେ। ନିକଟରେ ପୁଣେରେ ଏମିତି ଏକ ସଡ଼କ ଦୁର୍ଘଟଣା ଚର୍ଚ୍ଚାର ବିଷୟ ପାଲଟିଛି। ଯେଉଁଥିରେ ଦ୍ରୁତ ଗତିରେ ଆସୁଥିବା କାର୍ ଏକ ବାଇକ୍କୁ ଧକ୍କା ଦେଇଥିଲା। ଏଥିରେ ଦୁଇ ଜଣ ବ୍ୟକ୍ତିଙ୍କ ମୃତ୍ୟୁ ହୋଇଥିଲା। ଏହି ମଧ୍ୟରେ ଏବେ ଗୁରୁଗ୍ରାମରେ ମଧ୍ୟ ଏକ ଭୟଙ୍କର ସଡ଼କ ଦୁର୍ଘଟଣାର ଭିଡ଼ିଓ ସାମନାକୁ ଆସିଛି। ଏଥିରେ ଏକ ଦ୍ରୁତ ଗତିରେ ଆସୁଥିବା ଗାଡ଼ି ସ୍କୁଟିକୁ ଧକ୍କା ଦେଉ ଥିବାର ନଜର ଆସୁଛି। ଏହି ଦୁର୍ଘଟଣା ଏତେ ଜୋରରେ ଥିଲା ଯେ, ସ୍କୁଟି ଚାଳକ ଜଣଙ୍କ ଅନେକ ଦୂର ଯାଏ ଘୋଷାଡ଼ି ହୋଇ ଯାଇ ଥିଲେ। ଏହି ପୂରା ଛାତିଥରା ଦୃଶ୍ୟ ସେଠାରେ ଏକ ବାଇକ୍ ଶୋରୁମ୍ରେ ଲାଗିଥିବା ସିସିଟିଭି କ୍ୟାମେରାରେ କଏଦ ହୋଇଛି।
ସୂଚନା ମୁତାବିକ, ସ୍କୁଟି ଚାଳକ ଜଣଙ୍କ ଥିଲେ ଜଣେ ପରିବା ବ୍ୟବସାୟୀ । ଘଟଣା ଦିନ ସେ ସ୍କୁଟିରେ ବଜାର ଯାଉଥିଲେ। ଏହି ସମୟରେ ଏକ ଧଳା ରଙ୍ଗର ଇକୋ ସ୍ପୋର୍ଟ୍ସ କାର୍ ସ୍କୁଟିକୁ ଧକ୍କା ମାରି ଥିଲା। ଗାଡ଼ି ସହ ଲାଖି ରହି ବ୍ୟକ୍ତି ଜଣଙ୍କ ସ୍କୁଟି ସହ ପାଖାପାଖି ୫୦ ମିଟର ଯାଏ ଘୋଷାଡ଼ି ହୋଇ ଚାଲି ଯାଇଥିଲେ। ଘଟଣାଟି ଆଜି ସକାଳ ୪ଟାରେ ଘଟିଥିବା କୁହାଯାଉଛି। ସିସିଟିଭିରେ ଦେଖିପାରିବେ ,କେମିତି ଖୋଲା ସଡ଼କରେ ସ୍କୁଟିର ଠିକ୍ ପଛରେ ଧଳା ରଙ୍ଗର ଗାଡ଼ିଟି ଦ୍ରୁତ ଗତିରେ ଆସୁଛି ଏବଂ ସ୍କୁଟିକୁ ପଛରୁ ଧକ୍କା ମାରୁଛି। ଧକ୍କା ମାରିବା ପରେ ଗାଡ଼ିଟି ଆଉ ନରହି ସେମିତି ଦ୍ରୁତ ଗତିରେ ଫେରାର ହୋଇ ଯାଉଛି।
ଘଟଣା ସ୍ଥଳରେ ଉପସ୍ଥିତ ଲୋକେ ସ୍କୁଟି ଚାଳକଙ୍କୁ ନେଇ ସେକ୍ଟର ୧୦ର ସିଭିଲ ହସ୍ପିଟାଲରେ ଭର୍ତ୍ତି କରାଇ ଥିଲେ। ଘଟଣାର ସୂଚନା ପାଇଁ ପୁଲିସ ମଧ୍ୟ ଘଟଣା ସ୍ଥଳରେ ପହଞ୍ଚି ପୀଡ଼ିତଙ୍କ ବୟାନ ରେକର୍ଡ କରିଥିଲା। ବର୍ତ୍ତମାନ ପୁଲିସ ଗାଡ଼ିର ଡ୍ରାଇଭରର ତଲାସ କରିବା ଆରମ୍ଭ କରି ଦେଇଛି। ସେପଟେ ଏହି ଦୁର୍ଘଟଣାର ଭିଡ଼ିଓ ସୋସିଆଲ ମିଡ଼ିଆରେ ଖୁବ୍ ଭାଇରାଲ ହେଉଛି।
